曹永廉搵阿仔Chok靚招牌
曹永廉向來愛錫老婆姜依蘭，最近她開童裝店，阿廉當然出心出力支持，更出動囝囝以Chok樣示範夏季新裝，難怪她對這盤生意信心十足！
曹永廉老婆姜依蘭（Elaine）最近與朋友合資七位數字，在中環開童裝店，日前他帶囝囝Brandon到新舖試新衫，斯文Look、行山裝樣樣有齊。他還照足爸爸吩咐叉腰翹腳擺可愛甫士，冧得阿廉說：「我哋好鍾意幫囝囝影相，佢都識Chok住擺甫士望住鏡頭，似足我咁型！」
Elaine透露早有開童裝店念頭，早前遇上志同道合的朋友一拍即合：「自從生咗囝囝後，一直想搞啲有關小朋友嘅生意，同朋友傾偈時先發現大家都有上網買美國牌子嘅童裝衫，於是膽粗粗Send Email去傾，點知真係傾成大中華獨家代理權！雖然依家有咗BB，但身邊好多人幫手，老公唔使開工都會落舖執貨，我只係做文職工作。」阿廉指老婆經常捱夜，直言很心痛：「佢有次做到夜晚十二點先收工，真係怕佢太辛苦，忍唔住都要話兩句。」Elaine雖然被鬧，但卻甜在心頭：「阿仔都好錫我，每晚都會錫我肚皮一啖，話將來會照顧妹妹。」
自爆打手板體罰
近年不少家長因對小朋友過分溺愛而被稱呼為「怪獸家長」，阿廉直言適當體罰是必須：「小朋友唔可以寵，Brandon有時都幾曳，會打手板懲罰，好彩佢都聽大人說話。遲啲妹妹出世，我同安仔（郭晉安）都覺得要畀多啲時間陪大仔，唔可以令佢有被忽略嘅感覺。」
曹永廉出動囝囝，為太太的童裝店做生招牌。
雖然即將生第二胎，但Elaine仍事事親力親為。
年僅三歲的Brandon精靈可愛，擺甫士不遜模！f
曹永廉一家三口齊心協力，定能生意興隆。
阿廉支持太太依蘭開童裝店，空閒時間便會落舖幫手執頭執尾。
Brandon雖然只得三歲人仔，但擺chok樣亦駕輕就熟。
阿廉是模範好爸爸，他自言不會做「怪獸家長」，如果仔仔頑皮亦有適當體罰。