36歲大S懷孕五個月

大S徐熙媛老公汪小菲,日前(16號)喺廈門出席活動,當日咁啱係父親節,汪小菲就話:「希望包括自己在內的所有已婚男生,明年都能過上父親節。」當時佢呢番說話,被指係對大S施壓。

36歲嘅大S,同汪小菲結婚兩年幾,小S徐熙娣都生3胎,大S肚皮仍然未有動靜。其實佢一早就應該向小S老公Mike取經啦。之不過,可能汪小菲呢番話,係暗中向大家報喜呢?

今日台灣《壹週刊》封面報道,話大S盛傳已經有孕五個月。曾上《康熙來了》嘅塔羅牌師傅喺facebook爆料,指大S媽曾請教佢、大S何時有喜,亦有網民貼出大S同汪小菲密會密宗高僧祈福求子。最近大S身形暴脹,特別係腹部,多次出門都以平底鞋示人。如本月14號,小S生日當晚,請來一眾親友去汪小菲嘅「俏江南」食飯,大S兩公婆都喺度。走嗰陣,只見大S面圓圓,完全將佢昔日靈秀之氣完全填滿晒。

食完飯,以往大S一定跟埋轉場繼續玩,但今次佢就選擇乖乖返家,由得老公陪班friend去KTV繼續唱。之後連續三日,大S都冇出門口,行蹤神秘,令人懷疑大S真係有咗。事有湊巧,大S屋企,最近亦多咗一個鳥巢,鳥媽媽仲生咗一窩雛鳥。大S幾乎隔日就去睇吓個鳥巢,更於微博寫道:「終於孵出來了!趁著鳥媽媽梅出去覓食,我輕手輕腳的走出陽台,快速的拍了這張像片。好激動!我一定會好好保護梅一家人!」可見大S想為人母之心幾咁迫切。

事實上,大S兩公婆為咗求子,一直努力造人,仲放棄堅持茹素嘅習慣、開始食肉,仲經常量度體溫計排卵,一度更因為壓力太大致暈倒,嚇到小S喊晒。

家陣大S已經全面停工,全職做家庭主婦,日日煮飯煲湯服侍老公。而大S為咗養好身子,亦不停進補,結果越食越肥,俾網民笑佢「肥肉橫生」。不過為咗BB,俾不相干嘅網民笑一下,又何況呢?最重要係身體健康,BB肥肥白白呢!

36歲大S懷孕五個月
昔日充滿秀氣的一張臉…現在變得圓碌碌。(台灣《壹週刊》圖片)

36歲大S懷孕五個月
台灣《壹週刊》圖片