不獲TVB續約變羅生門事件 歐陽震華經理人炮轟樂易玲

歐陽震華(Bobby)在無綫工作超過30年,拍過《壹號皇庭》、《陀槍師姐》等經典劇集,近日驚傳無綫藝員部不再與Bobby續約,令好多藝人和網友大跌眼鏡,事緣Bobby經理人與藝員部傾續約時得到一句答覆是「有啱先搵你」,令Bobby覺得「被放棄」,續約風波驚動無綫管理層,執行董事兼集團行政總裁李寶安派製作總監曾勵珍挽留Bobby。傳聞指Bobby經理人Lydia和無綫製作資源部總監樂易玲傾談合約期間發生爭拗,傳有人(假傳聖旨)並拋下一句「有啱先搵你」,最後不歡而散。

有指Bobby會揀劇及揀對手拍劇,而樂易玲接受周刊訪問時亦透露Bobby之前身體出現問題,夏天不可以開工,故此製作部謂需要「諗諗」新合作形式,最終藝員部建議三年兩部劇,Bobby經理人Lydia便提議「有啱嘅再傾」。但事件變成了羅生門,Lydia昨日在電話中否認有講過,並說﹕「佢意思係有啱先搵我地啦,仲主動解釋,第日有嘢啱時,就搵我地去簽一年約,佢係咪將我repeat佢啲句子當係我講呢?」

歐陽震華不續約事件變羅生門 經理人反擊樂易玲

據了解藝員科經理何其穎亦在場,大部份時間由樂小姐發言;事件曝光後,無綫集團行政總裁李寶安即落令由戲劇製作總監曾勵珍接手傾續約,問是否太多是非?Lydia表示:「咁大間機構實有,有啲人形容係佢哋公司內部問題,人哋話演員走晒,製作部咪冇人用。我唔係加鹽加醋嘅人,如果find out係公司意思就心甘命抵,但唔係嘅都要畀公司知,有人拎住公司卡片原來咁傾嘢。我都有同珍姐講唔好意思,人哋係做製作部,出埋佢份糧,好似要做埋人哋啲嘢,係咪先?聽人講珍姐都幫好多藝人傾合約,我哋都唔係第一個,但唔明點解咁多合約去咗珍姐度傾呢,大家諗啦!」

Bobby前晚暫且拋開煩惱,到朋友家中談天至凌晨近兩點。Bobby穿上一身襯到絕的粉藍色套裝,但下巴鬚根變白,望上去有點滄桑。他被問續約事件是否已解決?他笑說:「等經理人搞。」有沒有不開心?他說:「冇冇冇,最重要大家得個明白、有個交代啫,我同TVB關係咁多年都非常好吖,係咪?!」不獲續約是否好突然?他想了一會說:「掉番轉頭講,可能有人表達啲嘢,或者我經理人接收嘅嘢有啲出入,呢樣嘢大家求個明白、求個真實啫。我亦唔想有邊個演繹錯咗我哋嘅立場,其實冇TVB都冇我,我想大家有個了解,非常簡單。」

樂易玲暗嘲Bobby經理人不專業

樂易玲今日在《潮拜武當》活動後現身,為TVB不與歐陽震華續約一事解畫。樂易玲指自去年12月已找Bobby的經理人Lydia洽談合約一事至今,並以Bobby的健康情況讓他開出工作條件,足證TVB的誠意。至於跟Lydia之間所發生的誤會,樂小姐表示可能大家在洽談期間說話的語氣,或所表達的意思令對方誤解,對此樂小姐感到十分遺憾。

提到Bobby的合約現時轉為由製作部的曾勵珍負責,樂小姐表示每個藝員的合約都會與製作部溝通,了解該演員未來的用量或演出方式等,所以并不是因為外間的壓力才要由珍姐接手。對於Lydia炮轟她曾說過「有啱先搵你傾」,樂易玲以專業操守及會議內容保密為由避談,但暗嘲說:「一個好的經理人應該面面俱圓,不應讓演戲以外的問題困擾到藝人。」

對於樂易玲指經理人應要面面俱圓,Bobby今日接受電話訪問,聞言即維護Lydia說:「咁咪啱囉!咪同我夾囉!因為大家岩岩巉巉先至夾到嘅!」他表示與Lydia合作了十多年,好信任佢,又指合約全權交由Lydia負責:「Lydia同珍姐好熟。」

樂易玲強調「有啱先搵你」這句話是誤會,Bobby說:「冇咩誤會,只不過想攞番個公道。事情講咗出嚟,大家了解咗,有多把聲音,好過得一把聲!咁都係誤會嘅話,大家都想知咩意思,我都想學下嘢!」他續指自己入行多年,都想知道電視台是如何運作,表示自己都不想搞大件事,認為誤會是可以解決。