無綫新聞部主播小花爭上位，似在上映辦公室版《金枝慾孽》。報道新聞嘅人物，變成咗「新聞人物」，仲上埋娛樂版，真係好精采。其實除咗張文采同黃紫盈之外，仲有兩位女主角——周嘉儀，同埋比佢遲一年入新聞部嘅已婚主播盤翠瑩。不過，「周盤之戰」，係另一單嘢。佢兩個喺工作上不時有交替機會，如2010年，兩人就分別交替主持《香港早晨》，點估得到，原來佢兩個，係唔啱0架!

件事係咁的。據悉，某一日，亦即係周嘉儀放假前某日，為咗健康，周嘉儀喺辦公室食奇異果，整污糟張枱，但又冇清理。而盤翠瑩呢，咁啱就目擊成個過程。話得周、盤兩女素有心病，當然有下文啦。

話說呢，盤翠瑩同大部份facebook用家一樣，馬上留言單打周嘉儀，咁周嘉儀當然係睇唔到啦。之不過，成件事好快傳入周嘉儀耳中，其後兩人喺公司相遇，竟然當眾嘈交!!嘩!!好爆喎!

據知情人士話，事後周嘉儀心有不甘，竟向各同事發內部email，大意係話，若然有事，可以開門見山直接講，唔使做埋晒啲鬼祟行為，雖無指名道姓，但擺明影射盤翠瑩啦。

周嘉儀同盤翠瑩原來有唔妥，而爆發罵戰原因，竟然係一個奇異果？