《每天愛你多一些》、《追憶》、《笛子姑娘》、《零時十分》、《灰色》、《壞女孩》、《儍女》、《天下無雙》……這些天下無雙的歌詞，出自詞神林振強的手筆，食腦的他身兼填詞、廣告創作、漫畫、散文、專欄作家於一身，55歲那年因淋巴癌撒手人寰，眨眼十年，與他合作無間的好友林子祥和倫永亮等至今仍惦掛着他。別人眼中，林振強是個鬼才，然而在他家姐林燕妮心中，他不止鬼才，而是一個天才，至今對他念念不忘！
撰文：余燕儀
■眨眼間，著名填詞人林振強已走了10年，但他那雋永的歌詞永不會被人遺忘。
《壹週刊》圖片
■在林燕妮心中，林振強不是鬼才，而是一個極具創作天份的天才！
攝影：陳志嵐
場地：南京東路（皇室堡）
林燕妮：佢留低綿綿嘅愛
林燕妮有兩個弟弟和一個妹妹，三個弟妹都因癌症先後走了，林振強於03年11月16日病逝，十年後的今日，林燕妮心情仍然被牽動，她前日接受專訪時說：「過去六、七日，我連續失約三次，心情好差，噚日收到洋葱嫂（林振強太太）寫嘅《洋葱頭背後的林振強》，醒起細佬11月16日逝世，所以呢幾日咁唔開心！」
■林燕妮有弟弟振強、振剛（右一）和妹妹雁妮（右二），可惜三個弟妹先後因癌病離世。
■林振強由童年至青年，樣子變化不大，但越大越嚴肅。
愛洋蔥嫂 行動勝千言萬語
■林燕妮和林振強都是水瓶座，感情特別好。
林振強跟家姐感情很好，兩姊弟都是水瓶座，性格頗似，林燕妮說：「如果佢早起過太太，每朝會唧定牙膏畀太太，我都係咁對男友，仲有我哋都好論盡，佢試過打爛新光管。」提起弟弟的創作天份，她驕傲地說：「佢對工作唔係睇錢，我同黃霑創立廣告公司，叫佢做創作佢又好掂喎，不過佢唔想成日喺家姐公司做嘢，做咗年半就離開，畀其他公司搶住要，佢係香港最出色創作總監，啲人話佢係鬼才，錯，佢係天才。」
臨別匆匆見家人
■林振強一家三口和父母、家姐、弟弟合照。
林振強因淋巴癌逝世，原來他患病逾年後，在生死關頭才通知家姐，林燕妮黯然地說：「佢有cancer年幾後，醫生話要捐骨髓，佢打電話嚟：『家姐，救我一命！』之前我都覺奇怪，以前每星期三我哋會返媽媽屋企食飯，但好耐冇見佢，妹妹28歲癌症逝世，振強最錫妹妹，成日去墳場傾偈，到佢有事好冷靜，振強後期要住單獨隔離房，乜都要消毒，我哋只可以用電郵傾偈，佢太太日日探佢，嗰兩年佢太太都唔知日子點過，有日仲攰到撞車。」
林燕妮眼紅紅說：「嗰時佢病得好犀利，知自己唔會好，佢唔係悲觀，佢係好聰明嘅人，淋巴癌冇可能好，佢話要成日企，瞓又暈坐又暈；到有一日我睇《壹週刊》，佢忽然寫好多我哋細個嘅嘢，我直覺：『弊啦，細佬冇啦！』果然係佢最後一期，佢責任心好強，寫到死都寫，《壹週刊》星期三出，星期六佢同醫生要求見我同媽媽，好記得當時佢有一滴好大眼淚，手好震咁指住《壹週刊》，佢唔知我睇咗，我攬住佢先放心，然後我問佢：『你想我返屋企定留喺度？』佢好辛苦講三個字：『返屋企』。佢太太同佢講：『你病得咁辛苦，唔好為咗我捱，如果你捱唔住去啦！』佢見完我哋12個鐘後走咗！」
■林振強很愛錫唯一的兒子，在兒子眼中爸爸一點都不嚴肅。
林振強走後，家人為他低調搞喪禮，張學友、林憶蓮、陳潔靈、倫永亮都送好友最後一程，林燕妮說：「學友喺喪禮唱《每天愛你多一些》，陳潔靈同林憶蓮都有唱歌，好多謝佢哋忍住眼淚唱歌送亡友一程。」問林振強可有遺憾？林燕妮說：「梗係有憾，佢唔捨得媽咪、我、細佬、太太、囝囝，佢留低好多綿綿嘅愛。」
