早前通訊事務管理局公佈今年初公眾對兩間免費電視台節目嘅意見，有人批評無綫成日播埋啲鼓吹奢華嘅生活方式，無綫亦從善如流，最近請咗台灣男子組合Circus嚟香港拍《Circus香港大爆走》，畀一萬蚊港幣佢哋留喺香港十幾日，聽落好似幾多錢，但原來係包埋機票，所以佢哋喺拍攝期間都要搵外快賺啲車馬費，試過喺街頭做出氣袋，每俾人打一次賺三十蚊，仲要住喺板間房，都幾陰功豬。

■台灣組合Circus出名鍾意作瘋狂嘗試，今次攞住一萬蚊嚟香港玩十幾日，體驗一吓民間疾苦。

體驗香港生活

個節目喺嚟緊星期六J2台首播，之後就每逢周日播映，噚日Circus三位成員廖人帥（Leo）、黃尹宣（Eason）同埋林柏昇（Kid）去咗旺角街頭宣傳，去得旺角，閒閒哋都有幾百人圍觀，場面墟冚！佢哋仲即場搵咗幾位粉絲玩鬥快飲汽水同扑儍瓜遊戲，之後又同街頭藝人一齊jam歌，同香港人打成一片。佢哋話拍攝期間嚐盡苦頭，阿Kid話：「我們試過去吃牛鞭，食完嘔，又有老闆要求我們一次過喝三十支汽水，成功便賺到二千元，可惜失敗了。想不到香港是國際化的大都市，還以為大家都有錢又開心，深入了解之後，才感受到香港人的辛苦。」原來一早有無綫高層向佢哋透露香港人近幾年好唔開心，生活壓力大，廖人帥話：「希望我們用年輕人的角度帶給大家歡樂，也可以讓大家發洩一下。」

Circus向來都好鍾意作瘋狂嘗試，之前亦有人疑抄襲佢哋嘅遊戲，黃尹宣話：「如果真的是我們的榮幸，也激發我們想更猛的遊戲，不過我們所有內容都是自己製作，跟其他節目不一樣，希望大家感受到我們的努力與熱情。」

■Circus試過做街頭出氣袋賺錢，粉絲玩吹氣鎚仔扑佢哋，當然屬小兒科。

廖人帥（中）被牛鞭纏頸，林柏昇（左）同黃尹宣表示食完即嘔。

■Circus早前仲去咗澳門旅遊塔挑戰百步登天。