黃宗澤（ Bosco）和胡杏兒拍拖六年，近期 Bosco被指早前和胡杏兒在內地拍劇期間，偷偷搭上曾拍過電視劇的女助手陳小琳。 Bosco昨日在中環出席活動時強調和女助手沒有曖昧關係，並大派定心丸說：「女朋友啱，就唔需要換啦！」

黃宗澤和胡杏兒地下情近期逐步浮面，早前更被影到一齊行街 shopping。不過，黃宗澤被指早前在內地偷偷搭上 20多歲後生女助手陳小琳，偷跳被發現，有指胡杏兒強迫 Bosco要進一步公開兩人情侶關係。 Bosco昨日在中環出席品牌 Etro新店開幕，承認去年在內地確有聘請過女助手，但不是和胡杏兒共用。問他和女助手可有曖昧關係？ Bosco即說：「梗係唔會有曖昧關係啦。」杏兒很信任他？他說：「我好信任自己。」

黃宗澤被指偷嗒女助手，他昨日即時講好話冧女友。

「成日對住會悶」

胡杏兒被問到黃宗澤緋聞，笑住謂要反白眼。

Bosco和杏兒去年在內地拍劇，朝夕相對，可會感情更好？他說：「我哋唔喺內地，喺香港都成日見到，喺內地拍劇幾個月，見都見到悶，希望呢半年唔好再同佢合作，成日對住一個對手，會悶。」對足一世豈非更悶？ Bosco即不願回答，問他拍拖的話，也是一個對手？ Bosco即說：「女朋友啱，就唔需要換。」林峯因戀上潘霜霜，床照似又有新一波，問黃宗澤可有試過被內地女子引誘過？他說：「我冇！可能我吸引力唔夠大。」

杏兒：我都想知

黃宗澤和胡杏兒月前拍拖 shopping，被影到斷正，情人關係公開。

胡杏兒昨日在九龍塘浸會大學任活動頒獎嘉賓，她對男友偷食，全程表現從容，低調淡化男友緋聞，她說：「吓？有啲咁嘅事？咁奇怪，我真係唔知講乜，發生乜嘢事。」有指 Bosco被她逼攤牌，她說：「真係冇啲咁嘅事，冇乜嘢講，當古仔去睇。」會否撐 Bosco？她說：「冇回應！」是否雨過天晴？她說：「朋友啦，唔使太多回應。」

新聞背景

忍無可忍

食女助手　胡杏兒逼黃宗澤攤牌

2011年04月14日

 

無綫一線小生林峯、吳卓羲、鄭嘉穎偷食內地巨乳女相繼出事後，跟胡杏兒拍拖六年，亦嗜偷食的黃宗澤，早前在內地跟女友合演電視劇《跑馬場》期間，竟吼正印返港做宣傳，搭上貼身女助手。 不過先後跟宋汶霏、倪晨曦傳過緋聞，前年跟Toby梁靖琪撻着甚至向胡杏兒提分手，搞到驚動高層，被照肺警告要醒定的黃宗澤，明知再行差踏錯無運行，回港後即斬纜，但收到風的胡杏兒依然咬住唔放，攤牌迫令對方公開正印身份。

引以為鑑
黃宗澤（Bosco）跟胡杏兒早前忽然高調，不斷被拍到孖公仔行街shopping。自林峯跟潘霜霜床照流出後，醒目的黃宗澤引以為鑑，除了忽然承認胡杏兒女友身份，更不經意發表愛的宣言，誓跟女方留守無綫共同進退，既向公司賣口乖，又提升自己好男人形象。 今年初，黃宗澤與胡杏兒情侶檔返內地合作電視劇《跑馬場》，黃宗澤趁女友多次離組返港出席《魚躍在花見》宣傳活動，冇王管大好時機，即食貼身女助手。 「個女助手係其中一個女角男朋友嘅妹妹，拍過電視劇，但都係啲閒角，佢去片場探班識咗黃宗澤，就提出要做佢助手，其實胡杏兒都有請助手，不過一個助手照顧兩個人，始終差啲，所以嗰個女仔話要留低幫手，胡杏兒冇反對。」工作人員透露。

食女無國界
同正印胡杏兒拍拖6年，Bosco看似專一好男人，其實無論在內地或香港，均遍布緋聞女友，甚至要胡杏兒出手收拾殘局。

Toby
09年，Bosco於內地拍《摘星之旅》期間，跟Toby玩出真感情。有傳胡杏兒因為男友提分手搞到自殺，更被高層照肺，在前途壓力下，最終妥協補鑊箍煲，為氹番杏兒，更自導自演沖繩預支蜜月挽形象。

宋汶霏
Bosco拍《摘星之旅》連環出事。繼梁靖琪後，又爆出與劇中另一女角宋汶霏嘴出火花，甚至為力追女方在北京同廣州買樓，當時正在港拍劇的杏兒速往深圳監場，實男友。

倪晨曦
去年3月，Bosco被踢爆於08年到加拿大登台時，背住胡杏兒偷嗒05年多倫多華裔小姐倪晨曦。二人親密照在網上流傳，杏兒接受訪問時仍以「蘇州屎」形容男友緋聞，躁爆。

身材豐滿
黃宗澤撻着的貼身女助手名叫陳小琳，二十歲出頭，樣貌雖然普通，卻勝在青春兼身材豐滿，加上性格可愛主動，跟出跟入，與黃宗澤相處時間比胡杏兒更多。 「個女助手照顧得Bosco好好，尤其係每次杏兒返香港做嘢，兩個人成日匿埋一邊傾偈，劇組嘅人都知道佢哋撻着咗，兩個仲玩到黐埋一嚿，個女仔明知自己身材勁，都成日黐身黐勢，大家都知道咩事。」工作人員透露。

知機斬纜
霧水情緣快來快去，黃宗澤亦醒目斬纜，不過自言跟他有過十分開心回憶的陳小琳，就在微博繼續向「波波哥」（Bosco）隔空示愛：「現在酒店房間就我一個人……腦袋裡有好多開心畫面，不知道什麼時候才能夠再見……愛你！」 見過鬼怕黑，為怕有手尾跟，回港的黃宗澤已經不作回覆，見對方在微博的話題不會引起敏感揣測，才禮貌回應。

女助手陳小琳：好掛住你呀！（真實對白）

女助手跟黃宗澤合作完後，依然不停跟男方微博保持聯絡，掛念「波波哥」之餘，又擺到明「愛你」。

胡杏兒跟黃宗澤在《跑馬場》扮演情侶，不過二人在片場並不親密，其間有央視主播探班，二人才肯影合照。