肥佬黎凹凸拍檔
■林振強為陳百強填詞的《摘星》手稿，看到他的字體頗工整。
林振強十多歲時跟李小龍的弟弟李振輝組成雷鳥樂隊，擔任主音結他手的他醉心音樂，其後染指填詞，林燕妮說：「有一日振強話想填詞，寫完畀黃霑睇過一次，佢好聰明，佢話寫嘢唔需要一定有關連，鍾意將唔相關嘢攞晒出嚟，佢幫陳百強寫《摘星》，佢話講戒毒道理好悶，所以歌詞有旅店叫後悔，《每天愛你多一些》其實寫畀太太同囝囝。」
林振強在佐丹奴任職時認識了黎智英，其後獲邀到壹傳媒工作，林燕妮笑說：「林振強唔講嘢，黎智英就一日講48小時，我問佢兩個點解可以成為好朋友，振強話佢唔講畀肥佬黎講晒，《壹週刊》、《忽然1周》、《壹本便利》都係佢改名，佢喺《蘋果日報》返工，但佢唔習慣返工，又好憎開會，佢話開會講埋無謂嘢，嗰時有個高層做得好高級，俾肥佬黎鬧：『你哋唔使聽佢講嘢，呢個人廢。』我問細佬點解嗰個人俾肥佬黎鬧足兩年都唔走？振強話有啲人係咁，有人工支咪得，但佢唔係，之後佢覺得開會悶，同黎智英講：『我唔返工得唔得？』否則佢辭工，佢唔係要好多錢生活，唔鍾意做就唔做，黎智英了解佢，由佢唔返工唔開會，我問佢唔返工點同黎智英傾？佢話唔傾㗎，寫囉，《壹週刊》每次出咗，黎智英要佢成本睇晒逐篇評分，《壹週刊》啲人話畀我知，你細佬要求好嚴格，唔係差就劣，但佢哋又好敬佩佢，振強走時黎智英都喊得好犀利。」
■身高6呎的林振強愛運動，想不到癌症卻帶走了他。
生命之曲
林雁妮、林振強
《洋葱頭背後的林振強》圖片
林振強的創意源源不絕，能將喜怒哀樂全譜進歌曲之中。現藉這些雋永歌詞，緬懷他的生前點滴。
撰文：馮國康
【家庭篇】
笛子姑娘
「我將眼淚寄笛聲裏，直至來日再會時」 ——《笛子姑娘》
林家一門四傑，最疼比他年幼五歲的妹妹林雁妮。天意弄人，妹妺患癌早夭，悲痛的林振強寫了一首《笛子姑娘》悼念亡妹。
美提露
「從前在那炎夏裏的暑假，跟我爸爸笑着行」 ——《追憶》
十分崇拜父親，他是士巴汽水廠長，對配製汽水甚有心得，提子味汽水「美提露」便是其得意之作。亦因父親關係，他兒時住在汽水廠，過着汽水任飲的歲月。
情書
「知不知許多許多妳的片段，令我愛一生都也愛不完」 ——《愛不完》
妻子嚴素君是大學同學，讀書時不過電，分開後，「怕醜仔」林振強才主動展開追求，終贏得伊人芳心。嚴曾形容丈夫的情書「殺死人」，情歌歌詞更「攞命」。
洋葱頭
「當身邊的一切如風，是你讓我找到根蒂」 ——《每天愛你多一些》
曾在周刊發表《洋葱頭》四格漫畫，漫畫的角色造型，據悉跟足他的兒子林志煌樣貌創作，可見對兒子的愛錫。不過洋葱頭性格幽默爛玩好色，酷愛魚網絲襪。
Fender結他
「全賴有你，熱我心窩」 ——《全賴有你》
夾band年代，他渴望擁有一支Fender結他，但因價錢昂貴，父母不肯買，林燕妮用積蓄替他弄了一支，此事令林振強銘記於心。
【廣告篇】
黃與林
「風波雖各自去闖，而兩心未分過」 ——《千個太陽》
其廣告生涯，由加入黃與林廣告公司（黃霑與林燕妮開辦）開始，在那裏待了年半，因不想別人認為他倚靠家姐，於是決心到外面闖，轉投McCann-Erickson公司。
奸人糖
「昨日是我的豐收，好豐收」 ——《昨日》
好一句「奸人自有妙計」！林振強的成名作，便是邀請「奸人堅」石堅拍攝一系列喜劇感十足的潤喉糖廣告，為該品牌建立「奸人糖」形象，堪稱廣告界經典。
