黃宗澤呵番走音杏兒

黃宗澤昨晚現場獻唱，表現出水準。

黃宗澤（ Bosco）、馬浚偉及陳偉霆昨晚於電視城錄影《勁歌金曲》，提到胡杏兒日前在紅館《超級巨聲》演唱會中走音， Bosco即力撐緋聞女友說：「我唔驚佢，我驚自己，我好耐冇上《勁歌》，怕走音又怕唔記得，唉，唔好因為一粒、半粒音判人死罪，畀啲正能量，佢都好緊張呢個報道。」 Bosco坦言有呵番杏兒，被問會否怕做對走音鴛鴦？他笑說：「你估咖啡奶茶咩？」

馬仔認冇錢

馬浚偉與呂珊拖手合唱，其未婚妻應該不會呷醋。

馬浚偉的圈外女友被大起底，指她有半億身家，馬仔戶口則只有 88萬又冇學識，馬仔即說：「係呀，我戶口得 88蚊，我冇所謂，我係中學畢業靠自己，但成家立室點都照顧到身邊人。」馬仔又指不知未來岳父是否有錢。

Bosco杏兒慘變「走音鴛鴦」

黃宗澤（Bosco）昨晚出任《勁歌金曲》嘉賓，宣傳新碟。被問到有否安慰被指走音的緋聞女友胡杏兒，他坦言更擔心自己走音，因久未現身《勁歌》，加上準備時間不足，擔心走音兼忘記歌詞，但到正式表演一切順利。

記者笑指他和杏兒豈非「走音鴛鴦」？Bosco說：「咖啡奶茶嗎？」他再度出言力撐杏兒，叫大家勿再執著一粒半粒音去判人死罪，歌手走音有好多原因，要看當時情況。他直言杏兒很緊張報道，問到事後有呵回她嗎？他說：「有，阿姐（汪明荃 ）都有，不只我一個，好多人撐她。」

另外，馬浚偉昨日表示一直低調拍拖，因怕女友和未來外母被狗仔隊騷擾，未來外母向他坦承不習慣，他已跟未來外父溝通過，對方表示不介意。

文：林子棠 圖：鄧國良

■黃宗澤昨晚亮相《勁歌》，宣傳新碟。