爆笑 王祖藍扮女人激似妹妹

忽然一周 772期

娛樂頂點

爆笑 祖藍扮女人激似細妹

2010年05月14日

30歲的王祖藍在《荃加福祿壽》中扮女人扮到出晒位,早前他還公開扮女人秘技,每次必備打底背心、 36D胸圍和肉色大碼阿婆底橫外,更說「個個女人都係我師父。」

本刊發現,原來祖藍有個餅印細妹,外形同祖藍在節目中扮的 Handlebaby有 99%相似,相當爆笑!祖藍扮女人扮得似,原來全靠細妹。

王祖藍扮演的「 Handlebaby」
祖藍扮 baby
在《荃加福祿壽》中,祖藍扮演的「 Handlebaby」上圍激爆,下身瘦削,與祖藍妹非常相似。

王祖藍身高 5呎 2吋、 120磅、腰圍 29.5吋,由於身形短小精悍,天生已有反串條件,所以可以扮邊個似邊個。靠扮女人出位嘅祖藍,不但跟母親成個「餅印」,而且與細妹更為激似,就算失散都一定搵得番!

分唔分到邊個係我呀!(設計對白)
分唔分到邊個係我呀!(設計對白)

上周五( 7日)中午 12時許,記者發現一個長髮、身穿黃色 T- Shirt、深啡色牛仔褲,激似祖藍「 Handlebaby」造型的少女步出祖藍西貢寓所,當記者正在驚愕之際,卻見到真身祖藍駕着粉藍色座駕停在路邊。該少女即時跳上車,祖藍隨即載她直駛將軍澳地鐵站,她其後乘地鐵到北角,之後失去影蹤。後來證實,此人原來是祖藍細妹。

最錫細妹

在《荃加福祿壽》扮演 Handlebaby的祖藍,和真版 Angelababy曾合拍電影《矮仔多情》。
在《荃加福祿壽》扮演 Handlebaby的祖藍,和真版 Angelababy曾合拍電影《矮仔多情》。

祖藍有一弟一妹,由於 28歲的弟弟王亦藍是電影迷,所以 02年開始客串幕前,曾拍攝 4套電影,不過多演大配角。去年亦藍參演崔允信執導的獨立製作電影《三條窄路》,同戲演員還有廖啟智,當時祖藍還幫細佬宣傳,盡顯大佬風範。但祖藍對於最細的妹妹,卻甚少提及。原來細妹是家中掌上明珠,祖藍不想影響其生活,所以認識祖藍的朋友都只以「祖藍妹」稱呼她。據知情人士說:「祖藍好孝順,自從 02年佢爸爸腸癌去咗,佢就孭起頭家,一個人照顧晒屋企。祖藍最錫個妹,阿妹一句要讀社工,祖藍便拍心口孭起全部學費。細妹半夜三更一個電話要食雪糕,祖藍就算幾夜收工都會買,又成日車佢返學,關係好 close。」唔知係咪咁,所以祖藍不經不覺向細妹偷師,祖藍扮女人咁成功,細妹功不可抹!

本周二( 11日),記者致電祖藍,但他正在外地,直至截稿前未有回覆。

餅印細妹 99%激似

王祖藍細妹
祖藍細妹衣着打扮普通,身材比祖藍略胖,但由於樣貌及身形激似,驟眼一看,還以為是戴了假髮的祖藍。

車細妹返學

與母親和妹妹同住西貢村屋的王祖藍
與母親和妹妹同住西貢村屋的祖藍,為方便妹妹上學,特登揸車載她到地鐵站,省卻轉車時間。

媽咪 80%相似

王祖藍與媽咪有同一個餅印
祖藍與媽咪有同一個餅印,由於祖藍媽不太喜歡乖仔扮女人,所以祖藍在媽咪面前鮮有提及工作。

細佬 70%相似


祖藍細佬王亦藍是兼職演員,曾拍《天水圍的夜與霧》、張艾嘉執導的《想飛》等,不過都是大配角。去年 9月,亦藍參演《三條窄路》。祖藍為幫細佬宣傳,更請纓一起接受雜誌訪問。

拍檔笑爆

由於祖藍與妹妹激似,所以拍檔李思捷見到張相,都以為係祖藍!

李思捷驚叫

李思捷
「佢係邊位?呢個咪係祖藍扮嘅 Handlebaby!」當記者開估,李驚叫:「吓,真係好似佢,原來祖藍扮女人係抄佢個妹!可以叫埋個妹上嚟一齊做《荃加福祿壽》,做佢替身都得。」

李璨琛估中

李璨琛
「佢係王祖藍……唔係,睇真啲係女人嚟,唔係扮嘅!因為祖藍扮嘅話個胸會好誇張,係咪祖藍啲親人呀,咁似嘅!」

胡杏兒唱反調

胡杏兒
「邊個嚟 o架?一個有少少似祖藍嘅女仔(在旁的林子善搭訕:邊似呀!)佢係祖藍個妹?都唔係好似啫!」

撰文:娛樂組 攝影:蔡鴻天、蘇銘賢