隻揪
「乜都拗，真谷爆」 ——《乜都拗》
創作人是孤獨的，亦難與人妥協。當年林振強已在廣告界打響名堂，偏偏有客戶不滿他的作品，胡亂竄改，有次氣得他險些跟客戶當眾隻揪！
怠工
「我要摘星不做俘虜」 ——《摘星》
最憎冇料扮四條老外上司。在Kenyon& Eckhardt廣告公司任職期間，他厭倦返工，每天待在公司附近的茶餐廳打躉，填詞、煲煙過日辰，要同事「勸」他返工。
創蘋記
「抬頭吧黑暗過會是晨曦」 ——《今日》
轉到壹傳媒工作，改變了林振強一生。03年台灣《蘋果日報》創刊，他與肥佬黎共同創作《創蘋記》廣告，全裸鍾麗緹躺在蘋果堆裏說「可以不咬蘋果嗎？」意念轟動台灣。
【填詞篇】
執着
「不知幾番跌倒，旁人斜視喝采，很不好過但我衝刺不改」 ——《強》
文人性格使然，對文字極執着，堅拒為歌手改詞，只有林子祥、陳潔靈及夏韶聲例外。而《笛子姑娘》手稿上，右下角有旁注「冇情冇愛字但可以講呢啲嘢。」似是提示監製放心。
靈感
「飛象兒共我，常在那天上漫遊」 ——《三人行》
以前深信晚上創作有「靈感」，後來發現只有「眼瞓」，故改為朝早創作，但最重要還是「夠瞓」。他的名言：「所謂靈感，其實和乳溝沒兩樣，都是硬迫出來的。」
Hea填
「但我厭倦，在某天已拒絕再玩」 ——《拒絕再玩》
千首作品之中，當然偶有劣作。林振強曾笑說為不知名歌手填詞時，明知歌曲播放率不會高，因此會敷衍了事，無謂浪費寶貴時間。
意淫
「苦悶，心極悶，到處有太多審判」 ——《反叛》
當年填寫《我要》（葉德嫻）和《壞女孩》（梅艷芳）時，被輿論批評意識不良，鼓吹性愛，對此林振強不屑一顧，認為衞道之士吃飽飯沒事幹。
金針獎
「來又如風，離又如風，但世事通通不過是場夢」 ——《如風》
林振強畢生填寫逾千首作品，佳作多不勝數，但直至03年他逝世後，港台才追頒最高榮譽「金針獎」予他，被批評是遲來的獎項。
【生活篇】
夾Band
「其實我天生奔放貪玩」 ——《最緊要好玩》
當年為識女仔，毅然拋下書本跑去夾band，組了隊「The Thunderbirds」，還在《星報》舉辦的Talent Quest奪得季軍。女泡不到，但贏了快樂回憶。
寂寞的心
「從不喜歡孤單一個」 ——《從不喜歡孤單一個》
又是為了識女仔，在《寂寞的心俱樂部》寫信求偶，為博取回信，還會用橙色、紫色信紙，其浮誇文筆就是這樣浸淫出來，只可惜文筆再好，也無功而還。
天主教
「再無所求只想我跟你，終於有天能重遇又再共行」 ——《太陽星辰》
小學就讀慈幼，十一歲時變成虔誠天主教徒，半夜要父親找神父來讓他懺悔，又要求搬到慈幼神修院住，家人也拿他沒法。過了一年多，他無聲無息地回家，之後不再上教堂。
和平
「戀，從無要分宗教，從無懼槍炮」 ——《薩拉熱窩的羅密歐與茱麗葉》
平日口誅筆伐庸官，但林振強是和平主義者，作品例如《薩拉熱窩的羅密歐與茱麗葉》、《理想與和平》、《加爾各答的天使》等歌曲都流露他對世界和平的渴望。
長髮
「那一束長髮，今天令我再憶起」 ——《長髮》
由當日夾band開始，便一直留着長髮，曾因堅持不肯剪掉長髮而退學。世上沒人夠膽動他半根頭髮，有次嚴素君替他電個爆炸頭，效果奇差，林振強即時黑臉。
陳奕迅：憾唱錯歌詞
陳奕迅
合作歌曲：《天下無雙》、《今日》、《昨日》、《每一個明天》
