Face 155期
面對面
最佳男配菜 曹永廉
2010年05月12日
進入結局週，《飛女正傳》最高收 29點算有交代，有睇開就會好奇，女俠 Janet Bin最終情歸何處？
兩週前，我問過男角之一的黃德斌，大隻斌大賣關子：「呢套劇結局唔係依常理 o架！（陳豪？）點會咁普通……（你？）好難講……（曹永廉？）……其實都唔係冇可能……」
無論肥定索，曹永廉飾演的「徐永暉」都癡心一片，我懶醒，斷估 Janet Bin可能最後被真情打動，終於有套港劇不再公式化，不是第一男主角贏得美人歸。
訪問這天再向曹永廉求證：「個結局大家講明唔可以透露……不過，你估都估到，都係男主角（陳豪） o架啦……睇劇都係睇男女主角，我哋呢啲配菜嚟啫……」
快滿 45歲的曹永廉入行將近 20年，兜痞了 10年才輾轉進電視台攝到一線尾二線頭：「有啲人成個格生出嚟就係男主角，我哋呢啲自己知自己事……最緊要坐穩個配菜位，畀到人驚喜，有時甚至期待你出場多過主菜，都係成功。」
寫稿這天（上週四），曹永廉竟然榮登單日 Yahoo熱門搜尋榜首位，原來早兩日參加《掌門人》玩遊戲，不幸撞到重要部位……有時候，配菜升呢做主菜不見得是好事，這個道理，早在男人最痛以前，曹永廉就明白。
賣過胸圍
“雖然做唔到主角，我都想做一個令人期待出現嘅配角。”
2000年，在《妙手仁心 II》首次登場的向眾仁醫生，無可否認是曹永廉的代表作，同名同姓同一個角色先後再出現於 2004年《妙手仁心 III》、 2009年的《畢打自己人》和今年的賀歲片冠軍《 72家租客》做幾秒串星。做小男人做到入屋、在電視台企穩陣腳之前，曹永廉事實上已經入行 8年多，沒幾個人記得，他 92年唱李克勤首〈一生不變〉贏得青衣區歌唱比賽冠軍，簽約樂意唱片（現已結業），出過三張個人專輯。
我中學以後就出嚟做嘢，超市、食品、喺安莉芳做 sales行街賣胸圍、自己搞生意賣服裝……係冇諗過做呢行。
92年做胸圍 sales，日日收工走去唱 K，個個同事話我唱得好，就幫我報咗青衣區嗰啲細歌唱比賽，識咗當時經理人。
我從來唔係啲自信爆棚嘅人，唔覺得自己靚仔，唔信自己真係唱得好，但係有時呢行嘅人係鍾意聽好聽說話……
簽約第三年至出碟，頭嗰兩年冇收入，就使吓老本、問經理人又攞啲、再用信用咭透支過活，高峰時期五張咭，儲埋十幾萬咭數。到真係出咗唱片，喺街見到自己海報成幅牆咁高，都唔開心得幾多，因為呢度冇（曹永廉邊說邊拍拍褲袋，意指荷包）。
我唱歌唱到唱片公司執，拍劇唔知係咪演得衰得制，搞到人哋要永不錄用， 94年做完《親恩情未了》（鄭秀文、李影合演無綫劇集）後，就唔再搵我。本來 97前都叫有嘢做，可能人哋知我平，拍 7組都係得四千蚊，小本製作、電視電影拍唔少，窮起上嚟，四千蚊都夠我磨幾個月，不過 97後就乜都冧晒。屋企人冇畀壓力我啫，但我都要找咭數 o架！十幾萬咭數未找，銀行剩番百幾蚊，我行到最後一步，諗住賣咗架錢七……約人睇車前黑色暴雨警告，我又行錯落水氹，浸埋架車……等緊拖車個人坐喺路邊淋住雨，突然發癲指住個天用粗口狂鬧，一路鬧，一路開始狂標眼淚……我入行遲，嗰年已經三十一歲，冇錢更加睇唔到前路，呢啲咪窮途末路囉。
絕處逢生
說起窮途末路，曹永廉零舍多體會：「霉到冇得再霉，都會安慰自己衰完就會好……但你又點知係咪低處未見低，可能我跟住癱埋呢……」
生於普通家庭，家有四兄弟，曹永廉排行第三。入行頭 10年，曹永廉食住靠家，又拿不出家用，可幸的是父母從來不是火上澆油的人，其他三兄弟亦手足情深有義氣。
幾得意，幾次搭定路轉行，又會突然間有人搵我開工。 99年換咗經理人，主動搵 TVB打算由頭做起，就俾我遇上 00年嘅《妙手仁心》。
我睇死自己一世冇位上，又會俾我遇着向眾仁醫生呢啲角色，突然有吓人氣、喺新加坡攞埋配角獎。啱啱有番希望，跟手嗰幾年又變得再冇聲氣…… 04年《妙手 III》再好番啲，又會接啲明知唔會有發圍嘅角色……起起落落固然難捱，但捱過咗人就變得更經得起磨練。
電視比電影圈容易上一線得多，等到個機會就得。再唔係，好似家咁一線尾、二線頭其實都幾好，一樣可以做到得人敬重。我曹永廉咁多年死唔去，都係因為肯做肯捱、你搵我拍戲包保唔會難搞添麻煩啫，口碑好重要，最緊要一直有戲拍……目標我唔係冇，不過學識唔再強求。
