主播女神戀上 已婚男主播？

平時睇無綫嘅六點半新聞，通常都會見到靚佬許方輝同女神周嘉儀拍住檔做主播，但近日佢兩個雙雙消失喺無綫新聞，啲「粉絲」一定好擔心佢哋。

但噚日有雜誌爆料，話佢哋被人影到喺「車上親暱」嘅相片，揭發周嘉儀同已婚嘅許方輝有啲曖昧關係喎。而嗰輯相喺另一本雜誌，今日已經刊登，所以兩個人即時申請放假，避一避風頭。

呢單咁大嘅八卦新聞，當然矚目，有記者打電話畀事件主角問吓單料係真定假，許方輝唔聽電話，周嘉儀就剩係講咗句：「我無嘢講！」消息雖未經證實，但周女神疑似做小三，許方輝形象又「好好先生」，加上老婆係前亞視主播女神、之前誤報死訊嘅陳佩琳，已哄動新聞界同網上討論區。

有網民笑許方輝「識食」，有人就戥靚太陳佩琳慘。有留言仲話：「無咗個老婆啦，呢鋪佢輸得勁，明明自己老婆都好正。」篇報道仲話，許方輝好有女人緣，婚前都同幾位女記者拍過拖，九十年代就同陳佩琳結婚。報道又話都問候過靚太㗎，但佢唔願多講，剩係話個人私事，多謝關心。

有記者前日向TVB打聽，新聞部發言人回應，指許方輝和周嘉儀二人都申請放咗假，至於由幾時開始及放到幾時，發言人指公司內部資料不對外公開，不作補充，亦唔會過問同事嘅私事喎。

有記者朋友同周嘉儀熟稔，前日打畀佢，佢對呢個傳聞冇回應，而且唔接受訪問。至於許方輝就唔聽電話，亦有記者向Simone問候，佢唔願多講，指係個人私事，多謝大家關心。

今日出版的《壹週刊》封面報道

傳許方輝周嘉儀 主持立會論壇「撻着」

31歲嘅無綫新聞人氣女主播周嘉儀，傳與大佢17年嘅已婚上司、無綫主播兼新聞部總採訪主任許方輝鬧緋聞，事件驚動新聞總監袁志偉，將兩人調離六點半新聞報道主播位置，更要放兩星期大假避風頭。有消息人士透露，許管採訪，周專職主播，兩人在工作接觸交流不多，直至去年合作主持立法會選舉論壇，對政情唔係好熟嘅周嘉儀不時請教男方，點知就「撻着」，發生「車上親暱」緋聞。

網民暱稱為「＋2」嘅周嘉儀，喺網上討論區長期高踞人氣主播榜首，噚日傳出佢同許方輝關係曖昧，好多網民都話大跌眼鏡，有人話好嬲，又有人表示好失望，對「女神」戀上有婦之夫同事，傷心到喊咁話喎。

網民大歎失望

消息人士向Kelly報料，指許、周兩人共事多年，但工作上接觸較少，即使一起出鏡做新聞主播，只係同場讀稿。直至去年七、八月立法會選舉前，無綫舉行多場選舉論壇，新聞部負責人諗住俾觀眾新鮮感，決定安排兩人合作做主持，兩人接觸機會大增。

據知做主播嘅周嘉儀，對政治唔多熟悉，為做好呢份工，不時請教許方輝，兩人接觸時間多咗，忽然「撻着」。

無綫早年開辦廿四小時新聞台，請咗幾位美女主播，除了周嘉儀，仲有大家都好熟悉嘅「珠珠」趙海珠，以及「小飛俠」林燕玲。三大女主播，「珠珠」轉行兼嫁人，早前做埋媽媽；其餘兩位「新聞部小花」都涉搭上有婦之夫，「小飛俠」○九年被傳媒拍到同會計師龔耀輝到酒店相聚，林因清純形象破滅，被降職減薪，後來轉戰財經界，同龔耀輝感情告終。

壹週刊 第1201期：周嘉儀搭上已婚許方輝