涉貪離職被急召回巢
錢國偉奉旨喪玩 Chok星

去年一度捲入涉貪案的無綫金牌監製錢國偉，去年離職後依然獲無綫力撐重用，繼福祿壽演唱會後，錢國偉近日再被無綫急召回巢，監製全新遊戲節目《變身男女 chok chok chok》，奉旨搵女栽培第五代天使。至於 04年遭無綫炒魷的梁思浩，日前接受專訪時揚言渴望回娘家效力。

曾為無綫監製過《美女廚房》等受歡迎綜藝節目的錢國偉，近日獲無綫急召回巢，以部頭形式為無綫監製全新遊戲節目《變身男女 chok chok chok》，節目將大玩男扮女、女扮男，暫定 14集，於今年 7月緊接草蜢主持的《華麗明星賽》推出。

金牌監製錢國偉（左三）重返無綫後將奉旨搵女，培育第五代天使。

招募第五代天使

去年的福祿壽演唱會，仍是由已離職無綫的錢國偉擔任監製。

記者昨日致電錢國偉求證，他承認重返娘家，他說：「今次係以合約形式合作，之前離職係好嚟好去，冇不愉快。」問到節目形式，他說：「顧名思義係玩樣，其中一個環節係搵啲有潛質嘅靚仔可以變靚女，靚女變靚仔，然後畀嘉賓估究竟係男仔定女仔。我哋會去東南亞招募靚仔靚女，主持仲搵緊。」會否找 chok爆的林峯做主持？錢國偉笑說：「我哋有諗過搵佢唱主題曲，同埋會有第五代天使出現。」

梁思浩盼返娘家

04年被無綫炒魷的梁思浩，坦言渴望返娘家。場地提供： Hotel Icon唯港薈

這邊廂錢國偉獲無綫厚待，離職後繼續獲邀以部頭形式合作，那邊廂的梁思浩，原來也恨返娘家恨到出晒面。梁思浩 04年因不獲無綫續約而數臭娘家無情無義，但原來多年來他仍心繫無綫。

日前梁思浩接受訪問時說：「 TVB係我成長嘅地方，我好愛呢個家。當年我太細個，先至會講嗰啲說話，如果換轉係今日嘅我，絕對唔會好似當年咁講（指無綫無情無義）。」是否渴望重返無綫？梁思浩笑說：「我個心係超級之想，但呢個世界係講緣份。」若將來有機會返娘家，梁思浩希望能參與司儀工作。