自薦做《跑男》 陳偉霆死纏Angelababy

陳偉霆去年憑內地劇《古劍奇譚》爆紅,不再被稱呼為Angelababy前度,又或者阿Sa(蔡卓妍)現任男友,但相比前女友Baby,他的知名度和受歡迎程度,依然差九條街。

想再上一層樓,陳偉霆經常借啲意同Baby扯上關係,製造話題。最近,他主動接觸《奔跑吧!兄弟》(內地版《Running Man》)製作單位,希望可以加入,在第二輯節目同Angelababy拍住做主持。陳偉霆識計數,可惜製作單位卻嫌他未夠班!

自薦做《跑男》 陳偉霆死纏Angelababy
William借舊愛 Baby過橋,自薦加入最新一輯《奔跑吧!兄弟》,結果慘食檸檬。

借舊愛造勢

自薦做《跑男》 陳偉霆死纏Angelababy

「浙江衞視」買入韓國綜藝節目《 Running Man》版權,製作中國版《奔跑吧!兄弟》,去年播放第一輯,無論收視和受歡迎程度,都搶過其他真人騷,更惠及節目中七個主持,包括 Angelababy、王祖藍和鄧超等都因此爆紅,甚至連曾經上過節目的嘉賓,都一樣有着數。

由於一直有傳第二輯將會換主持人,引來不少藝人對這個「包紅」的空缺流晒口水!其中陳偉霆亦收到風,更主動向製作單位自薦,爭取加入,希望進一步增加自己的人氣。

「 William(陳偉霆)好清楚娛樂圈玩法,亦識得點樣去製造話題,好似有重要嘢要宣傳,佢唔會提阿Sa,反而提住個ex( Baby)多啲,因為佢知道內地媒體對佢同Baby單過氣緋聞興趣大過阿Sa,只要黐住Baby,就必定上頭條。」一名內地製作人說。

可惜,陳偉霆的如意算盤打唔響!電視台方面好明白陳偉霆的動機,但卻擔心利用緋聞或者是非製造話題,會影響節目檔次,更重要是有關方面認為陳偉霆未紅到去一線位置,於是否決他加入,至於原有主持王寶強的空缺,最終由內地演員包貝爾補替。

被浙江衞視拒諸門外,但陳偉霆依然唔死心,表態做嘉賓都照殺,更自薦同《古劍奇譚》男主角李易峰一齊上節目。陳偉霆咬住唔放,但製作單位最終只請了人氣較高的李易峰做嘉賓,要陳偉霆再次吞多個檸檬。


星期一(三月九日)節目到成都拍攝,一眾主持以「聖鬥士星矢」造型現身,當中以 Baby的雅典娜女神造型最搶鏡。左起:陳赫、 Angelababy、鄧超、鄭愷、包貝爾、王祖藍、李晨

第二輯找來同主持人李晨傳緋聞的范冰冰助陣,即成為全場焦點。

離奇爆飯敍

事實上,陳偉霆是慣性利用Baby,拍拖時如是,連分手後都咬住唔放,兩年前,他在內地仍是「蛋散」一個時,有次在橫店拍《四大名捕》,剛好Baby同期在當地拍《雲中歌》,陳偉霆於是相約前度食飯敍舊,事件一直冇人提過亦冇被傳媒揭發,直到陳偉霆的《古劍》開播,這單新聞就校啱時間,離奇爆出。

「Baby覺得自己光明正大,加上大家分咗手都可以做朋友,所以William約食飯,Baby都會去,但其實都過咗好耐,一齊食飯呢件事突然爆咗出嚟,仲要遇啱係William套劇上,邊有咁蹺呀。」知情者說。

自薦做《跑男》 陳偉霆死纏Angelababy
以前拍拖時期,Baby經常帶挈William出席商業活動同拍廣告。