黃宗澤吳卓羲截胡唱「世界盃」

壹周刊 1058期

黃宗澤吳卓羲「東方神球」錄主題曲拍MV

我哋唱多啲人聽。(設計對白)

谷得就谷

黃宗澤吳卓羲截胡唱「世界盃」

2010年06月17日

勁歌收視跌至新低,無綫力捧自己友歌手谷極唔起,趁住「世界盃」熱,方逸華再出招救亡,下令飛起山寨版組合 Super4,熱播黃宗澤及吳卓羲截胡成功以「世界盃」為主題的韓劇「東方神球」主題曲,日播夜播,借勢再谷。

緊張甩嘴

上週六(六月十二日)中午,黃宗澤跟吳卓羲黑白配襯到絕在電視城五廠開工,為以踢波做主題、緊接「世界盃」精華賽事、即將在 J2台推出、一日重播三次的韓劇「東方神球」錄主題曲拍 MV,由於二人在前一日才突然接獲通知,毫無準備下,唯有即場惡補。
正趕拍電視劇,瞓得兩粒鐘的吳卓羲表面精神奕奕,但腦部未能完全配合,望住貓紙唱依然甩嘴,要企在鏡頭外的黃宗澤提水,不過,望實貓紙的黃宗澤竟然跟住兄弟一齊唱錯歌詞,愈幫愈忙。
時間緊迫,導演隨即跳拍黃宗澤部分。打天才波,冇甩嘴但要邊跳邊自創舞步的黃宗澤,緊張到滿頭大汗,他還苦中作樂,套用林峯上次演唱會主題自嘲:「我哋 Let’s get wet嘛。」
同樣臨時拉夫,擔任女主角的馬賽齋跳唔使唱,但即使有跳中國舞底子,要她突然改跳 Flamenco,一樣被考起,還好有低胸長裙,凸顯 32C身材補番數。

吳卓羲唱到滿頭大汗,要頻頻用紙巾印面,黃宗澤就熱到著住底衫周圍走。
吳卓羲唱到滿頭大汗,要頻頻用紙巾印面,黃宗澤就熱到著住底衫周圍走。


兩個人一齊時,又幫手又度橋夾舞,夠晒搏。
兩個人一齊時,又幫手又度橋夾舞,夠晒搏。

拍 MV時有兩張大貓紙睇住,不過瞓唔夠的吳卓羲,睇住都記唔切,唯有坐低抖抖再嚟。
拍 MV時有兩張大貓紙睇住,不過瞓唔夠的吳卓羲,睇住都記唔切,唯有坐低抖抖再嚟。

六嬸換人

「本來 Super4(無綫力捧新組合)已經錄好首歌,仲排好成隻舞今個月九號拍 MV,點知開完會突然乜都叫停,話六嬸要換人。 Super4全部係新人,冇乜人識,加上首歌係緊接『世界盃』節目之後播,仲一日播幾次, MV又會喺翡翠台成日播,所以都係決定搵番有名氣嘅藝員去唱。咁啱 Bosco(黃宗澤)出唱片,撞正宣傳期,可以谷埋人氣。」工作人員透露。
對於截 Super4胡,黃宗澤跟吳卓羲完全唔知發生咩事。「我哋都係早一日接到通知要錄 MV,究竟首歌係『世界盃』定係電視劇主題曲,我哋都唔清楚,不過我哋會盡量配合公司。」

馬賽臨時落場跳舞,配合導演要求,將本來冇嘢睇的衫袖拉低,為《世界盃》露多少少。
馬賽臨時落場跳舞,配合導演要求,將本來冇嘢睇的衫袖拉低,為《世界盃》露多少少。

有份在 MV出現的啦啦隊女郎亦甚有來頭,左一是○七年最上鏡亞姐曾敏,現已轉投無綫;右一是上過 A1,照顧抑鬱阿媽而服藥自殺的梁麗瑩。
有份在 MV出現的啦啦隊女郎亦甚有來頭,左一是○七年最上鏡亞姐曾敏,現已轉投無綫;右一是上過 A1,照顧抑鬱阿媽而服藥自殺的梁麗瑩。


無綫將會力捧由樂小姐揀蟀的 Super 4,據知個個唱得跳得,仲十分聽話。
無綫將會力捧由樂小姐揀蟀的 Super 4,據知個個唱得跳得,仲十分聽話。

力挽狂瀾

今屆世界盃轉播權旁落有線手中,但無綫一向霸道,雖然牌面輸晒,都唔願坐以待斃,繼續死雞撐飯蓋。

死克勤


主唱 98年世盃主題曲《球迷奇遇記》大熱後,李克勤可以話成為世界盃 icon,形象深入民心。為壯大聲勢,無綫高層何麗全親自洽談克勤任世盃主持,可惜唱片公司與無綫不和,身為無綫「契仔」的克勤左右做人難,最後只好選擇於商台開咪講波,無綫唯有變陣重金禮聘一度人氣急升的天氣小姐黃婉曼回巢講波。

模擬片段


失落轉播權,無綫唯有重本豪擲逾百萬,從法國購入動畫式「模擬入球片段」技術版權,於《世界盃動起來》節目中播出,甚至將世盃節目當成綜藝節目,加插獎門人式環節;講波變齊齊玩遊戲,觀眾唔多受落,連鍾志光亦大呻無奈。

咪神親訪


為抗衡有線「 World Cup Angels」,一向縮皮的無綫竟落重本派新一代咪神高海寧、梁政珏等性感美女親訪治安超差的南非,仲話已經買重保險。咁大犧牲,都係為咗將世盃場外的熱烈氣氛和花絮帶俾觀眾。