卡拉之星鄭世豪《星夢傳奇》暗示造假

噚日TVB用嚟捧自己藝員嘅歌唱比賽《星夢傳奇》,終於都播出,其實錄影時一早講咗鄭俊弘唱得好,不過出街網民聽到,尤其喺其他表演者比較之下,覺得佢唱得簡直超晒班!

咁鄭俊弘01年參加過《全球華人新秀歌唱大賽》,唱功當然有返咁上下啦!不過TVB入面,唱得好,其實又何止鄭俊弘一個人丫!如果真係以「唱得好」去評定入圍機會,又點解釋黃智雯會上到《星夢傳奇》呢個台呢?

TVB出名唱歌好,年紀同知名度同鄭俊弘差唔多嘅,仲有一位仁兄,就係近年《歡樂滿東華》環節「卡拉之星」入面嘅「侯活」鄭世豪,佢成日登台,出過唔少唱歌騷,有指佢係黑妹李麗霞位徒弟,成日跟佢去搵食,網民聽到TVB有個咁樣嘅歌唱比賽,都好想知點解「侯活」冇份呢?

鄭俊弘噚晚咁樣一唱成名,鄭世豪噚晚就喺微博話:「努力十幾年就係等合適機會,但也不一定是你的~大家近排不停問為何我沒入圍~其實我都開心既~因這是對我的認同及支持了~唱歌好聽的大有人在也應鼓勵。各位~星夢傳奇入選準則因有太多數要計,就是這樣!哈~做人果然不能太天真,繼續做好自己便已足夠~多謝大家!夠鐘睇Show~加油!」

每個比賽都有自己入圍準則,當然明啦,但唱歌比賽不以「唱歌」為本,好似黃智雯咁樣都入到去唱,又係什麼準則呢?唔使鄭世豪爆,都知唔關「唱歌」事啦。

呢一晚爆咗個鄭俊弘,網民讚譽之聲不絕,不過亦都有反面意見,話佢唱得唔算特別出色,只係有比較之下,毫無懸念拎最高分,如果網民真係咁識貨,佢就唔係今時今日先爆出嚟啦!其實TVB真係有好多唔同才能嘅藝員,若果TVB真係比機會佢哋發展所長,都係觀眾之福嘅!

其實鄭俊弘同鄭世豪曾經同台演出,就係宣傳神劇《天與地》時,鄭世豪唱歌,鄭俊弘彈BASS!陳豪、林保怡同黃德斌都係伴奏而已!


兩位都係唱得之人,點都好,加油!

鄭俊弘
網民讚爆鄭俊弘時,點解以前又冇留意佢呢?

鄭世豪
有上YOUTUBE聽鄭世豪唱歌,都知佢好唱得。

鄭世豪
好多人鄭世豪點解冇入圍,佢話自己太天真。

鄭俊弘
01年新秀到依家,12年了,一個藝員,其實可以等幾多個12年?

鄭世豪
鄭世豪喺微博講出對《星夢傳奇》嘅感想。

鄭世豪
如果《星夢傳奇》真係一個「歌唱」比賽,其實黃智雯根本唔會入到呢個比賽o掛?