琴姐表示拍劇期間台前幕後相處愉快，每日開工都像家庭聚會一樣。
攝影：陳志嵐　場地：圓方

家有一老，如有一寶，劇集如有老戲骨撐場，自然也相得益彰。李香琴在無綫劇集《公主嫁到》正好發揮老薑威力，碰上具喜劇感的後輩陳豪和佘詩曼，立即引爆連串笑彈。琴姐為念數白欖對白，不惜貼錢打工，拍劇期間出動私伙靚藥材補中氣。　撰文：比華利

現年 78歲的李香琴永不言休，旨在帶給觀眾歡樂，早前她捱更抵夜趕拍收視大收的無綫劇集《公主嫁到》，監製梅小青特別恩准琴姐可以提早在凌晨 3時前收工，同劇一班年輕輩演員陳豪、佘詩曼、關菊英、阮兆祥和黃浩然等，戲裏戲外都視琴姐如角色金太夫人一樣尊敬，待她如珠如寶，所以琴姐表示拍這部劇零舍開心，辛苦絕對值得。

開工時，關菊英總會預備靚湯給契媽琴姐，難怪獲琴姐大讚有孝心。

對於有份主演的劇集《公主嫁到》收視報捷，琴姐自然飲得杯落。

火酒抹膠水甩頭髮

琴姐與後輩陳豪等合作愉快，論到搞笑功夫，精靈的琴姐當然不輸蝕。　電視圖片

古裝劇的造型和戲服特別華麗，不過黐頭套的滋味並不好受，加上搶眼頭飾和厚厚的髮髻，令頭套百上加斤，大公主陳敏之年紀輕輕都大呻導致頸骨移位，對於近 80歲的琴姐來說，當然更辛苦，但專業精神驅使她撐下去，她日前接受訪問說：「髮髻好重搞到頭痛，戲服又要束腰，真係幾辛苦吓，不過拍得開心，乜都冇計啦。」
因為拍古裝要黐頭套，所以琴姐每晚收工都要花較長時間落妝，她說：「膠水黐得好實，為咗要抹走啲膠水，我要用火酒抹，好彩我啲皮膚都夠好，夜晚抹完紅晒，瞓一覺第二朝又白番晒。不過用得火酒多，額頭啲頭髮有啲甩，至拍完部劇，兩、三個月先生番出嚟。」
《公》劇的押韻對白如數白欖，琴姐卻精靈一口氣琅琅上口，她說：「念呢啲押韻對白要一氣呵成，念時一定要夠中氣，斷咗就唔搞笑。」

乖孫公主爭獻殷勤

為了熟讀劇本和對白，琴姐會犧牲睡眠時間，不過她中氣十足全靠出動私伙貴價冬蟲草燉湯和花旗參冲水，當然也不少得契女關菊英的自家靚湯，琴姐說：「同阿英開工好好，佢煲開靚湯梗預我一份，好有孝心。」
琴姐扮演的金太夫人在金家地位崇高，性格敦厚善良，媳婦關菊英、孫兒陳豪、阮兆祥和黃浩然都對她盡孝，鏡頭前搞笑，鏡頭後依然溫情洋溢，琴姐說：「導演叫停，三個乖孫服侍周到，阿 Mo（陳豪）明明坐住都彈起身讓坐，黃浩然就行過嚟扶我，祥仔就擔定張凳過嚟，三公主阿佘就爭畀錢請食消夜，個個都咁乖。」

戴頭套釣魚等埋位

捱眼瞓等埋位拍戲，但戴了頭套不能躺下小休，琴姐笑言惟有「釣魚」，她說：「頭套太重聚晒喺後腦，我哋咪惟有『釣魚』瞌眼瞓，阿英最忍得眼瞓，佢有時會埋嚟陪我傾偈。」

笑聲之最：最好笑同劇男演員　陳豪

「陳豪份人好幽默好有喜劇感，排戲時會為角色添加好多小動作，令觀眾睇得更爆笑。」

最好笑同劇女演員　佘詩曼

「阿佘好勤力，佢將連串精警對白消化，一口氣念出嚟，夠晒口齒伶俐，表情又鬼馬。」

最好笑自己演出的一幕　怒敲公主額頭

電視圖片

「呢場戲講我難忍刁蠻公主兼孫媳婦阿佘猛蝦我啲屋企人，態度傲慢，我忍無可忍咪唔怕死，用手『鏗』佢個額頭。雖然係以下犯上，但情理我係長輩，教訓孫新抱係冇問題，劇情仲交代我事後嚇到暈咗。」