「佢係半個老竇」
杜琪峯灑淚悼王天林

名導王天林縱橫演藝界數十年，他前晚因心臟機能衰竭病逝，享年 83歲。天林叔的死訊傳出後，他的愛徒、導演杜琪峯傷心不已，帶淚感謝恩師，杜琪峯又指天林叔笑言要做和事佬，不欲他跟汪明荃再爭拗不停。

對影視圈貢獻良多的名導王天林前晚病逝，身為王天林愛徒的杜琪峯，昨日接受無綫娛樂新聞台訪問，坦言天林叔改變了他的人生：「天林叔係半個老竇，佢係我師父不特止，亦都係我人生嘅轉捩，因為唔係佢，我都做唔到導演。以我當時一個中三學生，去到做無綫嘅副導演，基本上係好渺茫，因為天林叔嘅堅持，公司先會畀機會我。」

前日病逝、享年 83歲的天林叔一生貢獻演藝界。

杜琪峯憶起天林叔赴康城影展的開心模樣（右圖），即時感觸落淚。　無綫娛樂新聞台圖片

勸少同阿姐嗌交

杜琪峯提到不少與天林叔相處的有趣往事，最記得對方經常對他說：「 Johnny，你唔好同汪明荃嗌交啦！」另外，有次拍攝電影《鎗火》，天林叔跟杜琪峯說：「都唔知杜琪峯拍乜！拍親啲戲都唔知係乜嚟嘅！」
提到 05年杜琪峯率領《黑社會》演員赴康城影展，他感觸落淚說：「當時我哋着晒 tuxedo喺康城大街行緊，要七個人扶住一個老人家、大肥佬，啲外國人見到以為佢係教父，阿叔聽到咁講佢好開心，咁多人陪住佢，作為一個電影人…」杜琪峯說到此時忍不住飲泣，並邊抹眼淚說：「…能夠踏足康城係好開心，我能夠帶阿叔去咁嘅地方，自己都好（安慰）……」

阿姐讚點石成金

阿姐對伯樂天林叔離世，深表惋惜。

天林叔在 70年代也曾監製多部經典劇集，捧紅不少小生花旦，包括《京華春夢》的阿姐、《啼笑因緣》的李司棋、《狂潮》的周潤發、《射鵰英雄傳》的黃日華和已故女星翁美玲等，曾與杜琪峯有爭拗的阿姐前晚說：「當年天林叔係電影界名導演，捧紅過唔少電影明星，佢唔只對電影有好大貢獻，過到嚟拍電視劇都一樣，佢好識運用感情發揮，好識將啲歌擺落劇裏面，例如司棋嘅《啼笑因緣》同《京華春夢》咁。天林叔對我嘅影響好大，佢走咗，我當然覺得好可惜。我覺得天林叔除咗電影同電視之外仲有一個好大貢獻，就係有個咁叻嘅仔（王晶），後繼有人。」
另一方面，王晶表示未決定如何籌辦亡父身後事，他昨日在電話訪問中說：「暫時點搞都未有決定，要同屋企人商量先，有乜進展會同傳媒透露。」

李添勝向天林叔偷師

李添勝表示早年曾向天林叔學習執導技巧。　資料圖片

天林叔於 1947年經叔父王鵬翼引薦投身影壇，執導作品多不勝數，無綫熱播中的劇集《巾幗梟雄之義海豪情》的監製李添勝昨日在電話訪問中說：「我同天林叔唔同時期，但我有向佢偷師，我有留意佢好多導演工作情況，好似處理鏡頭、打燈、導演演員拍戲等技巧，真係獲益良多。」

林嶺東憶上月飯敍

導演林嶺東和杜琪峯兩位高徒十分尊敬天林叔這位恩師。

憑電影《龍虎風雲》成為第 7屆香港電影金像獎最佳導演的林嶺東，執導技巧同樣受天林叔影響，他昨日在電話中說：「佢係我恩師，我哋通常一年見一、兩次面，佢走咗我感覺好唔舒服，又走咗一個。一個月前先同佢食飯，當時佢仲好開心、好食得、好壯健。」
林嶺東早於兩、三日前曾到醫院探訪，他說：「我當時同王晶講，最緊要天林叔去得安詳。天林叔咁叻，應該冇乜嘢心願未了，拍咗咁多部電影、電視劇，弟子又好，子女又對佢咁好，好食好住，無憂無慮，仲成日打麻雀，天林叔應該都去得好安樂。」
此外，無綫外事部副總監曾醒明表示翡翠台會於明日凌晨起，一連四晚播出天林叔的作品，順序為《千里送京娘》、《啼笑夫妻》、《黃飛鴻之鐵雞鬥蜈蚣》和《精裝追女仔》。

全城哀悼
曾華倩：感激賞識　黃日華：心如刀割

曾華倩

於影視圈貢獻良多的王天林前晚病逝，圈中曾與他合作的後輩均感惋惜，不少藝人在微博留言悼念。

黃日華

苗僑偉

曾華倩：知道天林叔逝世，感到十分難過！回想當年還在兒童組（《 430穿梭機》）的時候，是天林叔第一位賞識我，把我轉到戲劇組的監製，第一套演出的電視劇就是《雪山飛狐》飾演苗若蘭，一個很討好的角色，同時又給我很寶貴的意見！在此，永遠懷念你！我尊敬的天林叔。

黃日華：我的伯樂王天林先生已經離開我們了，再一次令我心如刀割！天林叔，一路走好，你的知遇之恩，永遠留在我心裏，永遠懷念你。

阮兆祥：天林叔對電影及電視圈的貢獻，有目共睹，無人能及！祝一路好走！

苗僑偉：天林叔係我恩師，我同黃日華拍完《過客》之後， 82年佢就搵我拍《射鵰英雄傳》，一路合作過好多劇集，佢對我同我老婆都特別好，大家好有緣，直至天林叔退休，淡出娛樂圈，間中喺大銀幕見佢客串，但有時同晶哥（王晶）食飯就會見到天林叔，前年佢大壽我都有去。