黃宗澤爭啖氣130萬換戰車

無綫小生向來愛名車，不惜一擲千金愈揸愈豪，以示個人身份地位。本身已有三個物業揸手的黃宗澤（Bosco），近年密密返內地拍劇賺人仔，豬籠入水的他即豪花一百三十萬訂購Audi RS5紅色跑車，昨日Bosco往九龍灣取車，新車到手興奮得即時揸走遊車河。

由於近年內地市場當旺，不少無綫小生北上拍劇掘金成功，隨時一套劇賺幾百萬。不少男藝人都喜歡換車獎勵自己，在你換我又換的情況下，結果各人愈換愈豪，以炫耀身價。本身揸開Audi價值四十多萬A4旅行車的Bosco，近年頻頻返內地拍劇搵真銀，除了有三個自置物業外，最近更豪擲130萬購入Audi新型號RS5跑車，足證水頭相當充足。

等了一年的新車落地，黃宗澤（左一）睇番夠本。

黃宗澤圍住「新歡」團團轉，視察有否瑕疵。

圍住「新歡」團團轉

昨日Bosco所訂購的紅色戰車終於到港，他一早已急不及待相約一名男性友人幫眼，齊齊往九龍灣迎接「新歡」。Bosco大約在中午12時抵達車行，當見到「新歡」已打扮靚仔，掛上車牌準備他可以隨時揸走，Bosco臉上忍不住流露興奮神色。雖然負責的汽車經紀忙於為他講解新車性能，但他的目光卻全程放在「新歡」上，不停圍着「新歡」團團轉，一副小朋友喜得心愛玩具一樣，開心得難以形容。

據知，向來鍾情Audi車款的Bosco，去年已對此型號一見鍾情，即使知道車價百多萬，可能要等足一年才送抵香港，他亦毫不考慮向代理訂購，可見Bosco十分期待。

Bosco在車行內辦妥各種交收手續後，馬上御駕親載其中一名友人離開，極速駛離九龍灣往西貢方向，第一時間要試下新歡性能。

黃宗澤取車後，即到西貢方向走一轉。

黃宗澤近年密搵人仔，百餘萬買心頭好，濕濕碎！（資料圖片）

林峯座駕最巴閉

黃宗澤雖然百多萬新車落地，但論無綫小生排名最多第二，座駕最豪非駕駛一百八十萬馬莎拉蒂開工的林峯莫屬，其次鄭嘉穎去年被傳與阿佘分手後，火速以九十萬購入寶馬X6新車，而吳卓羲在無綫小生中亦出名愛換車。

「新歡」檔案

Audi RS5

引擎﹕4,200cc V8

馬力﹕450匹

扭力﹕43Kg

0-100Km：4.6秒

傳動﹕7速+/-半自動/四驅

價錢﹕130萬

Bosco投資全方位身家千萬

無綫出名人工偏低，不過黃宗澤眼光遠大，一直有做不同的投資。近年Bosco經常返大陸拍劇賺「人仔」，收入豐厚，年前已由沙田村屋搬到現時月租3萬港元的火炭晉名峰千呎豪宅，寧願將資金用作投資。Bosco曾透露會買一些保本基金及紅酒保值，而大部分金錢則交由媽咪打理，現在已有三層樓揸手，雖然仍需供款，但近年樓市升得快，Bosco身家自然水漲船高，保守估計已過千萬元！

黃宗澤投資紅酒，頗為偏門。

杏兒旺夫宗澤走唔甩

黃宗澤愈來愈紅，收入豬籠入水，最開心當然是身為女友的胡杏兒，二人在一起六年間，黃宗澤事業一帆風順，現已成為當家小生。據知，無綫不少人經常拿他們來開玩笑，指胡杏兒非常「旺夫」，黃宗澤一定走唔甩，又話已儲定人情做禮。

杏兒表示換車是她目前首個目標。（資料圖片）

昨日記者致電胡杏兒，問她黃宗澤榮升百萬車主，事前可有徵詢女友意見？杏兒說：「佢幾時攞車我都唔知。」當提到她必然是第一個女乘客，她即甜絲絲說：「唔知，（佢用百幾萬買玩具？）唔關我事，（黃宗澤係咪搵好多？）咁恭喜佢。」

胡杏兒與黃宗澤拍拖六年，打風吹唔甩。

轉頭杏兒又力撐男友，透露自己亦想買車，並說：「依家換車係我目標。」黃宗澤收到啦！

小生花旦「駕」勢堂

黃宗澤豪擲一百三十萬買Audi跑車，圈中不少當紅小生及花旦亦頻頻換靚車代步。

佘詩曼

Mercedes-Benz（平治）

型號：E350. Coupe

$76萬8千

楊怡

Volkswagen（福士）

型號：Eos

$42萬8千

陳豪

Toyota（豐田）

型號：Pardo

$66萬

林峯

Maserati（馬莎拉蒂）

型號：Gran Turismo

$188萬8千