低V香香 拖實Bosco急救肌膚

今日Bosco黃宗澤去咗銅鑼灣世貿中心，出席Estée Lauder活動，今次佢化身做呢個「失眠肌膚拯救隊」所長，率領「女神級」研究員包括吳千語、岑麗香同苟芸慧，教人點樣解救「唔夠瞓皮膚」帶來嘅問題。最近有雜誌報道，話Bosco追求一齊拍《貓屎媽媽》嘅香香。噚晚兩個出席煞科宴時就玩前後腳，今日齊齊出騷囉，就當然大大方方啦，香香仲露出小deep V，俾Bosco拖住小手影相添，至於苟姑娘就露出大玉背，鬥搶風頭。

期間Bosco分別教三女點樣護膚啦，先教千語BB……即係阿嫂……好兄弟林峯個honey，用心形手勢按摩面部肌膚。咁香香呢，就幫佢隻手搽cream，再拖住合照，都叫做有肌膚之親啦，當然唔尷尬。咁苟姑娘呢，就冇咁close，只係請佢飲護膚茶。

講開肌膚之親，今日大會安排咗三女一男model，接受眾人頒發「勳章」，Bosco呢個「所長」竟然要為女model掛勳章——喺心口，Bosco自然大為尷尬，唔知點好，幸而主持馬上幫佢同千語BB對調，變成男對男、女對番女，咁就冇問題啦。

Bosco呻唔夠瞓：影響男人能力

睇開微博，成日都見到一眾TVB藝人狂呻，話拍足兩三晚通宵瞓得三粒鐘又再開工嘅苦況。最近嗰單，就係曹永廉攰到喺水中瞓著。

唔夠瞓又要強撐精神拍劇，真係幾攞命；唔夠精神就靠飲咖啡提神，但皮膚呢，攰起上嚟，真係化咗妝都掩蓋唔到，最大問題係上唔到粉。好似啱啱忙完新劇《貓屎媽媽》嘅黃宗澤，今日到銅鑼灣出席Estée Lauder活動時，就話:「唔夠瞓真係上粉都難，依家瞓得好少，得4至6個鐘，咁樣對男人唔好0架嘛，力量都少啲呀!所以我會爭取時間多啲休息，或者做吓運動。」

至於近日有報道話苟姑娘因為一年內三度失戀，影響荷爾蒙分泌，仲搞到水腫又失眠，佢今日受訪時話:「一定有影響，女仔有充足嘅睡眠好重要，上妝都易啲，我就會飲多啲水，同埋揀護膚品都嚴緊啲。」咁香香岑麗香呢？佢都話:「最近拍嘢成日通頂，真係瞓得少咗，上妝好難，要用多啲cream補水。冇辦法啦，我要做好呢份工，惟有勤啲護膚，同埋平時會飲果汁、蔬菜汁，會令人精神啲0架!」

最慘慘豬係千語BB，唔夠瞓，對佢嚟講就好易出紋，有黑眼圈同眼袋，最傷係皮膚乾到好似龜裂咁，所以千語BB都話要多做運動同飲食均衡，令循環系統好啲喎。」

鬥走光大賽？ 香香千語現白底 苟姑娘厚肉「封住中門」

緋聞男女黃宗澤(Bosco)同岑麗香、苟芸慧同吳千語，今日喺銅鑼灣出席護膚品牌活動，今次仲係香香同黃宗澤傳緋聞後，首個商業活動，不過兩個都話唔尷尬，問情侶檔酬勞高啲？香香話：「冇，係兄妹。」黃宗澤就話香香咁講令人覺得佢老咗，又舖定後路，話唔介意日後一齊工作：「搵食，如果鍾意呢個組合，套劇好反應，多合作無所謂。」

同場三女都各有各露，香香露低V，苟姑娘露肉/玉背，千語BB就露長腿。可惜三女喺台上一坐低，大件事囉，個個都露底，千語BB同香香最誇張，直頭連「內裡乾坤」都幾乎毫無保留呈獻；苟姑娘就因為大腿肉地夠厚，啱啱「封住咗度中門」，但仍隱隱見到裡面條黑色底底。

苟姑娘因為易水腫，所以成日令人覺得佢好厚肉地，加上今日仲著大大露背裝，更加「搶眼」。不過苟姑娘就話呢身服裝係大會安排，唔係佢揀。問佢係咪減極肥都無效？苟姑娘話：「唔覺，健康緊要，睇中醫，係人都知慢啲。」提到減肥新進展，佢話上次快減九磅係去水，依家慢慢排毒：「注重健康，每個人唔同身高、骨架，用磅數做標準對我唔公平。」

至於有報道話苟姑娘一年內相繼畀鄭嘉穎、郭富城同梁烈唯飛，結果搞到失眠同經期亂，苟姑娘話：「聽完得啖笑，冇拍拖點畀人飛？緋聞聽完笑完就算。」問到可介意傳聞？佢就話5:「可唔可以唔好咁寫，但呢行冇辦法，係訓練EQ。」又澄清佢冇失眠同經期亂嘅問。

至於有冇試過畀人飛？苟姑娘謂：「我怕醜，少拍拖，分手都係協議，和平分手，再見都係朋友。」