陳茵媺陳豪公佈兒子中文名為「陳梓燁」

林海峰和陳茵媺(Aimee)今日喺九龍灣MegaBox麥當勞,出席「全港早餐日」活動,佢兩個喺現場派發煙肉蛋漢堡畀食客。

Aimee同陳豪為囝囝低調舉行百日宴,Aimee今日公佈囝囝中文名,叫做陳梓燁。

Aimee話兩公婆揀過度過改咗呢個perfect name,佢話:「呢個名係一種特別嘅樹,係好重要嘅建築材料,個名喻意係光輝燦爛,個性有好passion。」

Aimee冇搵相士睇個名,佢話:「搵咗好耐,過咗好多關,問過好多人,呢個係Daddy、Mummy送給佢嘅禮物,我哋覺得同個英文名幾襯,意思又靚,同埋我讀design,覺得寫出來好balance,it’s a perfect name!依家先畀人睇會唔會太遲?佢性格係點,同第日條路係佢自己揀,呢個係我哋送俾佢嘅小小禮物。」

另外,林海峰被問到同老婆彭羚分開行善,佢好抵死咁話:「日行一善,但各行各路,希望有日喺路上偶然咁遇到,然後打個招呼,問候一下。咁都唔一定要一齊,分開做都係好事。」

一直有傳係林海峰大男人,唔俾彭羚出山,之前彭羚幫老公平反,林海峰好得戚咁話:「我非常同意我太太睇法,我支持佢,其實出唔出山,係佢自己決定,我每朝都同佢暗示我想收山,所以我一早起身實唉一聲!」

之後林海峰都暗讚又暗撐老婆出山行善,佢話:「出山有好多種,唔一定係以前咁,可以行另一座山,佢仲行得快過我。」

陳茵媺陳豪兒子中文名「陳梓燁」

陳茵媺陳豪兒子中文名「陳梓燁」
陳茵媺和林海峰晨早到九龍灣MegaBox麥當勞派包。