佘詩曼等愛
似「佘」非蛇，似「炯」非囧。無論是佘詩曼的感情生活，或是胡杏兒的演技，都予人無限錯覺。正當人人都只看表面的時候，兩位花旦決定走自己喜歡的路。
關於佘詩曼的感情生活，厚到連一本電話簿都數不完，因為傳聞中的她如蛇般對「獵物」出手夠狠，阿佘之名音同其義，貼切不過。究竟阿佘是剩女還是盛女？年逾30為愛而出招並無過錯，女人結婚生仔天經地義，有哪個女人不想有個好歸宿？但她內心深處着實不急，畢竟大把本錢，其實阿佘非「蛇」，為愛出招從來不狠：「當上天要派一個人畀你，你點都抵擋唔住，佢有冇錢冇所謂，最緊要開心！佢唔一定要成日氹我開心，因為始終都會攰，其實只要見到佢嘅時候，我會笑就已經足夠！」
不為金錢犧牲
阿佘的緋聞男友如陳浩民、鄭嘉穎及陳豪，甚至之前的內地富豪，位位都大有來頭，前三位是藝人，明白「食得鹹魚抵得渴」，但阿佘為與內地富豪的緋聞發聲明，撇「小三」之名，就只此一次，證明她真的生氣了：「呢啲係道德觀問題，第一係涉及第三者，第二係涉及法律問題，總之好無奈，嬲到爆！」
阿佘是有碗話碗的人，從不說謊，既然一早可養活自己，又何須靠有錢人過活？信心十足的她說：「我拍拖從來唔係Base on錢同佢嘅事業，我一早就有能力工作，可以支持自己嘅生活。既然唔需要擔心生活，點會仲為五斗米犧牲自己嘅感情呢？唔合邏輯囉！所以我依家就算要搵，都會搵一個真心鍾意嘅人！其實我好輕鬆，阿哥同細佬都結晒婚，阿媽有新抱有孫，要乜有乜，佢都唔理我啦！我可以做自己鍾意做嘅事！」
緣分上天安排
眼見一個又一個圈中好友嫁得好歸宿，連同期出道的郭羨妮亦嫁杏有期，阿佘心中早已打定底，相信緣分一到，擋也擋不住：「我上年已經知道Sonija（郭羨妮）名花有主，真係戥佢好開心！而我呢……我知道上天一早安排咗個人畀我，佢可能已經出現，又或者未出現，總之係乜國籍都冇所謂，只要我鍾意就得！」
儘管感情生活仍交不出一張亮麗的成績單，但阿佘的事業如日中天。即使不再是無綫親生女，對她又有何影響？阿佘說：「其實我冇離開TVB，只係用另外一個形式合作，嗰度依然係我娘家，完全冇離開嘅感覺！不過，依家真係會放多啲時間返內地拍劇，同香港雙線發展。我唔會放棄香港市場，因為呢度係我嘅家，但會唔會再攞視后就真係唔知，都攞過喇，冇所謂啦！」
後記:工作冇得「蛇」
阿佘貴為視后，但從來沒有懶過條「蛇」，開工拍劇和做訪問日夜無間斷，但一直沒有半句怨言。訪問當天，阿佘連踩四個訪問，連飲水時間都沒有，問她累不累？她氣若游絲說：「攰o架！但可以唔做咩？呢啲係我嘅工作！」
阿佘對愛情的要求很簡單，只要彼此快樂就足夠。
阿佘認為緣分由上天安排，不必強求。
胡杏兒升績
曾幾何時，胡杏兒的演技屢受批評，最近終憑《怒火街頭》中飾演的巴辣律師爭番啖氣，與鄭嘉穎連場鬥氣、鬥嘴及鬥出位，抵死的演出令人看得會心微笑。收視和口碑都較預期理想，杏兒卻不敢居功，反而每次遇到批評都會自我反省，她說：「依家嘅觀眾口味好難估，可能佢哋鍾意節奏明快嘅故事。喺拍攝過程入面，大家都好有默契，尤其嘉穎扮爛撻撻律師，角色上可以大膽創新，咁我就跟住佢去演，不過唔敢玩得太過火。可以有咁好成績當然開心，但係自己講對白有時太快，需要調節吓，拍續集嗰陣會努力改善，不過都係等公司公布啦！」
