杜汶澤為拍新戲《豪情2》而積極喼弗，經過逾半年時間，終於有成績，近日阿澤頻頻喺facebook貼晒肌照，仲越影越低，見到人魚線之餘，幾乎見埋「小澤」呀。而呢張照片一出，又惹來瘋傳，閒閒哋已經有超過三萬個Like，唔少網民及阿澤朋友都留言激讚，有人仲話：「影低啲影低啲！」真係搞笑！

阿澤繼續分享減肥及飲食心得，佢話：「一日五至六餐，忘記以往午餐晚餐的觀念。記住吃，是為了吸取能量和營養以維持生命，而並非為了享受。早上可吸收澱粉質如麥片或麥包，一星期可以有一天休息，並非大吃大喝，而是吃一些相對美味的食物，例如吃頓牛柳或日本魚生之類。和油糖說再見，只用蒸、煮、烤來烹調食物。魚雞甚至牛可以，豬羊鴨鵝少吃為妙！別相信減肥產品，相信自己的意志。」

除咗節食喼弗外，當然唔少得做運動啦，阿澤就話：「很多人對運動存有恐懼，以為一定要狂跑，怕辛苦，放棄了。至於我自己，並沒有跑步。每天急步行一小時，中途加插五分鐘快跑。That’s it. I can , you can !」以上係阿澤個人心得，大家不妨參考下。

另外，阿澤近日去咗溫哥華，他鄉遇故知，喺當地同移居溫哥華嘅靚媽咪李婉華喜相逢，年逾40嘅婉華依然keep得好好，玉臂纖幼，真係令人羨慕。

杜汶澤再晒肌照，加油呀﹗（杜汶澤facebook）

當然仲有要積極運動，佢就每日急行一小時，中間五分鐘係快跑。（杜汶澤facebook）

阿澤喺溫哥華同李婉華喜相逢。（杜汶澤facebook）