離開無綫，有人會銷聲匿迹，但更多人飛得更高更遠，兩年半前林保怡在沒有任何計劃下，為理想孤注一擲跳出電視城的玻璃罩，深信只要肯跨出腳步，必得更多。對於不少人怕離開公司後少了大樹遮蔭，保怡以過來人身份忠告，雖有機會跌死，但只要有實力，自有一條生路可行。

撰文：羅美倫、戴彩煥

林保怡大前年5月正式離開無綫，兩年間拍過中日韓三地投資的《六個陌生人》及不少內地大型劇集及電影，已超越昔日一線小生層次，回想當日離巢，沒有周詳計劃的保怡心口只得一個勇字，他日前接受專訪時說：「當日好徬徨㗎，建立咗嘅嘢突然之間冇晒，有失業感覺，當時又未搵到大國豐臣（現經理人公司），只係搵好多朋友傾偈了解內地行情。」

■林保怡兩年半前毅然逃離無綫玻璃罩，孤注一擲，換來更遠更好的前景。攝影：陳志嵐

「樓都買多幾層」

雖感徬徨，但保怡從未想過回頭：「我覺得無綫係一個玻璃罩，林保怡留喺度點跳都只跳得五呎高，但攞開玻璃罩我可能跳到六、七呎，不過，或者跌死都未定，但做人應該要試吓，好快就一世，仲有能力就試，o依家兩年半過去，我跳高咗，最低限度試過唔同導演、劇種，眼光、視野都闊咗。」

離開無綫後，保怡得到的比預期更多，包括物質及精神上，他笑言：「樓都買多幾層啦！其實係腦、演技方面得到好多。」自他之後，小生如馬德鐘、謝天華等都不續約向外闖，問到保怡是否十分贊成？他即笑笑說：「係咩？我記得我走時有人叫我飲水思源喎！o依家佢哋唔覺得要飲水思源咩？我唔係慫恿佢哋走，無妨一試吖，但亦要先衡量吓自己嘅能力、賣座票房。我贊成㗎，人生苦短，唔得咪返番嚟囉，返嚟唔會好衰，好多人都係咁，只要用心拍戲就得。」

同子怡有火花

保怡覺得香港電視行業環境獨特，一台獨大，跟內地有多個衛視地方台差天共地：「只係你敢唔敢行出呢一步，但要提大家，真係會跌死，如果有運氣、實力，好劇本會嘭嘭聲嚟，但亦可能年頭等到年中都未有劇，到有劇搵，但劇本好爛而你銀行又冇錢，你拍唔拍吖？要有心理準備囉。」

踏出無綫，保怡迎來的是國際級的合作夥伴，近日在吳宇森新片《太平輪》中與章子怡、宋慧喬有不少對手戲，其中一場戲講述與章子怡發生關係，被她扑穿頭，保怡說：「呢場戲同子怡有火花㗎，佢呢場戲好犀利，佢得獎係實至名歸。」

保怡稍後會拍電視劇及兩部電影，工作排得密麻麻，問到無綫邀他可會回巢拍劇？保怡坦言：「一定要睇劇本，你畀三、四、五十萬一集都好，我大前提係唔睇價錢，邊度都係，我出嚟目的係擴闊自己，所以最緊要劇本、角色發揮到，錢可以往後賺番嚟，好劇本、角色唔係每年有。」

有興趣拍港視劇

■保怡現在接戲甚有要求，錢是其次。資料圖片

事業基地轉移到內地，但林保怡仍然關心香港的一事一物，無論時事或娛樂，對於王維基的香港電視終可於今年7月1日開台，保怡坦言：「香港電視經歷咁多風雨，終於都OK啦，我覺得百花齊放係好事。不嬲我淨係睇無綫，o依家多個選擇、或者幾個選擇，其實對觀眾嚟講係好事。」

跟香港電視合作，保怡採取開放態度，他認為自己的演出必須對觀眾有交代，他說：「呢排喺香港，好多街坊見到我都問：『喂！好想睇你嘅電視劇呀，你點樣呀？仲拍唔拍電視呀？』通常我都會同佢哋講笑話我退休，但其實我都好想好想滿足番啲香港觀眾，再喺香港嘅電視度出現，但最主要都係睇誠意同劇本。無綫甚至王維基都絕對有可能合作，最緊要劇本唔好再翻炒，有創意啲。」