最近曾志偉徵召退隱女星復出拍無綫新劇《Aerobic Girls舞室保衛戰》，原來該劇七位女星同樣命途坎坷，除了近日宣佈結束十二年婚姻的江欣燕外，連蟄伏十年的李若彤（Carman）亦受情緒病折磨！外表剛強的李若彤日前哭訴數年前在喪父之痛及情傷打擊下患上抑鬱症，一度想過自殺！被情緒病困擾五年，是她最黑暗的日子。
當年憑小龍女一角驚為天人的李若彤，事隔多年後，最近容光煥發出席無綫新劇記者會，成為當日焦點，誰都看不出原來Carman曾受情緒病折磨！03年與商人郭應泉拍拖後，Carman即淡出娛樂圈，她日前在金鐘接受本報專訪時，坦言拍拖多年都沒結婚打算：「只係拍電影、電視好辛苦，好攰想休息，我係戀愛大過天嘅人，當時另一半亦唔知乜原因唔想我做，慢慢就冇做。」當年Carman事業正處高峯期，但她只諗到另一半，問到可有後悔？她直言：「過去十幾年我係冇後悔，不過如果有得畀我重新行過，我絕對唔會咁樣行。」
李若彤日前忍淚道出自己受情緒病困5年。
為愛情煞停事業，可惜並未開花結果，Carman於08年與男友分手，過了一段行屍走肉、沒靈魂、沒目標、沒動力的日子，花了長時間去忘記、適應，情緒不太好，接着09年爸爸中風，兩種傷痛終令Carman崩潰，患上抑鬱症！談到這段時期，Carman忍不住流淚說：「過去五、六年係我人生中最黑暗，感情分開係潛伏點，跟住爸爸病係爆發點，爆發到有情緒病，有諗過自殺！企喺街，無端端諗行出馬路會點呢？有衝動想做呢樣嘢，係唔知點解。幸好上天畀個姨甥女我，湊佢係我最開心嘅時間，亦係佢救咗我，多謝妹妹畀我做媽媽嘅經驗。」
■李若彤曾於搭飛機時巧遇周潤發，還被對方點醒。微博圖片
【眼泛淚光】
【抹鼻忍淚】
■李若彤講到喪父時，情緒激動不已。ＤＶ圖片
幸發哥當頭棒喝
及後Carman睇醫生治療，食藥半年曾治癒，但停藥後半個月因爸爸離世令情緒病復發，再食兩年藥，飽受病困五年之久的Carman說：「早前至覆診，我o依家唔錯，練緊EQ，醫生都話拍番劇好，工作有寄託。」Carman積極面對自己的病，不介意被人知道：「有醫生話當人唔介意畀人知自己有情緒病，會容易好番，我都唔介意畀人知，同家人講要包容我，除咗食情緒藥，姨甥亦係我一個藥方！」
過去十多年，Carman在內地也曾拍劇及做商演，不過亦推掉很多劇，曾說過再沒拍戲衝動的她，以冬眠來形容自己：「瞓夠咪起身囉！其實係舊年11月喺大陸工作返港機上遇到發哥（周潤發），佢問我仲有冇諗拍戲？我話冇，佢話人點可以唔做嘢?，佢講完我突然醒一醒。佢仲問我有乜興趣？我話鍾意運動煮嘢食，佢就話去考個健身牌，或好似謝寧咁，將興趣發展成事業。」
■李若彤日前在金鐘接受本報專訪時，打開心窗講述患上情緒病的心路歷程。
■如果可以重來，李若彤自信會活得更好。
對愛情再沒憧憬
那時仍患有情緒病的Carman將湊姨甥女視為寄託，亦為姨甥報讀兒童心理學，當晚她將發哥的說話沉澱，但依然沒想過再拍戲，Carman說：「直到考試前幾日，從來冇搵我嘅志偉搵我，十年前同佢拍劇有好多開心回憶，當時助手都話未見過我咁開心、咁多笑容，嗰晚我發夢拍戲感覺好開心，早年我都會發夢拍戲，但感覺唔開心，好似係上天有咗安排（復出），亦好多謝發哥引導我去思考。」