「林振強寫畀我第一首作品係《天下無雙》，自己有少少對唔住佢，我哋冇見過面，遺憾冇親自對佢講一聲對唔住，因為我唱錯一個歌詞：『難行日子不削我對生命眷戀』，自己將削唱咗肖，錄音我將歌詞摺咗，冇咗刀字，呢個係好唔專業，當時英國返嚟冇耐，中文有限公司有字讀字，未了解歌詞去唱，自己都幾內疚，當時自己係新人，冇執着搵林振強講對唔住，我問公司有冇得再錄？但公司話太遲做晒混音，當時唔敢太多聲氣，成為瑕疵，之後演唱會都唱番啱。除咗《天下無雙》，另一首《每一個明天》有句歌詞『無問獅子雙魚，前面有沒有驚喜』，我係獅子座，阿徐雙魚座，當時我哋拍拖，諗佢係為咗音好聽用獅子雙魚，定係check過我哋星座，我冇證實過，但呢個想像空間幾好，唔使畫公仔畫出腸。」
夏韶聲
夏韶聲難忘煲煙傾偈
合作歌曲：《空凳》、《結他低泣時》
「林翁真係才子，佢啲歌詞唔使改，一寫就中，85年佢幫我寫《空凳》識佢，首歌攞咗亞太流行歌曲創作比賽香港區冠軍，攞獎後我哋冇慶祝，喺新加坡嘅酒店房煲煙傾偈，大家傾社會話題，冇講娛樂圈是非，我從來冇聽佢講任何人唔好，佢食煙好犀利，一支一支駁住去，後期我移民美國大家見面唔多，最深刻係佢叫我夏公，我叫佢林翁，佢一直唔知我識畫漫畫，84年我出漫畫叫佢寫序，佢就話我原來仲有把刀。」
鄭敬基
鄭敬基：三日就交貨
合作歌曲：《酒杯敲鋼琴》
「我初出道好難排隊搵佢寫歌，當時唱片公司老闆同林振強係好朋友，先搵到佢寫《酒杯敲鋼琴》，當時以為要等好耐，點知佢三日已經交歌，我同黃寶欣收歌詞後都諗：『咁無厘頭嘅！』唔明歌詞講乜，唔知酒杯敲鋼琴乜意思？最近同黃寶欣講番，都覺得首歌好特別。記得有次喺錄音室見面，佢唔多講嘢好少笑好孤獨，俾好多人圍住就陪笑一兩聲、食一兩支煙，佢話我哋唱得幾好呀，係個鼓勵。」
麥潔文：佢好鬼馬
合作歌曲：《夜夜癡纏》、《電光霹靂舞士》、《勁舞Dancing Queen》
「記得當年喺《夜夜癡纏》之後認識，自己轉公司後好想搵佢寫歌，約佢親自出嚟傾，佢好開心幫我寫快歌，佢好鬼馬好啱寫呢類歌，佢嗰時幾新，大家交流吓，記得有次我同林憶蓮、小美上佢屋企食飯，大家都鍾意林振強，後期我淡出咗少接觸娛圈，有次喺商場撞到寒暄幾句，嗰時唔知佢有病，佢走咗先知，真係好可惜，始終大家都互相關懷過，我仍然覺得呢個人活生生，佢歌詞仍然喺度。」
劉德華
劉德華再會了念故人
合作歌曲：《再會了》
「記得林振強幫自己寫咗一首歌叫《再會了》，當佢離開當日內心就響起呢首歌嘅歌詞，希望可以喺呢個日子用音樂懷念故人。」
林志美
林志美：肯尊重意見
合作歌曲：《孤單先生孤單小姐》（林振強遺作）、《雨夜鋼琴》
「林振強嘅快歌寫到好熱鬧感覺，慢歌又好深情，佢好鍾意寫風、海等意境，佢工作態度好好，我唔肯定《孤單》係咪佢遺作，呢首歌寫城市人心態，佢寫得非常好，當時我哋冇見面，只喺電話傾，唔知佢有病，對佢離世感到好可惜，佢好有才華，工作態度又好好，《愛清風更愛telephone》呢首歌佢本來寫其他題材，比較寫實鼓勵，但我覺得唔啱自己用，想首歌sweet啲有少女味道，佢都肯改，很尊重意見。」
彭家麗
彭家麗：寫歌有深度
合作歌曲：《從不喜歡孤單一個》、《昨天．今天．下雨天》
「我超級鍾意佢啲歌詞，o依家樂壇冇乜邊個歌詞好過佢，自己每次返大陸，觀眾都要點唱《昨》，呢首歌講母親好感人，《從》就寫到兩個主角唔識表達愛，好現實嘅故事好有深度，呢首歌係我第一個獎，歌名已經好到位，印象中佢個樣好似洋葱頭，有啲搞笑，同沉實歌詞係兩回事。」
