《求愛大作戰》21歲Whitney結婚 宣佈已嫁Mia陳靜儀前夫

真係峰迴路轉,離奇過離奇……之前參加《求愛大作戰》同幾位「盛女」爭仔嘅Whitney——即係最索嗰個呢,今日突然宣佈,佢已經同男友、即Mia前夫莊家傑,結婚了!唔止post埋婚紗相,就連facebook嘅status,亦已於8月21號(周三)更新為「結了婚」。

Whitney其實早於21號、即更新關係status之前,貼咗張單人婚紗相,問道:「假如我嫁了…」,當時大家未有為意,以為Whitney只係貼代言廣告相,但亦紛紛留言謂,Whitney今年只係21歲,咁就話嫁,未免太快。

未幾,Whitney更新狀態表示「結了婚」,似乎唔係講玩,有份參加《求愛》嘅阿佳、Carol,以及《盛女愛作戰》嘅Mandy都紛紛俾like。

噚日,Whitney又貼咗一張單人婚紗相,但始終唔肯多講婚事,亦未知係咪真係嫁俾Mia前夫莊家傑。直至今日下晝五點左右,Whitney終於忍唔住,貼咗佢同老公仔……真係Mia前夫嘅婚紗相,情深款款謂:「I am you You are me We are ONE。結婚了,我會努力讓你成為最幸福的男人。」相中Whitney輕挽莊家傑臂彎,成個頭挨落去,一臉幸福。網民議論紛紛:「咁後生結婚!諗清楚未?anyway恭喜你!;-)」、「這算閃婚嗎?祝幸福快樂! no regret~」

有人恭喜,亦有人擔心。莊家傑同Mia育有兩名小朋友,有網民寫道:「但那男的不是有兩個小朋友嗎?諗清楚未?」不過Whitney就一直未有回應。

《求愛大作戰》Whitney嫁Mia前夫
曾參加《求愛大作戰》、被指樣貌成個翻版Mia(陳靜儀)嘅Whitney,宣佈已經同男友、亦即Mia前夫結婚。

《求愛大作戰》Whitney嫁Mia前夫
宣佈婚訊前,Whitney於fb自貼婚紗相,話如果結婚,大家點睇。
《求愛大作戰》Whitney嫁Mia前夫
貼完相冇耐,Whitney就更新關係狀態變成「結了婚」。
《求愛大作戰》Whitney嫁Mia前夫
Whitney婚紗照。
《求愛大作戰》Whitney嫁Mia前夫
呢位就係新郎哥,亦即是Mia前夫。
《求愛大作戰》Whitney嫁Mia前夫
Whitney愛的宣言

貌似Mia 老公被笑品味一致

拍攝《求愛大作戰》約莫都係大約半年,當時喺龍目島上演嘅大結局上,Whitney最後係揀咗大隻仔Rocky,但喺結局播出之前,Whitney已被拍到同同Mia前夫莊先生攬腰兼摸pat行街街。事後Whitney直認對方係佢男友。最搞笑仲係,Whitney同Mia真係幾似樣,更有人笑指莊先生「品味如一」。

雖然係咁,但Whitney仍然勇敢去愛,仲話:「唔知佢(Mia)咩樣,睇咗唔開心唔好睇。」又話認識第二日,男友已經同佢坦白自己結過婚同有小朋友,所以唔覺得被對方呃。

唔使講,Mia當然係寸爆兩人,唔止質疑Whitney參加《求愛》嘅資格,仲直指「姣婆遇著脂粉客」。但Whitney呢?話之你,上月底先俾人見到佢同莊先生一齊搭港鐵嘅港島線,兩個人企近門口不時細聲講大聲笑,Whitney仲成日挨貼嗰位男士,攬埋一嚿冧到暈,一個月唔夠就話結婚喇。莊先生冧女,特別係貌似Mia的女,真有一手。

不過你精Whitney都唔笨,靠住自己喺《求愛》有啲知名度,於是開始做美容用品生意,靠YouTube同instagram去sell,自己做埋生招牌,都幾叻女0架。係喎,之前死敵——《求愛》蟻哥Sharon咪喺facebook要求化妝服裝贊助嘅,你不如贊助下佢囉。

分唔分到邊個係Whitney?邊個係Mia?
分唔分到邊個係Whitney?邊個係Mia?

