苟姑娘苟芸慧最近捲入郭富城和熊黛林分手事件，被指為小三的她，更引起激烈網友發起罷睇她有份演出的新劇《金枝慾孽貳》。慘被是非纏身的苟姑娘，出席活動更委屈到喊晒口回應，認真我見猶憐！不過，近日苟姑娘心情已轉好，除了因城城開腔平反外，最重要是得到一班同事公開支持，特別是因合作《金》劇而組成、由伍姑娘伍詠薇為首、加上簡慕華、梁嘉琪、潘曉彤和伍姑娘助手阿A的姊妹團「金枝六壯士」出口力撐，令苟姑娘相當感動，更聽「大家姐」伍姑娘話不會再為此事喊。

撰文 : 杜淑霞 攝影：畢紹基
化妝：Jovy Yiu Make Up Forever Academy（伍詠薇）
髮型：Nicholyip@hair（伍詠薇）

苟姑娘跟伍姑娘等姊妹組成「金枝六壯士」，日前她們接受本報訪問時表示，全靠在橫店時拍了一個月外景而建立感情，伍姑娘說：「我哋喺嗰度住咗成個月，朝夕相對，大家互相照應，慢慢就變成好朋友，除咗做我宮女嘅梁嘉琪和潘曉彤之外，同家姐（鄧萃雯）嘅宮女苟姑娘同簡慕華都friend咗，我哋叫做『六壯士』係因為大家都係好堅強同正面嘅人嚟。」

頂酒顯義氣

苟姑娘坦言跟伍姑娘特別有緣，除了大家外號都叫「姑娘」外，英文名亦同樣叫Christine，「我個人係比較被動同慢熱，但佢哋就好開朗活潑，我都畀佢哋感染咗，雖然我同佢哋唔同宮，但係成日都會一齊食飯傾偈，就算拍完都會保持聯絡，成日都有聚會㗎！」本周一(29日)《金》劇首播，伍姑娘在佐敦某酒店的卡拉OK搞了派對齊齊睇，苟姑娘聯同「金枝六壯士」成員都有出席，睇完劇一班好姊妹還在酒店房過夜傾心事。

聚會後伍姑娘接受本報電話訪問，表示當晚大家盡興而歸，「當晚除我哋『六壯士』外，仲有主子阿戚（戚其義）、陳豪同黃德斌佢哋，大家好興奮，每節播完鼓掌支持，睇完仲一齊唱K，之後我哋『六壯士』仲喺酒店房齊齊玩通宵。」問到被是非纏身的苟姑娘心情，伍姑娘表示，「佢OK啦！佢之前話有朋友叫佢唔使喊，嗰個咪係我囉！我同佢講，無做過唔需要喊，我哋撐佢唔係因為有人話要罷睇劇，而係認識佢都知佢為人，係個好有義氣嘅女仔，我生日畀阿智（蔡一智）佢哋灌酒，佢唔係好飲得都走嚟幫我頂酒，但佢唔係係人都幫，當你係朋友就兩脇插刀㗎！」

為人無機心

其餘「六壯士」姊妹梁嘉琪和潘曉彤撐硬苟姑娘不會做小三，嘉琪說：「同苟苟相處過都會知道佢係好怕麻煩到人，絕對唔會搞事，可能係誤會嚟！我信佢為人唔會做小三，叫佢唔好再喊，因為日久見人心，大家遲早會睇清楚佢為人。」曉彤亦相信苟姑娘為人，「苟苟係個好識關心人、好sweet嘅女仔，佢好冇機心，我100%相信佢唔係做小三，希望佢唔好再亂諗嘢，清者自清！」

對於得好姊妹支持，苟姑娘亦大為感動，「好感激佢哋咁相信我，我離鄉背井嚟到香港工作，屋企人又唔喺身邊，好彩仲有呢班好朋友支持，真係覺得好窩心，多謝佢哋同埋其他同事，好似鄧萃雯、蒙嘉慧同鍾嘉欣佢哋，個個都公開替我講說話，我唔會再唔開心，會聽伍姑娘話唔會再喊！」

苟姑娘被指介入郭富城和熊黛林戀情，她大感無奈。

苟姑娘感激伍姑娘等好姊妹開腔力撐。