鄭伊健
鄭伊健：令歌曲完美
合作歌曲：《一個為你甘去蹈火海的人》、《直至消失天與地》
「林振強係一位我好尊敬嘅前輩，佢幫我寫嘅幾首詞都成為大hit嘅歌，佢嘅詞令歌曲更完美，到o依家仲係咁多人鍾意。填詞人係文字藝術家，而且填廣東歌詞唔易，所以我覺得佢好犀利。佢嘅離開我覺得好可惜，到o依家都好感激同懷念佢。」
林子祥：收收埋埋好啱Key
■林子祥和葉蒨文夫婦與林振強合作得最多。
資料圖片
詞神林振強生前有逾千首作品，跟林子祥（阿Lam）和葉蒨文（沙麗）夫婦合作最多，寫給阿Lam佔56首，是眾歌手之冠，包括《追憶》、《每一個晚上》和《愛到發燒》等，阿Lam追憶跟林振強合作時感慨說：「佢係好特別嘅人，諗嘢寫嘢都喺晒個腦裏面，收收埋埋同我好啱key，我哋合作得好好，唔需要講太多都溝通到，最鍾意佢寫《追憶》同《每一個晚上》，《追憶》更加寫到我同爸爸之間嘅感情，每次唱都好感動！」
兩人因合作成了朋友，有時會相約食飯，但每次都是傾工作，很少提私人事，阿Lam說：「到我知佢有病已經好後期，佢從來冇講自己患癌，唯一咁多年見佢成日食煙，佢話食煙係創作靈感，作為朋友，自己曾講笑勸佢：『你唔好食咁多，我唔想食二手煙。』佢就向第二度噴，後期佢唔喺香港住，又知佢有病，唔好意思搵佢，佢走咗真係好可惜，到o依家都冇邊個填詞人有佢影響力，佢講嘢又好笑寫嘢又精，真係嘥咗呢個人才！」
有藝術家脾氣
而沙麗演繹了林振強40首作品，包括《零時十分》、《200度》、《我要活下去》和《乾一杯》等，她說：「林振強係個好文靜嘅天才，有藝術家脾氣，試過唱《信自己》同《你要記住》時，覺得有一兩個歌詞押韻唔舒服，要求佢重寫，佢有少少竧，可能姓林都係咁，佢話我都唔識中文點識押韻。」
沙麗謂每次約林振強飲茶傾偈，他都很少說話：「佢最後幫我寫首歌《麻煩女人》笑死我，我問佢講邊個？佢叫我唔好咁敏感，最紀念性梗係《零時十分》，令我出名畀我事業。」
學術篇：朱耀偉教授讚獨樹一格
■林振強的笑容會永遠印在他的家人和朋友心中。
《壹週刊》圖片
林振強走了！黃霑走了！香港的一代填詞人相繼離世，早前專欄作家李純恩和唱作人周啟生都狠批樂壇已死，李純恩譏諷現今填詞人像文盲，結果與黃偉文爆發罵戰，究竟林振強的歌詞是否無人能代替？
專門研究香港流行歌詞多年、曾著有《香港粵語流行歌詞研究》、《詞中物：香港流行歌詞探賞》的港大教授朱耀偉接受本報專訪時說：「林振強影響好大，佢用好多填詞人冇用過嘅方法寫歌，如故事性嘅《追憶》，英文入詞嘅《零時十分》，場景嘅《絕對空虛》，題材大膽嘅《壞女孩》，有時又有電影感，當然仲有創意，佢擅用形象化嘅比喻，我覺得佢最出色嘅地方，係開創咗流行歌詞嘅寫法，自己最鍾意《細水長流》歌詞，情景交融感情細膩。」
朱耀偉
「有好歌冇人聽」
朱教授讚揚林振強的歌詞出色，於80年代令廣東歌進入光輝歲月，對於林振強死後這十年的歌詞變化，雖然有人批樂壇已死，但朱教授卻不認同：「好多人話香港歌曲越來越差，但我唔同意，覺得未必與水平有關，周邊好多環境影響，如國語歌興起，加上整體香港文化下降，唔係潮流集中地，好多學生覺得聽廣東歌唔夠in。」
