《賭城風雲》拍攝 謝霆鋒終開腔避談「迅鋒戀」

謝霆鋒近日同周迅爆出「迅鋒戀」,雖然雙方經理人已經否認,但當事人霆鋒及周迅,仍未有親身為緋聞解畫,不過工作如常,近日霆鋒同周潤發及杜汶澤等人,拍攝由王晶執導、劉偉強監製嘅新戲《賭城風雲》。

霆鋒噚晚同杜汶澤、孟瑤等人喺葵芳一間酒樓拍外景,霆鋒跟住打扮似大佬嘅無綫「卡拉之星」王俊棠去酒樓講數,而霆鋒著住背心、外套同迷彩三角骨褲,再襯埋副黑框眼鏡,外形唔多似古惑仔,反而似有為青年,真係搞笑。

現場有好多街坊圍觀,逼到水洩不通,而酒樓外面塊玻璃,貼住「提防爆炸 小心玻璃」,原來噚晚有場的士撞入酒樓嘅戲,不過演員冇份演出。

至晚上11點幾,霆鋒喺好多人護送下上一部白色車換衫,換完就坐番自己車閃人,不過佢冇答任何嘢,只係揮揮手同記者講拜拜。另外,有好多消息傳出,話霆鋒喺北京有私竇方便同周迅見面,而霆鋒嚟緊又缺席內地嘅《快樂男聲》評審,不過助手話係因為有工作,唔係要避緋聞喎。

此外,霆鋒今日再喺葵芳拍戲,見佢心情幾好,問到同周迅嘅緋聞,霆鋒終於開口,佢笑笑口話:「唔講喇,都冇嘢講!」

謝霆鋒、杜汶澤、孟瑤拍《賭城風雲》外景
謝霆鋒聞「迅鋒戀」,話:「唔講喇,都冇嘢講!」

謝霆鋒、杜汶澤、孟瑤拍《賭城風雲》外景
孟瑤

謝霆鋒、杜汶澤、孟瑤拍《賭城風雲》外景
的士撞爆玻璃。

謝霆鋒、杜汶澤、孟瑤拍《賭城風雲》外景
阿澤做咩咁嘅樣?

謝霆鋒、杜汶澤、孟瑤拍《賭城風雲》外景
劉偉強同霆鋒對戲。

謝霆鋒、杜汶澤、孟瑤拍《賭城風雲》外景

謝霆鋒、杜汶澤、孟瑤拍《賭城風雲》外景