陳豪同陳茵媺（Aimee）呢對可以話係模範夫妻，人前表現恩愛，結婚兩年又已經生咗兩個仔Aiden同Nathan，幸福又美滿！
之不過陳豪要努力賺奶粉錢，湊仔重擔就落喺Aimee身上。據知Aimee今年2月生完Nathan之後，湊仔湊到脾氣暴燥，多次攞陳豪嚟出氣，劇接劇的陳豪為了爭取時間休息，最近就經常返回將軍澳都會舊居休息，而Aimee同兩個仔就留住大埔比華利山。多個B未習慣啫，陳豪好快返屋企啩！
租將軍澳站新竇
週日（3日）陳茵媺出席完活動後，獨自返回將軍澳的服務式住宅星峰薈。
陳豪同陳茵媺前年12月誕下大仔Aiden，自此陳茵媺已停拍劇，只係拍吓廣告出席吓活動，陳豪主力搵錢養家，而一家三口經常在人前大晒幸福，的確令人羨慕。
暫住調景嶺舊居
有傳陳豪頂唔住兩個仔的扭計聲滋擾與及老婆的產後燥底，所以決定暫時搬返調景嶺舊居。
陳茵媺生完第一胎堅持抱B，曾搞到左手患筋膜炎，亦成為佢推無綫開劇理由。
2月Nathan出世後陳豪接老婆出院，當眾咀嘴幾咁恩愛，可惜之後要暫時分居。
細仔Nathan出世兩日，陳茵媺已在微博po相晒幸福。網上圖片
今年 2月陳豪兩公婆帶大仔 Aiden到九龍塘貴族幼稚園面試，當時 Aimee仍腹大便便，認真有心！
一站之隔
陳豪婚前在調景嶺置業，但婚後已甚少返回舊居。
陳豪同陳茵媺各有新竇， Aimee則租住將軍澳星峰薈，兩地只相隔一個港鐵站。
婚前半同居
陳豪同陳茵媺未結婚前，曾以 2萬 2千元租住深井碧堤半島 1,200呎向海單位，進行試婚生活。
婚後住豪宅
婚後搬到大埔比華利山居住，估唔到因為生咗兩個囝囝搞到陳豪要暫時搬竇。
影響情緒
至兩個多月前Aimee再誕下細仔Nathan Lucas，兩公婆固然十分興奮，但據知 Aimee產後壓力非常大，脾氣變得暴燥之餘，亦好不滿陳豪回家後未有幫手湊仔；而陳豪忙於拍劇背劇本，卻時常被細仔的喊聲同扭計聲滋擾而影響情緒。
早前拍攝《水髮胭脂》，以至未播映嘅《陪著你走》同《鬼同你OT》都令陳豪十分吃力，加上陳豪即將於下週開拍新劇《潮流教主》。為了爭取休息時間，陳豪決定暫時減少回家，培養工作情緒！
據知陳豪已搬離大埔比華利山，暫住他在 06年以 368萬買入的調景嶺都會駅舊居（已升值至約 700萬），住近將軍澳電視城方便開工；但據知陳豪舊居其實已給了胞兄及女友居住，為寧靜陳豪同阿哥同迫一屋亦冇所謂；而週日（ 3日）陳茵媺出席完活動後，則坐車返回將軍澳的服務式住宅，兩人各自有私竇，只一站之隔距離，可見茵媺亦想趁空閒見吓陳豪，不過已搬離比華利山的陳豪，會唔會少咗時間見兩個寶貝仔呀？
上週二（上月 28日） Aimee獨自到中環購物，穿着黑色背心、橙色外套的她睇嚟仍未修身，被問到會唔會再追多個女，佢就用英文回答：「 I don’ t know！」係囉，生兩個已經要半分居喇，都係咪再生住喇！
陳茵媺上週二（28日）獨自到中環濕平，集中火力買 BB用品，被問到仲會唔會追多個，佢就用英文回答：「 I don’t know!」
陳茵媺形象好，好多品牌都鍾意搵佢宣傳，週日剛坐完月的陳茵媺便急不及待復出。
連拍4劇
陳豪生完大仔Aiden後已連拍3劇，養頭家係要辛苦啲，想有番啲空間都好正常啫！
啱啱播完《水髮胭脂》，其實陳豪已經拍完《陪著你走》等播，套劇講胡杏兒因一場意外而盲咗，前男友陳豪卻不離不棄，鼓勵佢參加馬拉松，勵志嘢！
《鬼同你OT》顧名思義係鬼故、係喜劇，講胡定欣俾手機電死，靈魂附身喺田蕊妮身上，陪陳豪返工。死咗都仲要返工？邊個笑得出？
《潮流教主》會喺今個月開鏡，陳豪飾演時裝雜誌老總，會唔會好似皇阿媽咁惡死就未知，淨係知陳豪個白髮造型，真係潮人至識欣賞！
陳茵媺有勁敵 無綫仲有好多生仔機器
陳豪、陳茵結婚兩年就生咗兩個可愛囝囝的確好生得！其實電視台都幾多好生養夫妻。
錢嘉樂 湯盈盈 保持神秘
錢嘉樂同湯盈盈 12年結婚時，湯盈盈已佗住囡囡，翌年 3月錢凱晴比預產期早咗成個星期出世，錢嘉樂仲陪住盈盈入產房兼為囡囡剪臍帶。今年 4月湯盈盈喺微博宣布再有喜，o依家已佗 B四個月，湯盈盈未有停工，仍為無綫拍攝節目；至於呢一胎係仔定女，佢哋就保持神秘感，可能要到 BB出世至揭曉喇！
洪天明 周家蔚 連追兩仔
12年拉埋天窗嘅洪天明同周家蔚，結婚未夠 1年就剖腹誕下囝囝洪大仁，洪大仁出世重 7磅 6安士，樣貌似爺爺洪金寶；當時周家蔚已公開同老公嘅生仔大計，決定兩年內再生一個。皇天不負有心人，上月底周家蔚喺養和醫院再誕一子 JT，重 7磅 11安士，可喜可賀。
黃浩 徐淑敏 速生三女
要數最生得一定要講徐淑敏（ Suki）， 09年嫁俾比自己年長 12年嘅飲食業才俊黃浩，翌年 3月誕下女兒黃心瑤， Suki即減少娛樂事業。 11年 9月她再度產女，名黃心柔；有心有力，上年 8月 Suki剖腹誕下第 3名女兒黃沁誼， Suki仲要為追番個仔努力呀！