問到對感情可仍有憧憬？Carman直截了當的說：「冇！即刻答到你，早兩、三年都有憧憬再拍拖、有穩定感情或結婚，慢慢冇呢個諗法，最緊要自己開心！o依家反而覺得有另一半煩喎，要交代又要擔心佢，舊年有朋友話我冇婚姻緣，我冇唔開心仲好釋懷，我好享受??家生活。」對於新劇拍檔江欣燕離婚，李若彤經理人表示人家的私事不便發表意見，最重要欣欣開心。
採訪：羅美倫
攝影：仇志德
髮型：King Hui of IL COLPO
化妝：Ivan Lee
駐顏有術任估唔嬲
「我真係唔係39歲」
■新劇中，陳嘉寶（左）飾演李若彤角色的少女版。資料圖片
復出拍劇難免被人評頭品足，被爆39歲又被指樣子繃緊，Carman表示早有心理準備：「其實我真係唔係39歲！入行以嚟冇公佈過，我唔介意啲人點猜測，你話我50都得，佢點講都影響唔到我，我亦學習緊唔受佢哋影響，俾人評頭品足唔覺有問題，就算有狗仔隊跟咪跟囉，我都照返屋企。拍劇可能會冇咗自由，朋友話享受自由自在就唔應該在意人點睇你，係喎！自由自在係喺自己思想上，好似《伊索寓言》嘅《父子與驢》故事，永遠取悅唔到所有人，自己心知就得。」
Carman對今次拍劇沒特別期望，亦沒想過往後會否繼續拍，最重要享受開心過程：「如發現麻麻哋咪唔做囉，開心就繼續做。」即使七女同當女主角，她都沒有壓力：「就算有比較都係外邊比較啫，自己唔比較就得。」
人物誌：小龍女最經典
【青澀少女】
90年電影《浪漫殺手自由人》
李若彤有十兄弟姊妹，排行第七的她作風低調。入行前任職空姐的她，17歲時拍廣告獲賞識，90年正式出道與任達華合演電影《浪漫殺手自由人》，95年於無綫劇集《神鵰俠侶》中扮演小龍女大受歡迎。後跟年長20年的富商郭應泉相戀，淡出幕前，可惜於08年分手收場，她亦轉戰內地市場。
短髮活潑
94年電影《青春火花》
出塵脫俗
95年無綫劇集《神鵰俠侶》
反串琴操
96年電影《大內密探零零發》
分飾三角
96年無綫劇集《天龍八部》
鴛鴦出浴
97年電影《G4特工》
瞓身玩Game
01年錄影無綫《宇宙無敵獎門人》
突然晒料
01年出席「十大電視廣告頒獎典禮」
性感舞孃
08年出席上海《舞林大會》
話你知：Aerobic Girls情路坎坷
（左起）葉蘊儀、李若彤、李麗珍、江欣燕、陳慧珊、張慧儀、袁潔瑩
曾志偉被指愛打救坎坷女星，恰巧他監製的無綫新劇《Aerobic Girls舞室保衛戰》，就由一班走過人生崎嶇路的女星撐起，李若彤哭訴曾患情緒病，其他女星亦各有各慘。
葉蘊儀
22歲與香港玩具業富商陳柏浩閃婚並退出娛圈，傳懷第2胎時丈夫有外遇，00年結束5年婚姻。有指她復出後仍入不敷支。
李麗珍
96年與音樂人許愿結婚，育有一女，婚姻只維持4年。後曾介入髮型師馬桂燦的婚姻，並爆出情色醜聞。現情歸潘源良。
江欣燕
01年與吳積遜結婚，多年來出雙入對，表現恩愛，不過近日竟宣佈十二年婚姻破裂，正辦離婚手續。欣欣不願透露離婚原因。
陳慧珊
01年與科大教授鍾偉明離婚，06年與前夫好友兼經理人鍾家鴻結婚育有一女，去年丈夫申請破產，即宣佈復出搵錢養家。
張慧儀
曾被指介入黃杏秀與陳百祥的感情。03年遭未婚夫霍紹裘毆打至報警求助，後退出娛圈轉營果醬批發生意，在北京領養兒子Hanson。
袁潔瑩
90年與音樂人徐日勤相戀。曾因工作及感情壓力患厭食症，體重只剩77磅。近年傳轉性向，05年與富家女阮嘉欣傳緋聞。