黃宗澤拉隊 向私隱署投訴

無綫旗下藝人黃宗澤、胡杏兒、陳自瑤、王浩信接連於家中被偷拍，無綫雖然已對兩本雜誌《忽然1周》和《FACE》作出封殺行動，不過鑑於事件激發全城憤怒，無綫已決定將行動再次升級，日內會安排四位藝人親身到香港個人資料私隱專員公署作出投訴。

黃宗澤、王浩信之前分別被雜誌《忽然1周》及《FACE》於寓所內被赤裸偷拍，雖然無綫方面已發出聲明，表示會封殺兩本雜誌，禁止該兩雜誌記者踏足電視城，但不少藝人都覺得此做法治標不治本，成效不大。

黃宗澤下周將往私隱署投訴，希望私隱得到保障。

據知無綫有見「全城震怒」，昨日將行動升級，決定安排四位被偷拍的受害者黃宗澤、胡杏兒、陳自瑤及王浩信於本月27日到香港個人資料私隱專員公署齊齊作出投訴。

偷拍事件令電視城內人心惶惶，曾醒明配合藝員意願安排投訴行動。

胡杏兒與家姐同住，在家現過着「不見天日」的日子。

為藝人爭取保障

記者昨日向無綫外事部副總監曾醒明求證，他承認公司日內的確有此行動，他謂：「公司考慮到受害人感受，所以會安排四位受害者親自到私隱專員公署作投訴，公司亦會主力支持佢哋。」問他會否有無綫高層一起陪同前往？曾醒明表示暫不知道，詳情亦要開會再作傾談。

被偷拍的黃宗澤雖仍耿耿於懷，但昨日已稍放鬆心情，跟謝天華鬼馬合照。

王浩信配合公司的行動，隨時候命。

陳自瑤是被偷拍的受害者之一，至今仍留陰影。

至於日前被赤裸裸偷拍的黃宗澤（Bosco），坦言聽到公司有此行動的消息，這亦是他自己的意願。他說：「我哋都希望合力將件事交畀專業人士去處理，望有關嘅政府部門正視呢件事，呢個行動唔係追究，係希望往後大家藝人都有個保障，究竟啲傳媒影咗嗰啲相，係咪可以咁樣刊登、咁樣處理？」

胡杏兒長期落簾

而其緋聞女友胡杏兒亦表示支持公司有此行動，問杏兒是否已度期出席？她說：「我依家每日都開緊工，不過無論點，都會全力配合公司，總之公司要我哋做乜，都會配合。」問她被偷影後有否留下陰影？她不諱言：「都有，自己喺屋企一定會拉晒窗簾，我同家姐一齊住，都會提佢咁做，女仔始終都要小心啲。」

私隱被侵 情緒激動

黃宗澤、胡杏兒、陳自瑤及王浩信早前被侵犯私隱偷拍屋內照，眾人事後情緒激動，對於這種行為大感無奈。

黃宗澤（16/6）

「做藝人預咗冇私隱，但嗰個係我睡房，已經過晒我底線，我都有阿媽生㗎！」

胡杏兒（17/6）

「好無奈，唔知講咩好，都畀人睇晒。希望佢哋唔好影，Bosco依家喺屋企好慘好似坐監，要閃閃縮縮。」

陳自瑤（7/6、16/6）

「好唔開心，因為喺私人地方畀人偷影，好過分，好似畀人強姦咁，直情係揭起裙底。」同月16日她㷫爆說︰「我哋已經畀人踩到上心口！依家畀呢班不道德嘅人咁影，連小小嘅私隱都冇埋。」

王浩信（7/6）

「唔開心，好無奈，屋企對面係山至開窗，以後會小心啲。」

鍾嘉欣想見陽光 支持投訴行動

接連發生無綫藝員於住所內被偷拍，令無綫不得不去信個人資料私隱專員公署求正視，藝人反應多表示支持，但曾與私隱署交手的則不敢存厚望。

近日因圈外男性朋友被追訪一事十分困擾的鍾嘉欣，昨晚於微博向這位朋友與其家人道歉。

對於無綫安排幾位受害人往公署投訴一事，鍾嘉欣說：「好事吖！偷影到去屋企入面真係好唔啱，屋企係一個自由地方，每個人都有自己嘅生活方式，我自己喺屋企驚畀人偷影，一向都唔開窗簾，但如果見好天，或者屋企人喺外國嚟香港，我都想打開窗簾見吓陽光，所以好希望政府能夠立例保護我哋啲藝人，如果公司（無綫）有咩安排，我都會支持。」

而藝員李泳漢也表支持：「絕對支持佢哋咁樣做，我覺得啲周刊咁樣做，係一種好變態嘅行為，影入去人哋屋企，嚴重侵犯別人嘅私隱，咁樣影法，會令到人覺得連屋企都唔安全，喺屋企唔可以除衫，唔可以去廁所，咁樣搞法對人嚟講，係一種好大嘅心理壓力，真係一定要採取行動。」

佘詩曼：驚咗十幾年

可是黃秋生則認為作用不大：「冇用o架，我個仔舊年被雜誌偷拍，我夠搵律師出信畀私隱署，佢哋覆『登咗出嚟就唔係私隱』，咁打劫番嚟啲錢使咗就冇得追究？好荒謬，不干預等於變相支持，侵犯私隱咪愈來愈嚴重囉，希望有人做吓嘢，不過我寄望唔大。」

佘詩曼則說：「我好支持無綫今次行動，今次偷影好過分，嚴重侵犯私隱！政府亦應該係時候正視呢個問題，除咗影響社會風氣，甚至影響埋下一代！我哋藝人每年都交咁多稅，好希望政府可以立例保障公眾人物嘅私隱。我已經驚咗十幾年，連喺屋企都冇安全感！」

陳自瑤如被強姦 籲立法遏歪風

陳自瑤、王浩信之前於男方家中纏綿時被偷拍，事後陳自瑤更表示有被強姦的感覺，對於現時無綫有再一步行動，兩位受害者坦言會支持到底。陳自瑤昨日接受記者訪問時，坦言被偷拍後仍有後遺症，她不諱言：「有時好神經質，我已經唔敢開窗簾，不過就算塊窗簾有一條罅，我都好驚。」她又表示對付這些傳媒最好的方法就是立法，她說：「政府應該有行動，唔好畀某啲傳媒以為無王管，如果佢哋再次觸犯，都冇法律管制嘅話，大家點做都冇用，都唔只淨係對我哋，對各藝人之後都希望有一個保障。」

而其男友浩信則表示事情交由公司安排，他坦言：「報道令自己真係好唔開心、不安，做藝人明白記者工作，但唔可以咁過分，總之公司有乜行動，我都會全力配合。」

形象受損 可民事索償

藝人僅穿內衣褲或赤裸在家的私生活被雜誌偷拍，可否尋求私隱專員公署求助？黃國桐律師表示：「私隱專員公署主要係保障個人電話號碼、身份證號碼等個人資料，法例上私隱唔係個人資料，但係最近亦有判例指出名人嘅樣都算係個人資料嘅一種。」

至於有關藝人可否以私人名義向有關雜誌進行民事索償？黃律師表示：「佢哋可以以形象受損或演藝發展受阻理由進行民事索償，如果法庭判懲罰性罰款，罰款都會幾高。」