雖然有點「娘」，不過以時來運到來形容黃浩然近年的發展，的確是最好不過。

向來只重視「親生仔」的無綫，近年因不少藝員約滿後紛紛北上賺「人仔」，所以一眾非親生仔的藝員都能排隊上位，而當中黃浩然的發展最為理想。

自07年轉投無綫後，機會一個接一個，近年的《我的如意狼君》、《情越雙白線》、《拳王》、《大太監》及《巾幗梟雄之義海豪情》中的表現都備受讚賞，正當大家以為他一步步地向着「視帝」寶座進發，但浩然坦言諗都冇諗，又係嘅！有時恨又未必有，但行起運上嚟，唔使爭都自然會攞到喎！

撰文：K
攝影：Daima
美術：Sing

紀錄良好

在無綫6年間，黃浩然一直紀錄良好，自言從未試過推劇，亦從未試過「冧廠」（突然請假），加上不錯的觀眾緣，令他這些年來的機會不絕，雖然如此，但浩然坦言沒有打算成為「親生仔」，「中國星（經理人公司）對我好好，我又覺得現在同公司（無綫）合作的模式幾好，所以都會一直維持現狀。」

對於現時的發展，浩然一直口中說着「感恩」，老實說當年以模特兒身份被杜琪峰羅致旗下，高大威猛的外形，理應前途無限，可惜港產片市道愈來愈差，令浩然不得不從大銀幕跳進公仔箱。「入無綫前的9個月，我夾夾埋埋只開得10幾日工，經濟上一定有壓力，始終咁大個人真係有好多開支，就算最初入到無綫我都只係搭港鐵返工。」

習慣飛紙仔

雖然性格較安於現狀，但面對財政壓力，令浩然不得不面對現實。變，似乎是唯一的出路！「我喜歡順住條路去行，但當時冇晒辦法，真係覺得要的起心肝去改變自己，既然電影唔得就去試吓入電視台，我諗如果電視台都唔掂，就真係要轉行啦！」至於轉甚麼行業，浩然直言：「我都唔知自己可以做乜！」從大銀幕走進公仔箱，難免給人有點Down Grade的感覺，浩然直言：「冇刻意去咁諗，身邊的人話電視台可以學到好多東西，都想試試。」

轉型後的浩然，無論工作環境或心態都有重大轉變，他表示當時的確很不習慣，不過當中並不包括「飛紙仔」拍攝的情況。「以前拍電影都會『飛紙仔』，所以我都幾習慣呢種模式，不過如果拍古裝劇有長對白，真係需要時間去背稿，大家都知在無綫拍劇每日都唔夠時間休息，所以有時太攰都會同對手夾，大家遲個幾鐘先返，如果勉強返去得個軀殼都冇意思。」

以香港為基地

綜合天時地利人和，浩然在無綫已經坐穩一線小生之位，相反林峯、黃宗澤等無綫親生仔，近年紛紛闖進大銀幕，浩然謂：「我冇話絕對唔想返出去拍電影，呢樣唔係我去決定，係睇Market需唔需要我，依家有人開部戲畀我擔正，冇票房都冇用，都會問自己孭唔孭得起先？可能就咁一鋪送我歸西。」唔少藝人對收視不聞不問，自覺盡力拍完套劇就算，但浩然稱：「雖然收視唔係由藝員控制，我亦唔係完全介意收視，但會以此作藍本，就好似做市場調查一樣，從中知道觀眾對自己演繹方法的口味。」

浩然亦表示，雖然現在是男主角，但仍算是在這個階段剛起步，暫時仍未有代表作可言，所以未有意「離巢」，至於返國內搵真銀的機會，浩然坦認：「會開始接洽，雖然之前都有人搵過，但小朋友仍太細，希望會以香港做基地，況且在電視圈好多東西仍要學習，當係投資吓囉！」

重視親子時間

正所謂有得必有失，近年一劇接一劇的浩然，自然給予家庭的時間較少，好像大仔出世時，浩然因踩着《我的如意狼君》及《拳王》兩套劇，所以只放了不足24小時的假，直至囝囝4個幾5個月大時，才有兩星期的空檔，「唔好話太太會唔開心，自己都會覺得有問題，雖然係太太生，但個仔我都有份嘛！」所以今年細仔出世，浩然一早向無綫申請放假。

雖然自己較少時間在家，但浩然直指不會將管教囝囝的重任完全推畀太太，「大家角色經常互調，有時我會做嚴父，但有時亦可以做慈父，不過大仔亦只得兩歲，就算講道理都未明白。」對於教育小朋友，浩然指太太會睇書取經，自己則會問朋友意見，「我有問祥仔（黎耀祥）同師傅冼灝英，他們都異口同聲話唔需要特別點教，最重要同小朋友親近一點，讓他們感受到愛，小朋友對自己有信任，到時我講乜佢都會聽，所以我都會撥多點時間去參與親子活動。」

中學時期當模特兒的黃浩然，偶然下獲導演杜琪峰發掘，成為藝員，首套參演電影《十萬火急》中飾演戇直消防員王浩然，其後黃浩然在《新紮師妹》中，飾演的劍雄，亦讓人留下深刻印象。不過電影市道愈來愈差，02年黃浩然開始參與亞洲電視的劇集拍攝，當中的《情陷夜中環》雖然收視麻麻，但演技開始受關注，直至07年加入無綫後，機會一個接一個，2010年更奪得「飛躍進步男藝員」獎，從此躍升為一線小生。