Mia喪寸前夫:根本唔配做男人

16歲、仲係讀緊F.4嗰陣,一次同朋友唱K,認識咗前夫莊家傑,未幾仲「搞出人命」,被迫輟學結婚生女,之後再誕下一子。當時有報道為莊家傑「起底」,指對方係大埔屋邨仔,同後來Mia嘅其他男友如郭秀雲之子龐錢景峰及內地神秘富二代等身家身份都差天共地。Mia曾表示,幼子出世之後,兩人成日為無聊事嘈交,最後都係離婚收場,仲係Mia主動提出。後來Mia就當上「模媽」賺奶粉錢。

雖然話同前夫各奔前/錢程,但Mia每次提起莊家傑,都好大怨氣。之前被問到對《求愛》Whitney撻著前夫點睇,Mia劈頭就話「姣婆遇著脂粉客」。後來一次做訪問,問Mia係咪覺得前夫係「脂粉客」,佢話:「暫時未改變到呢種形象。」至於話Whitney係「姣婆」,Mia解釋只係稱呼令報道好睇。

今日Whitney公佈同莊家傑結婚,Mia點會唔知?佢喺微博同instagram忍唔住寸爆:「一個男人可以沒車,沒房,甚麼都沒有,但唯獨是不可以沒有責任感,一個連責任感都沒有的男人,根本不配做一個男人。」

早幾日,亦即亦Whitney宣佈婚訊前兩日(19號),Mia更於微博貼咗一張「黑圖」,唔知哀悼乜嘢,寫道:「有些時候…心情真的可以用言語表達出來嗎…」莫非Mia收到風、知道前夫再婚了?

Mia喪寸前夫:根本唔配做男人
前夫再婚,Mia幾日前疑似收到風,竟然……咁樣贈興。
Mia喪寸前夫:根本唔配做男人
今日,Mia更加白,擺明喪寸前夫唔配做男人。

Mia專釣富二代 新仔係潮汕首富之子

雖則話24歲嘅Mia鬧爆前夫冇責任感,依家又走去再婚,但其實Mia本人都好努力0架,密密釣金龜,好似之前就有個龐錢景峰,可惜俾男方家長棒打鴛鴦;之後又有個18歲內地富二代,仲話係學生哥嚟0架,之前更盛傳Mia收咗人哋送嘅巨型欖形鑽戒做生日禮物,兼去男方屋企唱K,再雙雙去跑馬地Amigo嘆燭光晚餐。網傳呢位富二代爸爸係潮汕首富,幾百億身家。不過Mia已否認戀聞。

話口未完,早前Mia又被拍到有新歡,都係富二代,約20歲左右,有報道指佢係曾任泉州及晉江人大代表洪義鋒之子、暱稱阿炳。早前男方更來港陪Mia,兩人公然於機場錫錫,及後Mia更同男方飛返廈門,過其二人世界。

據稱Mia呢位新歡,家族經營棉産生意,屋企喺廈門有頭有面,阿炳間公司代理嘅産品,仲有份贊助Mia演出電影《喜愛夜蒲2》,就係咁識咗,好快撻著。阿炳仲好貼心咁,訂造Tiffany鑽鏈送女友,早前更請Mia同佢家姐去峇里島度假,爭取共聚時光。之前Mia都承認咗同阿炳蜜運中。

不過近日佢情緒似乎有啲波動,未知是情海翻波定係因為前夫再婚,日前Mia於微博寫道:「一個女人如果連自己的體重都控制不了,何以掌控自己的人生。小夥伴們是時候努力奮鬥,不減肥的女人只有兩個下場,賣不完的地攤貨和逛不完的菜市場。我不要。瘦子才有末來。」嘩,講到咁呀………

模媽Mia陳靜儀早前獲新男友阿炳邀請到峇里島度假,大晒比堅尼。小圖為Mia過氣富二代男友陳俊宇
Mia早前獲新男友阿炳邀請到峇里島度假,大晒比堅尼。小圖為Mia過氣富二代男友陳俊宇。