黃宗澤效應 Bosco經典金曲:便秘 便秘 咩都廢!

黃宗澤驚人唱功

如果大家聽到小朋友唱「便秘 便秘 咩都廢!」唔使緊張,唔使驚,其實只係唱緊黃宗澤嘅《爆旋陀螺鋼鐵戰魂》卡通主題曲《勁爆 Metal Fight》,裡面有一句歌詞「Be Brave! Be Brave! Metal Fight」,發音超難。真係考起黃宗澤。

講番前晚黃宗澤喺《勁歌》優秀選中,演唱得獎金曲——主演劇集《好心作怪》片尾曲《最後祝福》,被指歌藝差,有網民笑佢冇個音唱得啱。無綫仲要俾埋個mic stand佢……有人笑佢:「好似拎住浴室個花灑唱歌咁」,不過事後黃宗澤就話:「我覺得自己演繹時冇問題,不過我會接受大家嘅批評同改進。」

各花入各眼,各聲入各耳,究竟唱成點、台風如何,最好自己上網搵番條片嚟睇。但與此同時,優秀選另一個得獎者,亦令人擔心——因為呢個,係星煥一姐、老闆何哲圖愛將,將於下月22同23號喺九展開個唱嘅鍾嘉欣BB。

有網民索性up埋嘉欣BB當晚喺優秀選上唱《你是我的一半》嘅live,然後開post寫道:「得罪講句,鍾嘉欣咁既live,下個月仲開演唱會?」聽完之後,覺得嘉欣BB仍keep住一貫水準,只係換氣差咗,有啲唞氣位唔啱,令人聽落去覺得好似唔多夠氣咁,有啲高音位「飄」咗。有嘉欣BB嘅fans就話:「嘉欣BB未練氣啫!」下個月個唱就到,今個月仲要谷寫真喎,BB夠唔夠時間0架。

上一上快達票望望,嘉欣BB兩場騷,係喺Rotunda 3舉行,可容納一千至千六人左右,門票劃一要$480。要爆應該唔難嘅……成個場嘅坐位表分16個sections,其中5個對正台嘅sections已經冇得賣,唔知係賣晒定係俾人包起咗。

順帶一提,網民本來講緊黃宗澤,跟住走咗去講鍾嘉欣,最後結論係……咁多個無綫「唱歌」嘅小生花旦中(即係計埋林峯、吳卓羲、陳法拉等等)唱歌最好聽嘅,係胡杏兒。難怪噚日記者問胡杏兒點睇舊愛黃宗澤被評唱歌難聽時,佢一臉尷尬咁話:「唔識答。」……明晒。


黃宗澤經典金曲,唱Live嘅時候認真爆!


宣傳海報。嘉欣BB寫道:「如果你們想聽我唱歌, 就支持啦 lovelovelove -L-」


圖中台前中間第一行四個sections,同埋第二行左三成個section已經買唔到。


嘉欣BB當晚喺優秀選嘅演出…


其實唔使擔心嘉欣BB個騷唔爆,因為…有佢哋。


高登仔心聲


胡杏兒出過兩隻碟,唔係一碟歌手嚟0架。


噚日胡杏兒被問到點睇黃宗澤被彈唱歌難聽,尷尬表示唔識回應。