杏兒預告《怒》劇會開續集，演出機會不斷，早前更有幸參與杜琪峯執導的電影，遇上靚仔兼好戲之人任賢齊，她直言是一次難得經驗，在杜Sir身上獲益良多：「我見識過杜Sir鬧人喇！好彩唔係鬧我，佢好用心去教演員，叫我抹走晒十年嚟嘅演出經驗，要用全新嘅我去演個角色，仲提醒我好多連自己都唔知嘅小習慣，原來我每次講對白前都會笑一笑，有時仲不自覺咁眨眼！聽完之後，真係覺得上咗寶貴一課！」
深得高層歡心
如此聽教聽話，難怪杏兒深得無綫高層樂易玲歡心，早前樂小姐揚言佘詩曼離巢後，最睇好五位花旦上位，杏兒亦榜上有名，她說：「唔好咁講！仲有好多人，大家都有機會，樂小姐個個都錫！」對爭視后不敢寄予厚望的她解釋：「攞獎呢啲睇得好化！我承認做視后係每個女演員嘅目標，但每年演太多角色，擔心分薄咗啲機會，又怕觀眾睇得多會厭，所以好難講！」杏兒希望不停改進，令演技更上一層：「其實我有聽意見，觀眾話我做得唔好就會檢討，亦唔會介意，冇批評就唔會有進步！」
感情專一靠Feel
不過杏兒近期的心情大跌Watt，全因最近被雜誌偷拍屋內一舉一動，覺得私隱沒有保障。杏兒只希望事件可以盡快過去，她沒好氣地說：「我唔想成日將佢（黃宗澤）個名掛喺口邊，始終各有工作，如果喺公眾地方行街，畀人影到都冇辦法，惟有嘆句自己樣衰！但畀人咁影（偷影）好慘，依家返到屋企好似坐監一樣！」一直以來，杏兒的感情世界都很專一，與黃宗澤幾乎打風都打唔甩，她承認揀男友全憑感覺，不會被金錢利誘：「咁多年嚟當然有男仔追過，但我好衰，如果感覺到人追我會即時落閘，冇詳細了解對方係咪富二代！冇Feel嘅話，只係出街飲杯嘢都覺得好無聊！」
後記：奪獎感「杏」運
一向好戲的阿佘演「花家姐」吃力不討好，反而杏兒初入行時，憑在《流金歲月》飾演的智障人士奪得「飛躍進步女藝員」獎，她自覺是幸運兒：「大家對一個新人要求冇咁高，做好少少已經覺得你好勁，但做耐咗，觀眾指標就會愈嚟愈高。」
演出機會不斷的杏兒，希望事業上更進一步。
杏兒對爭視后不敢寄予厚望。
視后寶座爭櫈仔
視后寶座向來是無綫花旦覬覦的一塊肥肉，當然不只阿佘與杏兒二人之爭。放眼望去的芸芸花旦中，今年鍾嘉欣的演技深受認同，有望問鼎視后！
鍾嘉欣
演慣乖乖女角色，略嫌有所限制，但在早前播畢的劇集《點解阿Sir係阿Sir》中，一場聲嘶力竭的喊戲感動觀眾，成功擺脫花瓶影子，被看好憑Miss Koo一角封后。
徐子珊
曾於07年奪得「飛躍進步女藝員」，雖然被無綫高層樂易玲力捧上位，可惜今年主演的劇集反應麻麻，播映中的《團圓》收視普通，在《洪武三十二》中又不及江若琳搶眼。
楊 怡
浸淫電視圈多年，演技有目共睹，可惜似乎總是欠缺些運氣，《魚躍在花見》未能使她大放異彩，而在《點解阿Sir係阿Sir》中的演技未見突破，風頭被鍾嘉欣蓋過。
陳法拉
雖然劇接劇，但其感情生活奪去大家對其演技的關注度，《女拳》中的戲份又不及劉璇，至於《誘情轉駁》中的鋼管舞搶去演技的焦點，不過去年奪得「最佳女配角」的她，實力仍不容忽視。
陳茵媺
自參演電視劇以來，演技有明顯進步，努力向一線花旦位置攀爬，可惜今年作品不多，惟有期待即將播出的《真相》，能讓人察覺其實力，在競逐視后上應算是陪跑一族。