冧掂嫰口奀星林穎彤 風騷黃宗澤
內地拍劇年賺千萬 聞波波B即應

黃宗澤（Bosco）最近既要為新劇《好心作怪》宣傳，又要忙拍娘家新劇《貓屎媽媽》，但每次出現依然笑到蓮子蓉，無他！皆因事業愛情兩得意！早前有指他被舊愛胡杏兒狠飛後，早已冧掂只得20歲的奀星、自稱「波波B」的林穎彤（Bella）。而近日轉戰到內地的苑瓊丹又踢爆，Bosco已成內地搶手港星三甲，劇集長拍長有。愛情到手外，麵包也不愁，Bosco自然特別風騷；日前他到火炭為《貓》劇開工時，導演稱他為「波波B」，他不但無嬲，還應得相當順口，看來在電視台Bosco和Bella是一對，已不是秘密！

Bosco當晚8點，在火炭山尾街公園開工，同場還有王浩信、古明華、張穎康、陳志健和飾演Bosco兒子的童星峰峰。拍攝戲份講述Bosco因兒子跟黑社會大佬的張穎康起衝突，之後張穎康帶着馬仔陳志健等人向Bosco等人尋仇，結果Bosco跟好兄弟王浩信和古明華，即抬着Bosco囝囝走佬，但三個麻甩佬為揀逃走路線，竟然嗌晒交，相當搞笑。

想住Penthouse

雖然在大熱天時30多度氣溫兼要狂跑拍攝，但拿着紙扇撥涼的Bosco，依然心情大好，除了跟其他演員有講有笑，特別是童星峰峰，更加當仔咁錫，完全冇發老脾。等埋位時，導演突然大呼：「波波B過嚟！」其他工作人員完全冇異樣，似乎早已聽慣此稱呼，而當事人Bosco亦全無抗拒，相當順口兼自然回應：「嚟！」這個對答正好透露Bosco和Bella關係，在電視台已是公開秘密。

其實Bosco心情咁靚，除了有嫰口女友Bella外，最高興莫過於得到內地劇青睞，他早前大晒成爭手貨程度，更透露掘金成功想買Penthouse，「手頭上有六、七個劇本，但我要拍TVB劇撞期，近來好多製作人老友打電話嚟搵我，我都要同佢哋Say Sorry，欠落好多人情債。喺內地拍套劇真係可以買層開心單位，但仲未買到心水單位，因我想住Penthouse。」長搵長有，心頭高啲都無所謂啦！

Bosco、王浩信和古明華似乎想將峰峰五馬分屍。

導演(綠衣者)叫Bosco「波波B」，他即時回應埋位。

Bosco、王浩信和古明華為了揀走佬路線嗌大交。

相對劇中老竇Bosco，峰峰更欣賞擁有王字肌陳志健，還拿水樽幫他「冰鎮」降溫。

身家過千萬

Bosco在2010年開始北上掘金，有指最近拍內地劇《少年神探狄仁傑》身價已達22萬港幣一集，去年底他在大馬怡保投資800萬港元開夜店「House Music Club」，加上之前坐擁的物業及名車，估計Bosco身家逾3,000萬。