阮兆祥在《歡樂今宵》中訓練有素，搞笑和執生本領也在那裏浸淫。攝影：陳順禎

阮兆祥在螢光幕上擅長發放笑彈，在劇集《公主嫁到》中飾演長子金多福，舉手投足都令人發笑，這全靠他的樂天性格讓他在事業上找到定位。祥仔視當年參演的《歡樂今宵》為少林寺，幾年間像海綿般浸淫，磨練出喜劇潛能，時至今日獲公司委以重任，不枉他在無綫捱了 20個年頭才看見出頭天。
撰文：卓寶花

英俊小生不一定走紅，擁有潛能耐力才是讓演藝生涯持久之道，要得到觀眾認同務必花時間裝備自己。阮兆祥每個角色表面上都嬉皮笑臉，卻往往令觀眾留下深刻印象，從過往《皆大歡喜》、《溏心風暴》、《家好月圓》甚至《荃加福祿壽》等都可看到他擅長的戲路。祥仔今次在《公主嫁到》中飾演的金家長子金多福鬼馬生動，還帶領到劇中兄弟陳豪（飾金多祿）和黃浩然（飾金多壽）入戲，令金家戲份生色不少。

「溝」掂李詩韻

祥仔與黃浩然及飾演其老婆阮小玉的李詩韻均是首次合作，初時他有所憂慮，尤其與李詩韻演夫妻，祥仔說：「起初要時間摸索，然後就要『溝』佢，係溝通，令佢可以融入當我係屋企人先，要得到佢信任，咁再做夫妻戲會自然好多。但講到有火花就一定係金家三兄弟，我哋三個有好多設計，當然佢哋知道喜劇係我擅長嘅戲路，度計方面我會主動啲，將三個人節奏混埋一齊。」
幕前笑騎騎，誰又知祥仔原來有雙重性格，他說：「我本身好樂天，但又有雙重性格，我係雙子座， 1990年加入無綫後做過好多主持節目，後來有段時間續約，公司問我有乜要求，我話想加入《歡樂今宵》，當時啲人視呢個節目係少林寺，就喺嗰幾年好似海綿咁浸淫。」
直至早前《溏心風暴》和《家好月圓》，祥仔的喜劇潛能廣受認同，自始機會不斷，雖然花了近 20年才在演藝事業上找到定位，祥仔並不介意，皆因他視自己為新人，他笑說：「我做主持出身，冇乜受過喜劇訓練，覺得自己做戲方面都係新人，只可邊學邊做，心目中司棋姐同琴姐先係勁量演員。」

（左起）祥仔、陳豪和黃浩然金家三兄弟默契十足，綻放火花。

在《公主嫁到》中，李詩韻和祥仔扮演夫妻，開工前要溝通混熟。劇照

視志偉為老竇

祥仔自覺在演戲方面尚屬新人，一直在邊做邊學。

祥仔與曾志偉合作後，令他學懂凡事不要計較，享受過程最重要，更視志偉為阿爸，祥仔說：「我都想成為年代嘅回憶，以前有《香港 82》回憶，志偉做《獎門人》做咗 10年，我同王祖藍、李思捷做《荃加福祿壽》只得一年，仲係成長期。」
場地： AMANI BAR HK（中環）
髮型： Eddy kwong of W1

笑聲之最
最好笑同劇男演員　陳豪

「當佢知道個角色係點時，佢設計得好好，加啲自己元素，用啲佢嘅喜劇感，例如鬼馬表情，本身阿 Moss（陳豪）畀人感覺好硬淨，冇諗過可以搞笑，所以做少少已經好出。」

最好笑同劇女演員　陳法拉

「法拉進步咗好多，搵到自己自然嘅一面，啲笑位係不自覺流露出嚟，加上角色同佢本人幾相近，比較男仔頭、錫朋友，所以做到嗰種感覺。」

最好笑自己演出的一幕　醉唱宮心計

電視圖片

「有一場講我哋三兄弟飲醉酒，喺街上唱歌，首歌仲要係《宮心計》主題曲改編嘅歌詞，我哋做嘅表情好好笑，又扮老虎，跟住撞見鍾嘉欣以為我哋撞鬼，呢場戲三兄弟嘅節奏演繹得幾好。」