近年很多新晉填詞人冒起，朱教授認為近五、六年歌詞題材寫法都很多元化，他說：「80年代林振強、林敏驄發展快，因為佢哋好多機會，近年多咗唔同風格填詞人，如林若寧、小克、林寶、梁柏堅，但市場萎縮冇80年代發展空間大，佢哋已經努力做，但事倍功半，同流行曲形象唔in有關係。」
朱教授覺得近年的黃偉文，在詞作上頗有林振強風格，他說：「黃偉文有天馬行空創意，仲有自己特點，好似寫同性歌曲又大膽，甚至超越林振強，所以我唔同意流行曲因填詞人死，我o依家都聽廣東歌，可惜有好歌冇人聽，唔知點搞，希望電影帶起流行曲，互相影響改變形象。」
林夕
【林夕銘記寬容填詞】
林夕封林振強為偶像，日前他接受商台訪問笑言自己筆名姓林，都因為太崇拜林振強，林夕說：「當時認為填詞人姓林，歌詞點都會好啲。」林振強輕鬆地認真做的態度，對林夕影響甚大，他說：「唔好咁緊張，眉頭唔好皺住寫詞，林振強第一首作品《眉頭不再猛皺》，呢首歌打開咗我心裏面道門，令我反思學習呢種態度。」
林夕最欣賞林振強的歌詞有故事性、富畫面感和情節性，如張學友《每天愛你多一些》，歌詞簡單直接，他說：「簡直將我寫嘅《你的名字我的姓氏》比下去，我雖然好歌頌愛情，但唔太識用文字去歌頌。」林夕更從林振強的歌詞上，學懂運用廣告的技巧，在歌詞中融入宣傳口號，如陳百強的《摘星》、林子祥的《生命之曲》和林憶蓮的《醒醒》，最後他送上張國榮《春夏秋冬》給林振強，慨嘆四季如輪轉，希望大家學習林振強輕鬆生活的態度。
【潘源良：永記正能量】
填詞人潘源良跟林振強同行卻不是敵國，兩人還是惺惺相惜的好友，阿潘仍深刻記得兩人首次見面的情況，他說：「當年喺亞太流行曲創作大賽，佢主動走埋嚟同我講，好鍾意我寫畀林子祥嘅《邁步向前》。」
阿潘指林振強是一個顧家的男人，當年為了讓兒子有好環境讀書，選擇了低調地移民，阿潘很尊重好友的決定，對於林振強不幸患癌，阿潘慨嘆說：「記得喺作曲及作詞家協會晚宴，我發現佢面色偏黃，大約一星期後佢仲停咗一日專欄，我即刻打電話畀佢，因為我知道佢從來唔會脫稿，佢話畀我知身體唔太舒服，得到一個要長遠搏鬥嘅病。」
之後林振強閉門在家休息，兩人由出外飲咖啡轉了到林家吃飯聊天，情況維持了一年，林振強就走了，阿潘說：「雖然我冇送佢最後一程，但佢嘅正能量永遠留喺我心裏面。」
潘源良
倫永亮
【倫永亮筆袋憶故人】
03年12月1日，林振強喪禮在薄扶林天主教露德聖母堂舉行，這天，倫永亮彈奏《千億個夜晚》，陳潔靈唱《千千闕歌》送故友最後一程。林振強為倫永亮寫了《鋼琴後的人》、《給戀愛喝采》、《休止符》、《因你極難代替》等歌，相隔十年，倫永亮仍保存林振強生前送他的筆袋，他說：「最感謝佢幫我度身訂做《鋼琴後的人》，佢覺得我似Elton John，改寫咗我歌手形象。」
對於好友不幸患癌，倫永亮說：「佢有日約我上屋企食飯，成三四個月冇見問佢點？佢坦白話：『我大件事！』原來佢做咗化療好番，但嗰晚食完飯，個幾星期後佢話擴散，之後入咗醫院高度隔離病房，寶媽（林太）話佢都係隔玻璃傾偈，冇可能直接照顧佢，自己諗起都失落！」
陳潔靈至今仍記掛這位老友，讚揚他是當代超卓詞人，曾為她寫《風是冷》、《千個太陽》、《白金升降機》等歌詞，她說：「記得02年我幫金帆獎做司儀，嗰晚最後一次見林振強，後來知道佢病一段時間，但冇騷擾佢，佢係我哋生命寫照，用堅毅精神去行最後嘅路，用幽默表達人生困難，佢嘅文字畀我好多意念，佢係好正面嘅人，用廣闊胸襟寫人間情愛，教我哋面對人生，令我都好堅強。」