視帝陪跑轉做老闆 黃宗澤密謀退休

踏入三十有二的黃宗澤(Bosco)視帝年年陪跑,深明戲未必能演足一世,於是近年積極做生意,先由興趣入手搞飲食,他說:「呢行退休時都有門手藝。」即使返內地拍劇,Bosco亦指明要與劇組分酒店瞓,減少應酬,如此深閨難怪感情空白。

投資飲食業為息演

Bosco投資飲食業開蠔吧,笑言趁後生創業:「仲後生唔怕蝕,因為仲可以追得番。」他透露下廚是個人興趣時,卻不經意自爆息演的想法:「起碼呢行(藝人)退休時都叫有門手藝,咁又冇話諗過幾時退休,但我諗如果當觀眾唔想再睇我做戲時,我就會退休。」下廚是Bosco從小到大的情意結,他猶記得小學時期的「第一次」,年紀小小已入廚房炒飯,而當他媽媽、婆婆煮餸時,他亦愛從旁細看,連第一份暑期工,亦是在契媽的大牌檔當免費「伙頭軍」,他說:「我好鍾意睇煮嘢食嘅書同節目,無論咩食物我都鍾意,可能因為我天生八卦啩!當中我又好鍾意食生蠔,因為唔同嘅月份、唔同地區嘅生蠔都唔同,覺得好有挑戰!所以同朋友合作開蠔吧。」

雖然有言千萬不要與好朋友合作做生意,為免因財失義,但Bosco自言「先小人,後君子」,因此沒有太擔心:「應該唔會,大家都係後生仔有傾有講。一早講清楚晒啲細節,而且都係想吸收吓經驗,始終喺香港第一次開餐廳,想試吓!但原來真係好多嘢煩,好似消防牌照、衛生牌照、酒牌等,當係學吓嘢啦!」

視帝陪跑轉做老闆 黃宗澤「煮」宰財路 密謀退休

馬國餐廳被迫賣盤

而Bosco早前亦曾在馬來西亞與朋友一起開設餐廳,因飲食潮流轉變甚快,及後曾轉變成夜店,並獲得不俗成績,但他因為長期不在當地,所以即使有錢賺,最終亦決定費盤:「價錢都算0K啦!少少哋、賺少少就算。」

嬲介紹男仔畀杏兒

Bosco去年中與拍拖七年的杏兒分手後,兩人會否復合一直是眾人關心的話題。Bosco雖說彼此「再見亦是朋友」,但透露大家未有聯絡:「如果見到面當然會打招呼,雖然冇咩聯絡,但大家仲係朋友。」早前有指他嬲胡定欣介紹男仔畀杏兒識,他笑说:「梗係嬲!應該介紹埋啲女仔畀我識啦!」雖自言對感情事睇得好開,但與「香香」岑麗香傳緋聞卻是他始料不及:「一開始同香香一齊拍劇時都冇傳,以為冇事,點知到最後拍完先傳緋聞。佢喺外國長大,性格爽朗,我當佢係小妹妹。」

對於愛情,Bosco老土地表示隨遇而安,問到「過電」條件?他說:「我鍾意聰明、獨立嘅女仔,最憎啲小鳥依人嘅,諗起都毛管哦戙!女人千祈唔可以有公主病,頂唔順!」他指無論對方是圈外或圈內、香港人或內地人都可以,只要夾就得,但他自認「難頂」:「講真我都幾難夾,又怕人煩,又怕人哦。本身我又忙、 冇時間、唔氹人……」羅列了一堆「難頂」事後,他坦承人長大了對愛情亦少了憧憬:「最重要同阿媽夾,但我阿媽又從來冇過問過我嘅感情事,冇催我帶女仔畀佢見,又冇催過我早啲結婚,只係成日叫我要食飽瞓好。」

無綫早前有不少藝人殺入樂壇,Bosco亦是其中一個,在勁歌金曲頒獎禮中屢次獲獎,惟他即場獻唱的實力不時惹來網民熱論。Bosco笑指要多謝網民「厚愛」,但亦忍不住說:「其實我都想講好耐,我從來冇話過自己唱歌叻,我又唔係陳奕迅,我認我唱歌麻麻哋!」他又覺得歌手有不同類型:「當然好多都有實力,但亦有啲係感染力型, 仲有啲一開口唱歌就可以帶畀聽眾歡樂嘅類型。」Bosco自言每當踏上舞台就會有如開派對的感覺,亦會投入地表演:「唱歌係想大家都有開心嘅感覺,一齊去享受呢個時刻,一齊玩!」

視帝陪跑轉做老闆 黃宗澤密謀退休

怕緋聞寧分酒店瞓

無綫視帝年年陪跑,近年Bosco轉攻內地密密北上拍劇搵真銀,而且不時與同劇女星傳緋聞,但Bosco指緋聞得啖笑:「其實我好老土,每次接內地劇,都會要求同劇組分酒店住,想安靜啲,唔想應酬。」對於在內地拍劇,他表示會比在香港時更專注在演戲上,因不可以隨時約朋友聚會,亦不會有拍廣吿、訪問等工作,拍劇就是拍劇:「喺內 地拍劇好簡單,全日拍完就返酒店,喺內地有兩個助手,其中一個就每日負責幫我買餸,晏畫佢會問我今日想煮啲咩、煲咩湯,等我收工返去煮,仲煮埋助手佢哋嗰份,哈哈!」

Bosco在內地的頭炮是與舊愛胡杏兒合演的電視劇《跑馬場》,去年4月首播打開內地市場後,他即Job接Job先後接拍兩套內地電視劇,其中一套是改編自張小嫻的作品,當中Bosco演男主角作詞人林方文,與一眾美女唐嫣、隋棠及劉冬等合作,對於能打開內地市場,他謙稱全是無綫的功勞,對於有指他身價達20萬人民幣(約25萬港元),他笑說:「呢啲商業機密唔講得,但係我接內地劇最重要係睇劇本,當然最鍾意啲有得挑戰同發揮嘅,如果劇本好,我黐線嘅角色都肯做!」

儲錢買Dream House

頻頻北上掘金,Bosco卻不時謙稱搵唔多,一向鍾情古董車的他其實已在這方面上花過七位數,但他自言適可而止:「玩古董車實在太貴啦!成百萬蚊嚟買『玩具』,仲要養,如果賺到錢,都係投資先。」他透露搵到的錢都會交畀媽咪管理,投資在股票或買樓都任憑媽咪處理:「希望早啲儲夠錢買到心目中嘅Dream House!」其實以Bosco如今的吸金力,相信已離夢想不遠!