以前，一收到劇本，心知肚明個角色幫助有幾大，唔灰心就假……演員係咁，身邊總發現一啲同行會令你好敬佩。好多年前拍出邊啲小本電影就同黎耀祥經常合作，就算係配角、就算個角色千篇一律，佢總會有啲唔同嘅嘢畀你，令你期待……雖然做唔到主角，我都想做一個令人期待出現嘅配角。
當然，自己要努力，呢行人事幫忙都唔少得，擦鞋上位、多主角做嘅，身邊見唔少，不過電視台嘅嘢我唔方便講……如果擦咗鞋一定得，我可能會做，事實上唔係……正如我外父都同我講，做一線嘅人好多係天生、係整定，唔係就唔係，呢個道理我明。
07年 11月迎娶姜依蘭，有報道指曹永廉零蚊禮金，姜大偉則有百萬鑽飾嫁妝贈女：「雜誌講啫，如果我真係有靠女家，都唔使好似家咁！」《忽然 1周》圖片
00年加入《妙手仁心Ⅱ》演出曉煲湯煮飯又會為女友腳底按摩的向眾仁醫生，成功追到花旦邵美琪飾演的婦科權威。
出過三隻碟，曾經與李蕙敏、彭玲同屬一間唱片公司，曹永廉的歌唱事業兩年玩完。
《飛女正傳》的徐永暉，由小男人變有錢仔，由忠變奸再良心發現，曹永廉答案例牌：「配角有時仲大發揮，仲多滿足感！」
主菜外家
2000年，曹永廉被當年的老死鄭敬基橫刀奪愛，搶走女朋友鄺文珣。情海翻波之際，卻和麻雀腳姜依蘭愈打愈投契， 02年拍拖冇耐就同居， 07年 11月迎娶挺住七個月大肚子的老婆，翌年 1月兒子出世。
姜依蘭從祖父那代起就個個是影圈重頭人物，父親姜大偉人稱 John哥， 68歲還企穩一線；其兄秦沛人稱 Paul哥，是愈老愈有味道的影視甘草王：其弟爾冬陞更是套套大片的金像導演。配菜娶了主菜女兒，曹永廉難免被人說是高攀。
老婆屋企嗰邊，唔使講，個個都係主菜。不過由識我老婆、第一次見佢屋企人開始，佢哋冇嫌棄我、冇畀壓力我、冇懷疑我冇得畀老婆享福，從來冇畀過一句唔好聽嘅說話，讚就有……做人父母，佢哋最基本要求係我對個女好。同向眾仁一樣，我份人係幾婆仔。老婆唔識煮、我識又鍾意煮，飯咪我煮多啲囉；由細到大，家務由我屋企四兄弟分擔、做慣做熟，家屋企家傭忙唔嚟，拖地洗碗咪照做囉；我讀到中學，老婆大學畢業，教仔讀書揀學校嘅嘢就梗係留畀老婆做、由佢決定啦……起起落落咁多年，老婆就陪我捱過咁多年，佢做到亦唔容易。
至於教仔，就老婆做忠我做奸，鬧佢打佢都係我，不過佢知，老豆最錫佢。我個仔永遠想每個人都開心，在場有幾多個人，佢都會攬勻、錫勻，一個唔漏；遇着霸道嘅小朋友，佢唔會硬碰硬，不過搶走佢手上嘅嘢就係唔得，有自己堅持……好得意，兩歲四個月人仔，佢性格已經有我哋兩公婆影子。
做人老豆唔係主角、又冇咩成就，我都唔會將自己做唔到嘅嘢，投射喺阿仔身上。等於你睇娛樂版，來來去去都係講嗰幾個人……係囉，紅嘅咪就係得嗰幾個，其他人咪全部墊緊佢哋底囉！做人知足、開心，又養活到自己咪夠囉。
曹永廉 65年 10月 16日在廣華醫院出世，在家四兄弟排行第三：「咩家務都分工合作，唔知係咪因為咁，我以前性格仲婆仔，仲多嘢講！」
92年參加青衣歌唱比賽入行前，曹永廉在內衣公司任行街 sales，對胸圍認識多過老婆，真係《絕世好 Bra》。
“等於你睇娛樂版，來來去去都係講嗰幾個人……係囉，紅嘅咪就係得嗰幾個，其他人咪全部墊緊佢哋底囉！”
反高潮
少有被偷拍，曹永廉說自己冇消遣，最多都係被人影到去超市掃貨。
拍照需要，我在超市入了大袋貴夾唔飽但外形絕佳的肉菜生果，曹永廉第一件事是看標價：「嘩？乜呢塊牛扒賣咁貴？」
年輕時做過超級市場，埋現場女性堆講格價對他來說亦沒難度：「超市永遠唔夠藥房同街市平，尿片一包差成十幾蚊！」
說起奶粉行情，更有秘聞爆：「你知唔知 XX點解特別平？（下刪 100字）……」同我等師奶愈傾愈啱嘴形，連官網 profile愛好都填煲湯，見識過真人，就知道為甚麼曹永廉的小男人角色演得好。
「係就係，我嘅角色千篇一律，不過我個小男人角色未算坐得穩 o架，家一線嗰個小男人係陳錦鴻呀！」
哦！原來小男人也有野心的！
撰文：朱小博
攝影：黃家活
髮型： Matthew Lin@髮飾
化妝： Terry Yu
形象： Bryan@ the Flaming
服裝： Ben Sherman