38歲的佘詩曼自與鄭嘉穎分手後Dry到龜裂，眼見身邊好姊妹個個加入「人妻俱樂部」，她不知幾恨嫁杏有期！冇拖拍何來歸宿？阿佘最近突然愛上畫畫，原來情傾藝術家，據知她近日搭上一名壁畫師，繪出一段畫筆情緣。
貌似台灣天王周杰倫的壁畫師，梳起辮仔不知幾型，日前還做阿四幫阿佘買畫具，再熟練地取「佘車」把物品放入車尾箱。還車匙之際，兩口子雙手緊握，阿佘成個「冧」字鑿上額頭，正式打爛4年「Dry」缽，夠晒啱「Key」！
自「佘穎戀」於2009年玩完後，阿佘自此遁入「Dry」門，乾足4年！雖然甩拖後依舊緋聞不斷，可惜全是冇米粥，仍未找到最愛的Mr.Right。畢竟已38歲，眼見好友湯盈盈、文頌嫻、姚樂怡與周家蔚等個個做晒人妻，阿佘唔急就假，其身邊好友説：「阿佘唔單只想拍拖，更加想結婚，佢話好鍾意小朋友，早已有生小朋友嘅打算！」
尋尋覓覓，阿佘終於有着落。上星期，她與一名貌似周杰倫的高大猛男在灣仔晚膳，夜遊同車斷正。這位翻版周杰倫身高6呎，頭戴Cap帽束起辮子，舉手投足散發藝術家氣質，當時阿佘還未現身，見他甘做阿四，拿着阿佘座駕的車匙，抽起一袋二袋物品取車，孔武有力。
對望雙手交纏
阿佘的白色雙門平治，「六呎周杰倫」似乎揸惯揸熟，見他熟練地打開車尾箱，將物品放進後籠，然後點煙「深呼吸」，等阿佘會合。未幾，阿佘兩手掏掏前來，兩口子站在車尾傾了一大輪，言笑晏晏，儘管阿佘戴上口罩，但見她眼眉都識笑，冧樣不言而喻！「六呎周杰倫」將車匙遞給阿佘之際，南北極磁場相吸，愈貼愈近，雙手交合，完成世紀一拖，阿佘不禁抬頭情深地望着男方，明顯甜到漏！「六呎周杰倫」把「柴可夫」重任交予阿佘，登車後直駛金鐘方向。
冧笑保密關係
阿佘的座駕在商場喪兜也找不到車位，打算出閘到另一停車場搵位泊車，怎料出閘時八達通突然失靈，要向停車場管理員求助，期間阿佘發現記者，「六呎周杰倫」大感驚訝，即時拉低Cap帽並戴上太陽眼鏡，慌死愛苗早謝。見慣風浪的阿佘見鎂光猛閃，為保護男方即笑晒問記者：「想點呀？」問到是否與朋友食飯，她爽快地説：「係呀！」但問到對方是否男友，除下口罩的她未有回答，但即時綻放燦爛笑容，冧到出晒面，其後便踩油絕塵而去。
數日後，阿佘又再出動，與兩名女友人到中環晚膳，未知是否新歡沒空，惟有退而求其次找同性攝時間。見她遊目四顧，明顯提高警覺性，最後攞出貼士給代客泊車，然後揸車送友人離去。而前日下午5時許，阿佘出席活動後雞咁腳仆往機場，再一支箭衝到櫃枱辦手續，可惜搞足40分鐘還未搞掂，見她焦急得踱來踱去打電話求救，可惜最終還是未能登機！雖然無奈「失機」，但阿佘發現記者後仍有禮地拗腰Say Hi，然後冇癮走人。
甜絲絲讚叻仔 搞裝修譜師生戀
事業有成，年紀唔細，阿佘也得安定下來找個伴。據知，身在美國的佘媽媽原本幫阿佘哥哥凑孫，因為孫兒已5歲，開始懂性，佘媽亦放心搬返香港與阿佘同住，不過她嫌「佘竇」黑麻麻，阿佘於是決定大裝修，為香閨增添藝術氣息，在朋友介紹下，認識身為壁畫師的「六呎周杰倫」，遂展開一段畫筆情緣！
據阿佘好友透露，阿佘明年1月返無綫拍劇，故急於在此前完成裝修事宜，二人起初只是談論裝修問題，後來發覺愈傾愈投契，阿佘在「六呎周杰倫」耳濡目染下愛上壁畫，並深深被對方的才華吸引，投其所好拜他為師。消息人士説：「喺個男仔身上，阿佘搵到愛嘅感覺，加上個男仔醒目，展開追求攻勢。阿佘去完內地掘金，錢對佢嚟講唔係問題，最緊要係開心，佢依家唔再對追求者拒於千里，佢哋嘅關係發展得唔錯！」致電阿佘，每提到新歡，她處處流露幸福之情，讚「六呎周杰倫」讚到天上有、地下無！
記者：記 佘詩曼：佘
記：同佢夜遊咁啱Key，係咪拍拖？
佘：（含羞地答）咩呀？老師嚟咋！咪亂寫呀！
記：佢幫你做埋阿四攞嘢喎！
佘：（自鳴得意）因為嗰晚買咗好多嘢，拎嘢梗係男士拎啦！哈哈！佢係一個畫師，亦係一個拎嘢師！
記：覺得佢有咩吸引你？
佘：佢好叻！畫畫我係低B組，希望佢可以提升我嘅興趣。
記：咁佢係咪你男朋友？
佘：（聲線變嗲）唔係啦！我嫁唔出唯你是問！
記：係咪心急拍拖？
佘：都想囉！依家想培養多啲興趣，所以學畫畫！
據知，除了「六呎周杰倫」外，身邊不乏觀音兵的阿佘大把人追，無論圈內外都有追求者，但「六呎周杰倫」才華洋溢，又生得高大有型，最重要是給阿佘初戀的感覺，難怪在爭奪戰中睇高一線！
學畫投仔所好 微博晒「愛」
為投壁畫師新歡所好，阿佘早於數個月前已開始學畫，更忍不住兩度在微博晒愛！今年6月，她將自己第一幅畫作上載至微博，並興奮留言：「第一幅畫完成了！好開心！」其「處女作」不但似模似樣，而且構圖充滿童真，看來有愛情滋潤的她心境亦「回春」！相隔4個月，她將第二幅作品上載至微博，但畫風明顯有很大轉變，更「畫公仔畫出腸」明言題目是「愛」！她在畫中的心形圖案附近，加了很多十字架及哈哈笑等代表正能量的圖案，看來對愛情充滿希望及信心。
為裝備自己邁向人生另一重要階段，阿佘近半年不但積極學湊B，更重拾久違了的廚藝，誓要練好十八般武藝，做個入得廚房、出得廳堂的賢妻！今年8月，她在微博上載自家製餐肉煎蛋飯照片，雖然菜式普通，但蛋煎得「黃白」分明，加上感覺Juicy，獲好友曹永廉大讚有酒店級水準！而她的湊B功夫亦極之了得，無論是洪天明的囝囝或錢嘉樂的囡囡，一樣可以舞得「Tup Tup掂」，BB冇扭計之餘，更在她懷中騎騎笑，絕對有好媽媽風範！
