原來港人已捱了兩年馮美基（May姐）的哈哈笑聲，來到今晚，隨着《May姐有請》埋齋，亦終可脫離雞汁撈飯的日子。對於May姐整沙律落雞汁吊味，同行眾說紛紜。家燕姐直言over咗；亞視前一姐黃麗梅不敢批評前輩；至於接棒主持《吾淑吾食》的黃淑儀則認為每人有自己的處理方式。難道一雞死，一雞鳴嗎？

撰文：蘇芬妮

■馮美基攬住雞汁做節目兩年，至今哈哈笑聲曲終人散，同行的飲食節目主持評價好壞參半。
設計圖片及對白

黃淑儀：有乜嘢唔妥呢？

接力主持《吾淑吾食》的黃淑儀（GiGi）無懼批評，亦坦承會有植入廣告，她在電話中說：「有好幾間贊助，需要用就用，好似沙煲罌罉，有乜嘢唔妥呢？」提到May姐整沙律都落雞汁，GiGi姐說：「人哋做人哋方式，我做有自己方式。」GiGi姐透露節目idea由她構思，希望深入不同階層，拍攝出另類飲食節目。而每集有一主題，如人生到更年期應吃甚麼，又嘗試邀請不同階層的朋友做嘉賓，她說：「但公司有公司顧慮，不是個個對鏡頭講嘢。」亦會邀請營養師及中醫師提供健康飲食資訊。

節目：《吾湯吾水》
是非：當年GiGi姐拍《吾湯吾水》贏得好評，更一連拍攝了三輯。大抵無綫看準這點，推出《吾淑吾食》消弭飲食節目的負面形象。

薛家燕：雞汁真係over咗

若說哈哈功，好姨薛家燕應該不遜May姐，她做嘉賓的一集，笑聲加倍震撼。問好姨覺得May姐做主持如何？她在電話中笑說：「梗係做得好啦！」但原來她一集也沒看過，只從朋友口中聽來雞汁趣聞，她說：「本身都覺得雞汁真係over咗。」好姨認為植入廣告無可厚非：「電視始終係免費嘛，咁啲錢邊度嚟？有人贊助梗係好啲，咁有植入無可避免。」

節目：《皆大歡喜之溏心風暴》
是非：曾被指涉抄襲台灣節目《型男大主廚》，其中環節「美食競猜題」如出一轍。

黃麗梅：唔敢批評前輩

一句「雞有雞味，魚有魚味」走天涯的黃麗梅，同樣叫May姐。問她可有留意另一May姐硬銷雞汁？她在電話中說：「唔敢批評前輩，唔覺佢嘅節目有乜問題。」那她拍攝可有植入廣告？May姐說：「當時李錦記贊助，我都想放支蠔油前啲，但贊助商反而話唔需要。」

節目：《May姐真識食》
是非：前年曾傳出亞視拖糧而辣着May姐，事件擾攘一輪才和解，之後再沒有與亞視合作。

黃永幟：冇睇過

人稱「幟哥」的黃永幟，現身處上海，已甚少留意本港新聞，當然也沒睇過《May姐有請》，未能評論其雞汁怪行。不過對於廣告植入，幟哥在電話中說：「冇乜植入式廣告，我哋拍嘅時候冇人贊助。我成日周圍去，將自己十幾廿年食過好嘅地方介紹畀觀眾，場地、廚師都係我幫手聯絡，唔會刻意加其他嘢。」

節目：《為食總司令》
是非：有傳幟哥借節目為飲食王國拉攏關係，觸怒無綫高層。他下廚煮炒蟹肉乾撈翅被投訴鼓吹食翅。

少年食神：真的no comment

少年食神林澄光食遍天下，料他對飲食節目相當有興趣，但他一集《May姐有請》也沒看過，他透過短訊回覆：「Sorry，我平時收看的都是BBC的Discovery Channel，所以真的no comment！」他稱當日為無綫主持《為食一條街》時亦沒有植入廣告。

節目：《為食一條街》
是非：專介紹平民小食而贏得口碑，可惜少年食神被指呃朋友錢及速食高海寧唱通街，形象受損被無綫飛出局。

盧覓雪：冇乜嘢問題

為無綫生活台主持《覓食天下》的盧覓雪，問她可有睇May姐節目偷師，她受訪時說：「冇睇過，平日都只係睇收費電視。」那可覺得May姐節目太過份？盧覓雪坦言：「其實節目都係娛樂大家，收視點有人睇就得，又真係冇乜嘢問題，冇人揸支槍逼你睇。」但她抗拒植入廣告，亦絕不會在其主持的節目出現。

節目：《覓食天下》
是非：曾有人批評盧覓雪介紹的美食「好睇唔好食」，兼且食得太過油膩。

湯寶如

接棒加鹽加醋

黃淑儀主持的《吾淑吾食》將緊接《May姐有請》在周日同一時段播出，單憑節目名已令人有被騙之感，未知今次會出現甚麼植入廣告？現先來預測一下。

雞粉：上次大搖大擺落雞汁，斷估今次落雞粉平衡一下。
花生油：話明唔熟唔食，想煮熟啲梗要落多幾羹油啦！
濃湯寶：TVB開始賣行廣告，個人認為湯寶如做主持更皆。
愛回家：索性在節目播出「愛回家」計劃，煮重米啦，返屋企食啦！