無綫監製張乾文就快開新劇《牛頭愛搭馬嘴》（暫名），本來一早定咗個好新鮮嘅組合，就係萬綺雯（蚊蚊）首次同歐陽震華（Bobby）合作，其他拍檔仲有李思捷、麥玲玲、「蝦頭」楊詩敏等，呢啲陣容拍喜劇，相當有睇頭啦！

不過，聽聞Bobby已經辭演咗，要另覓男主角，張乾文日前承認係事實，佢話Bobby因為檔期問題辭演，話係同好耐之前接落嘅內地劇撞咗期，尾段撞期撞得太多，無奈惟有辭演。

呢套劇原定下月15日開工，合共20集趕住喺新年前完成，男主角左搵右搵，為免影響進度，最後將戲份改咗，由李思捷擔做第一男主角，而另一男主角就搵咗梁烈唯，其他人選就冇乜變，問到蚊蚊同唔到Bobby合作有冇覺得可惜？蚊蚊喺電話度話：「撞咗期都冇辦法，總有合作機會嘅！其實我喺無綫都好多人未合作過，同邊個合作一樣都會有火花。」

笑對陳雅倫有餡

至於新任男主角李思捷，靜咗一排又有新聞，有報道指佢同之前為《玩嘢王》假傳緋聞嘅陳雅倫玩認真，話47歲嘅陳雅倫玩到同李思捷人工授孕，已經有喜。思捷噚日透過WhatsApp話：「哈哈，唔回應呀！」而陳雅倫有就生仔問題諮詢過嘅麥玲玲，就話唔方便講人哋嘅嘢，玲玲姐喺電話度話：「佢係有問過生BB夾生肖嘅事，係想生細路，總之佢桃花好旺盛，仲有得揀囉。」身在外國的陳雅倫沒好氣地說：「這麼無聊，不需要回應，亦不想解釋那麼多。我個肚很矜貴，不會亂大肚，而刊登那張相是舊相。」