做演員也好，做歌手也好，有誰不「恨」 攞獎？只不過很多時候都是「恨」多過「攞」。近期在劇集《情越海岸線》中飾演「女神」的李詩韻（Selena），曾視獎項為目標，結果壓力爆煲，心情跌落谷底。幸好經歷多了，人也看開了，現在李詩韻已把「獎項」二字拋諸腦後，寧願把握時間好好演活每個角色。要拍劇時盡情享受工作，無須工作時盡情旅遊。難怪今天的Selena笑也笑得開懷一點。

撰文： Emily Tsui
攝影：Alvin Luk
髮型：Jay@Hair
化妝：Synni Tam
服裝：Ted Baker
美術：Sing

「利用」親友

Selena在《情越海岸線》中飾演的Heidi是個萬人迷，更是黃浩然和陳展鵬眼中的「女神」。不過這位「女神」並非善男信女，她為求達到目的，連身邊最親的人也可以出賣。她說：「Heidi係個不太好的女仔，好有野心，因為佢好想出人頭地，所以身邊的家人朋友，甚至展鵬都會畀佢利用，令到佢可以達到目標，例如係住半山。」

她又表示這角色非常真實，是現今競爭激烈的商界寫照。「身為一個商界女強人，很多時真的會為求目的不擇手段 。有時覺得只要唔係傷天害理， 唔係殺人放火 ，就可以掩住良心做人，就算係犧牲少少都無所謂。 」

劇中Selena為求目的更會情挑富商，本來富商一角是由高鈞賢飾演，但人算不如天算，拍攝中途高鈞賢因腳傷需易角，監製找來Selena前度鄧健泓（Patrick）頂上，Selena稱：「監製打畀我話想換Patrick，問我介唔介意，我覺得好Sweet，冇諗過公司咁重視我感受。」幸好二人再見亦是朋友，就算拍攝Selena口中「好激」的戲分，都絕無尷尬。

真人版「沈佳宜」

Selena戲內扮女神，求學時期追求者眾，原來她在真實生活中也曾成為男同學心目中的「沈佳宜」，其中一位男同學的追求方式更非常爆笑。

Selena大笑着說：「那次經歷真係好深刻，記得讀三四年班時，有個肥肥哋的男同學暗戀了我很久，有一次，我同佢在學校走廊迎面而行，點知佢行到我隔籬時，突然擰轉個頭錫我，嚇到我即係用“Matrix”的姿勢巧妙地避開佢個嘴，佢行動失敗後就走開了。」年紀輕輕就魅力沒發擋， 果然不愧為最上鏡小姐。

問到Selena的初戀男朋友用甚麼方法成功奪得她的芳心？原來她的初戀男朋友不但才華出眾，更貌似《龍珠》內的角色「杜拉格斯」。她說：「哈哈！那時我覺得『杜拉格斯』好靚仔！佢好有才華，會畫好大幅好靚的畫，然後叫其他同學傳畀我。有時仲會親手整蛋糕畀我食，那些蛋糕全部整得好專業，有酒店水準。當時真係覺得好Sweet好浪漫。」

曾經「恨」攞獎

Selena入行10 年，演過不少深入民心的角色，更多次獲提名「最佳女配角」和「飛躍進步女藝員」，可惜每次都和獎項擦身而過。Selena坦言曾經因失落獎項而心情低落，更曾承受極大壓力：「曾經有段時間好恨攞獎，將獎項睇得好重要。連續幾年都有提名，覺得自己同獎項好接近。點知期望愈大，失望就愈大。」Selena表示，當時情緒低落得連身邊的朋友也為她擔心，令她醒覺長此下去不是辦法，決心改變自己的人生態度。

Selena堅定地說：「我知道咁樣做人係唔得，一定要識得放鬆，要對自己好一點！」要放鬆心情，最好不過的方法就是去旅行。因此Selena 現時會把握機會出走旅遊，趁着空餘時間嘆世界。她表示：「我的心態已經唔同以前，依家係好期待每一個角色的來臨，我會去諗個角色有咩得意的地方，有無挑戰性，而唔係去諗拍完有無獎， 賺唔賺到錢。以前好怕無Job做，依家反而覺得放假係好事，因為我可以去旅行 。」

享受人生

「塞翁失馬，焉知非福」這句說話是Selena的座右銘，她更重提起當年選美五甲不入的往事。她淡淡然說：「其實人生好多事都係Blessing in disguise。好似以前我選香港小姐五甲不入，但後來我得到好多演出的機會，以前會好計較失去任何一個機會，依家我唔會睇得咁重，會睇遠一點。失去一樣東西，咪享受身體其他事物囉！入行10年， 覺得好多事都係過眼雲煙，呢一刻可能好好，但幾個月後可能就咩都無晒，所以做人最緊要係識享受。 」

獎項其次，用心演好每個角色才是最重要。Selena在《大太監》中飾演的「婉太嬪」雖然戲分不多，但她憑着收放自如的演技成功獲得各界好評，令她得到前所未有的滿足感。Selena說：「無諗過反應咁好。雯女（鄧萃雯）同雪姐（謝雪芯）都在微博同短訊中讚我做得好，台前幕後都給予我好大鼓勵。我真係覺得好開心 ，原來唔一定要做主角先有人留意，就算無提名無獎， 得到大家的欣賞就已經好滿足，所以獎項其實唔係真係咁重要！」