佘詩曼開題:點解放煙花時射唔中天上星星呢?

IQ考考笑

無綫利誘咗佘詩曼回巢,出年就返娘家幫手拍劇。好咯!終於有個演技一流嘅花旦睇吓。阿佘呢個親生女今期仲話要開條好有童真嘅 IQ題考考大家,睇吓邊個夠佢叻喎!

田蕊妮:我好叻呀!

一知道要考 IQ題,阿田即時耍手擰頭話自己好蠢唔敢玩,最後幾經游說終於放膽一試。阿田竟然唔使一秒就答中,仲開心到跳起大讚自己:「嘩!第一次就估中呀!」

楊思琦:因為太高囉!

認真嘅思琦連玩 IQ題都非常認真,好緊張咁聽完問題後,佢反問記者:「係咪因為煙花同星星唔同高度,所以點都射唔中。話明放煙花,都唔係射星星!」呢個媽媽真係頂呱呱,最後當然係估唔中啦!

莊思敏:係咪嗰啲猩猩?

做慣司儀同 DJ嘅莊思敏,唔使一秒就搶答:「係動物園嗰啲猩猩,所以點射都唔中?」雖然佢轉數快,但今次真係天上嘅星星,諗多幾諗又俾佢答到喎!

黃德斌:俾多啲時間我諗。

扮晒冷靜嘅黃德斌,好有耐性聽晒個問題,亦好鬼認真咁解釋:「因為煙花唔夠高,所以射唔到。」聽落好有邏輯,但呢個唔係正確答案囉!

李思捷: OMG~~好瘀!

平時度橋玩人叻到死嘅李思捷,今次終於遇到難題,仲擺埋 AK47同咩雷射光上枱,最後都係答唔到要開估。思捷呀思捷,我哋呢個 IQ題係考大家幾有腦,唔係考科學物理呀!

佘詩曼開估:一閃一閃小星星~~歌都有得你唱啦!星星識閃嘛!