陳展鵬，生於77年1月14日。
蕭正楠，生於77年3月23日。

無論外型、年齡和思想，陳展鵬像大哥，是擇善固執、愛面子又口硬的大哥哥。蕭正楠經過年少氣盛，加上三七分界髮型和一條窄腳運動褲，演活一個年少無知的戇直小弟弟。
無綫劇集《巨輪》中，二人做兩兄弟，現實生活中，他們來自同一間母校（長沙灣聖公會聖紀文小學），小學雞時遇過同一位靚女Miss！眼前一黑一白的兄弟，幻想着同一場景，同一畫面，感受卻有大不同，正如《巨輪》的兩兄弟一樣，一凹一凸。

撰文：楊潔雯

■蕭正楠（左）與陳展鵬由細識到大，日前齊齊接受本報專訪，分享入行心路歷程。攝影：陳俊強

在電視圈的巨輪下，無綫人才流失，造就了一班新生代男主角崛起，陳展鵬（煎Pang）和蕭正楠是其中兩個。《巨輪》訴說兄弟情，找來同一個級數，差不多背景的舊同學飾演一對失散的好兄弟，日前接受本報專訪。
熟男陳展鵬，沉穩硬朗，經常被委派做大哥哥的角色，《巨輪》都不例外，煎Pang覺得今次是有更多發揮：「今次個角色，係將我返無綫好多角色濃縮埋一套劇入面，今次做一個有血有肉嘅人，無論你做邊個行業，都要接受社會壓力同轉變。」懷才不遇，捱了兩個十年，漸見起色，煎Pang不以為然，但一問一答時聽得出有一絲苦澀味：「發展OK呀！好多嘢係時勢造英雄，未必有回報，做吓做吓會發覺所有嘢幻滅咗，呢幾年返到嚟，好多大哥大姐返內地發展，好多人事變動，我哋會多咗好多機會。

■陳展鵬入行多年，自有一套生存之道。

難掩內心一團火

命運的安排，煎Pang輾轉十幾年後再返無綫，轉眼又五年了，目標應該很清晰，但他不置可否：「我返嚟公司係一個交代。當你付出咗咁多時間落一份工作，你唔係希望得到人哋認同，亦唔係希望有乜嘢金錢回報，我覺得對自己交代最重要，所以我返嚟無綫，冇諗過做乜嘢好重戲份嘅角色，我淨係想試吓自己。」
陳展鵬的前半生，就好像《巨輪》的哥哥喬天生一樣，年少時躊躇滿志，奮力向上，卻又險阻重重，灰心喪志，如今的煎Pang對前景只抱觀望的態度：「人生係一個過程，點為之頂峯同高峯？事實上，無綫畀咗好多機會我，譬如喺馬來西亞、新加坡攞過好多獎，同埋多咗人識我，今年我去咗美加好多地方唱歌，機會多咗好多，做藝人最緊要有人知道你仲生存緊，知道你係邊個，講得出你個名，先會留意你表演，我好享受呢個時間，但係冇以前經歷，亦冇o依家嘅我。有啲高層同我講，我冇咁嘅經歷，你做唔到呢啲角色，好似今次《巨輪》呢個角色，但係我仲有好多角色可以去試。」
煎Pang雖然態度審慎，亦不難感受到他心中的一團火，他說：「好多人話，人生如戲，戲如人生，可以喺呢行生存二十年，佢一定有啲嘢，我又唔係乜嘢人，都係紅褲仔出身，我都要繼續學習同去磨練吓，仲有空間可以嘗試好多嘢。演戲係好深，我有好多大導演冇合作過，我o依家只知道自己繼續去學去試。」

■無綫劇《巨輪》中，陳展鵬與蕭正楠演繹兄弟情。劇照

■陳展鵬與陳煒曾是亞視台柱，合作劇集《有求必應》，如今均已轉投無綫。劇照

蕭正楠曾經年少無知，如今痛改前非，擁有正面的思想和積極的人生態度，跟《巨輪》的弟弟羅威信甚相似，他說：「個角色好正，不過都會有改變，佢係宗旨冇變，因為佢係一個追求夢想嘅人，中間曾經有好多挫折，將一個好小朋友嘅人物，經過磨練，之後成功，中段係差少少行錯路，想拎住最後幾百蚊去買支黑市槍同個大佬博過，過咗嗰關之後，會係一個幸運嘅人。」
知足常樂，蕭公子吃過了苦頭之後，現在已學懂珍惜，他說：「其實真係幾好彩，返嚟無綫都開開心心，一直冇乜嘢煩，好多瑣碎嘢幫你搞埋，等你集中精神去拍劇，咁每次都係演好佢，所以喺演戲方面有更多諗法，冇乜嘢包袱。呢個角色橫跨幾十年，自己試過細路仔，好少爺脾氣咁樣，都經過好多經歷，通常當時自己都好唔開心，事後睇番都係一個好寶貴嘅機會，咁做呢個角色都體驗到主人翁嘅心態。」

■蕭正楠曾經歷事業低潮，令他學懂珍惜所有。

永不放棄等機會

《巨輪》以鉅記老闆的故事為藍本，梁燦光的故事成為蕭公子的借鏡，他笑說：「佢好犀利呀！香港澳門好多間舖呀！沙士時佢買好多舖，全部生意冇跌過，身家押晒落去，o依家脹咗好多倍。對我亦有好多啟發，因為拍嗰時同老闆、老闆娘傾好多偈，每一個人行都唔係咁容易，每一個階段都可以選擇放棄，有啲人成功就因為堅持，喺佢哋身上可以學到，同埋信自己，有呢個信心等機會，當大家覺得係一個大危機時，事業去到最低潮嗰時，唔選擇放棄，總會起番，就好似一個輪咁樣。」

互爆小學雞趣事

■蕭正楠（左）與陳展鵬互爆求學趣事，份外投契。

煎Pang和蕭公子在小學的相知但不相識，不相識是因為同級不同班，相知就是因為一個靚Miss及煎Pang被罰！

以下是他們的對話：

煎Pang：同級都識，喺學校一齊排隊，男仔玩自然識。我就屬於動，細個鍾意運動，打乒乓波。
蕭公子：我就動靜皆宜喇！我細個鍾意跑，跳高呀！好偏門我都可以攞到獎，冇乜人玩我咪玩嗰啲！仲有吹口風琴，歌詠組。
煎Pang：我都有擲鉛球，跳土風舞。
蕭公子：你都有跳土風舞，應該係一齊跳，係咪陳主任呀？
煎Pang：係呀！好靚嗰個，戴眼鏡，靚女mix嗰個，英文好叻，因為佢靚女我先去學。
蕭公子：教英文嗰個嘛！鬧到我飛起。
煎Pang：因為我曳，Miss Chan捉咗我去跳土風舞，我細個係唔鍾意受人注目。
蕭公子踢爆：但係你嗰時好矚目喎！
煎Pang笑說：咁我嗰時曳啫！
蕭公子：嗰時早課上聖詩，全部同學準時返學，佢都會俾人嗌名叫企出出面，全校人就望住，罰咗喺度，左手按嘴右手拉耳。
煎Pang：所以，嗰時我唔係好鍾意自己個名，因為罰抄自己個名，好多筆劃，我陳展鵬……好多嘢我都唔記得咗，總之我唔鍾意喇！不過係幾開心！

■蕭正楠與陳展鵬早前返母校谷劇，大受歡迎。
資料圖片

■蕭正楠（左）當年與麥浚龍爭新人獎，鬧出不少是非，令蕭上了一課。
資料圖片