鍾志光被無綫用到盡 萬能鍾出鏡多過小生

體育主持鍾志光呢期真係俾無綫用到盡,大家無論睇《洲際國家盃》、《世青盃》、《2013香港國際龍舟邀請賽》、《群雄論戰》、《好心作怪》、《超級無敵獎門人終極篇》、《今日VIP》,觀眾都可以見到鍾仔嘅出現,唔怪得之被封為「萬能鍾」啦!

尤其上月23號凌晨佢講完世青盃場波,朝早去報道龍舟賽,夜晚再返無綫做《群雄論戰》,然後通頂講洲際盃分組賽,難怪網友都話幾乎由朝到晚見到佢,一個人做四個人嘅嘢,出鏡率仲高過一線小生,擔心佢身體負荷唔嚟,叫無綫頒個勤工獎畀佢。

鍾志光
■呢期睇親無綫幾乎晚晚都見到鍾仔,難怪網友叫無綫頒個勤工獎畀佢。

「有錢搵唔辛苦」

萬能鍾完全冇抱怨,佢噚日接受電話訪問話:「呢個係我工作,自己主要做體育節目,足球唔係一連十幾晚通宵,人有幾何做到一份自己鍾意嘅工,我係球迷,唔返工都睇波,寓工作於娛樂,我覺得冇問題,very good!」不過,鍾仔都承認最辛苦係龍舟嗰日,但都唔係佢最長工時,鍾仔話:「記得有年三套劇一齊開,連續三十個鐘斷續瞓咗一、兩次,每次一、兩個鐘。」

對於網友都擔心佢體力問題,鍾仔笑說:「聽我講嘢都好有中氣呀,其實唔辛苦,因為有錢搵,工作量多勞多得,人生有幾何做到有興趣嘅嘢又維到生,好感恩!」

鍾志光
■鍾仔連遊戲節目《獎門人》都玩埋,真係多勞多得。 資料圖片

鍾志光
■鍾仔有份拍劇集《好心作怪》,連宣傳活動都出席幫手做宣傳。 劇照

鍾志光
■鍾仔做埋《今日VIP》嘅嘉賓,真係辛苦。
電視圖片