《求愛大作戰》「綠妖」許嘉浩Karl玩自虐

《求愛》「綠魔」Karl 笠綠膠套玩自虐

近期最hit嘅顏色係…..綠色!!原因就係無綫節目《求愛大作戰》嘅形象指導「綠妖」Karl Hui(許嘉浩),自從首集佢亮相之後,網友即時瘋狂圍插。不過「綠妖」完全無視網友同觀眾插爆。

今日1點幾,綠妖就上載另一張綠色相片到facebook同微博,相中見到「綠魔」被一團綠色塑膠套套住全身,加上其enjoy表情,口味甚重。佢話:「Oh! 我可能被「綠色」綁架了…」有網友就留言話「絕對該開拍《綠魔大作戰》,我們所有成員可以客串一角虐待你嗎?」又有網友話::「你好明顯在博x!送你一程。」唔知點送呢?

《求愛大作戰》嘅形象指導「魔」Karl Hui(許嘉浩)
Karl,你真係咁鍾意做綠妖?定係俾《捉鬼敢死隊》嘅鬼口水噴中?

Karl扮翠玉瓜行騷 途人驚呼「綠魔!」

又係呢個《求愛大作戰》「綠魔」(其實係咪應該叫綠妖好啲?)形象顧問Karl,佢今日率先佔中,喺中環環球大廈對出行人天橋行貓步。之前都預告過佢會騷長腿,但估唔到嘅係,綠妖竟然放棄咗佢嘅野性曲髮,改用直髮示人,當然,露長腿是常識吧。但睇個背影,的確分唔到男定女。

有途人(係咪真係咁啱遇到定特登撞佢嘅呢?)見到換上翠玉瓜綠嘅綠妖,驚呼﹕「綠魔呀!」唉呀,都話係綠妖囉;嗌「綠魔」會令人錯以為James Franco嚟咗0架!

綠妖Karl非常專業咁,喺眾人投以好奇目光下泰然自若行貓步,仲嚟個360度華麗轉身,再挨落碌粗柱度,扮柱男。

《求愛大作戰》嘅形象指導「魔」Karl Hui(許嘉浩)
「翠玉瓜」突襲中環行貓步。

柱男
柱男

《求愛》再收投訴

無綫外事部副總監曾醒明表示,無綫方面再就真人騷節目《求愛大作戰》收到兩宗投訴,兩位形象顧問一人一個,其一係質疑節目導師Queenie(陳莉敏)未有條件擔任美容導師;另一投訴指「綠妖」Karl不男不女、不適宜擔任形象顧問。對於節目參加者說話粗俗(其中一位參加者Rocky衝口而出話:「我都好『乸』鍾意幫人!」)曾醒明表示咁樣先顯得節目有真實感喎。

都係嗰句啦,觀眾越鬧,越要睇。《求愛》第一集收視,平均得18點(約115萬人次收看),第三集(即噚晚寸嘴港女Sharon一集)已有21點收視(約134萬人次收看)。問曾醒明會否擔心投訴同樣穩步上揚?佢話:「其實預咗,第一輯嘅時候仲多!」