《高布布》多謝網民 成功爭取180萬人次睇《潛行凶間》
正如一眾《神探高倫布》主角預測，大結局篇會變得越來越吸引，有力令收視反彈。到星期五晚(10號)一睇，真係好吸引。先有唐詩詠俾敖嘉年強姦，再嚟結尾半個鐘仲有港版《Inception》睇，真係睇到觀眾眼定定。
但亦可能因為咁，睇到血液凝固唔識郁，連郁吓手指尾轉台嘅能力都消失埋，結果成功令《神探高倫布》成為上周收視之冠……28點，約180萬人次收睇；雖然平均收視都仍只係得24點（約154萬人次看)，但都比之前一個星期升咗兩點，算係該星期最叻嘅TVB劇集。
雖然套劇已經事先張揚，大結局嗰集一開始就有唐詩詠被姦嘅劇情，不過成日都姦，觀眾都睇到厭啦…《神》劇最後有呢個成績，實係好靠一班網民0架，佢哋都算一路「推到完場」(或者係鬧到完場)，有啲仲一路睇一路鬧一路喺facebook狙擊，結果？明明冇睇開嘅，都因為好奇而睇埋一份，就係咁，羊群效應，成功爭取180萬人次收看布布包包娃娃同妹妹點樣《Inception》。
相反，《金枝慾孽貳》對觀眾嚟講，就真係悶到出汁喇，成個星期嘅平均收視都係得21點（約134萬人次收看），套劇仲試過喺星期四嘅第二節得18點(約115萬人次收看)收視，真係嚇死人！有份演出嘅演員個個都叫觀眾慢慢睇落去，唔通真係對觀眾嘅耐性咁有信心？
港版「潛行凶間」好睇過潛行胸姦…
永遠懷念！潛力圖、金句王盡在《神探高倫布》
猶記得去年添叔李添勝接受專訪時話《Inception》係「爛片」：「睇着套爛片《潛行凶間》，悶悶哋去廁所，差錯腳，下次入戲院要自備電筒。」
點諗得到，添叔竟然喺自己套《神探高倫布》大結局裡面，用晒《Inception》條橋，抄得滴水不漏。陀螺變成戒指，吓？唐詩詠係Marion Cotillard？噢no。噚日劇中有啲對白，都真係非常非常咁爆，例如敖嘉年飾演嘅包平安，強姦咗男男(唐詩詠)之後被捕。包包仲故意講啲說話激怒男男，仲話「好回味」當晚、兼夾想「姦」多佢一次。作為師奶劇，對白露骨若此，而非點到即止，真係好「破格」。而佢之前一集迫唐詩詠「含槍」嗰場，亦已經成為網上潛力圖。不說明喇。
更搞笑係有人話，其實高倫布根本冇喺個夢入面醒番，而係墮入夢中之夢，去到其中一個夢——佢變咗「布sir」——《法證先鋒III》個高級化驗師布Sir布國棟。亦都有人話，唐詩詠繼《鐵馬尋橋》後又被姦，真係慘。唉，其實馬賽仲慘，佢都係無綫劇欽點被姦女星之一，例如之前嘅《洪武三十二》(漏白米，意識流)同未上嘅《傳愛事務所》。
睇番網上評論，可以全身而退獲「正評」嘅演員，得「港版Marion Cotillard」唐詩詠；至於馬賽，都寫咗篇長微博﹕「劇終了，謝謝大家陪伊娃走過她的一生，見證她的年少輕狂，她的執著堅韌，她的傷心欲絕崩潰成長。我投放了那幾個月裡所有的精力與愛給她，演繹她的人生也讓我體會領悟到許多……很愛你，謝謝你，再見，金伊娃」
布布冇講嘢，但包包就講咗好多嘢…如下﹕「每套劇無論是完成拍攝或播映完畢，小弟都會有一種依依不捨的感覺。神探高倫布終於喺一眾批評聲中結束，雖然有人喜歡亦有人叫停，這也成為城中熱話。但這也是演藝生命裡的一個重要過程。在這裡要多謝台前幕後各人多月來的努力，亦多謝各觀眾的支持和意見，日後會繼續努力改善，多謝收看神探高倫布。再見。」
唔好再見喇！
如果話呢張係經典潛力圖，應該沒人反對吧。
嘩…
唉…
金句一﹕有冇觀眾就呢句對白向通訊事務管理局投訴？
金句二﹕觀眾對呢套劇嘅評語。
很黃很暴力…
Inception
梁麗瑩呢個老妝真係…
金句三
金句四。