男人都是襟老的！當年的古惑仔「浩南」鄭伊健、「山雞」陳小春、「包皮」林曉峰、「大天二」謝天華和「大頭仔」錢嘉樂，十多年後的今天五子重聚，依然保住樣子和身形。不過，他們的江湖之地卻由電影變了舞台，放下西瓜刀改拿咪高峯，跟觀眾集體回憶消失的光陰：「來忘掉錯對來懷念過去曾共度患難日子總有樂趣」。

撰文：余燕儀

由鄭伊健、陳小春孭飛演出的電影《古惑仔之人在江湖》是96年的作品，現年45歲的伊健、46歲的小春和謝天華等雖然青春已逝，但兄弟間那團火仍熊熊燃燒，今年五子終於再合體，但戰場卻改為紅館舞台，小春說：「2013年係好年，要結婚嘅結咗，要生仔嘅暫時生咗，所以決定今年開騷。」未有計劃做爸爸的伊健，被追問幾時生B則落閘說：「呢啲唔好講！其實呢個演唱會諗咗好多年，今年時間非常好，大家都成熟咗。」

■古惑仔跑江湖十多年，如今放下西瓜刀改拿咪高峯

■小春（右）今年剛榮升爸爸，人夫鄭伊健卻未有計劃生B。

■96年電影《古惑仔之人在江湖》掀起古惑仔系列熱潮。

■古惑仔09年重聚獻唱《友情歲月》為台灣水災籌款，間接促成今次的演唱會。

■鄭伊健去年開騷，邀好兄弟助陣。

標童角色上身

原來演唱會籌備成功，曾志偉出了一分力，伊健說：「台灣水災嗰時志偉叫我哋賑災，當時好多藝人好亂，我哋唔知表演乜，志偉就叫我哋唱《友情歲月》，大家反應好好，由嗰時開始，我哋諗係咪有機會上台表演？但由電影變舞台唔係易事，今年志偉又聽到我哋話搞，佢就話：『好吖，不如我負責約你哋出嚟，大家三口六面傾。』呢個前輩好有心，佢話古惑仔係電影界一樣嘢，點都要做。」

演唱會將歌名《友情歲月》掉轉，取名為「歲月友情」，小春說：「包括好多歲月出現，友情、爭拗、喜愛，台上點做都離唔開肢體語言。」小春還用山雞腔搞鬼說：「或者標童囉，臨上台前標童攞番角色上身，大家努力搞啲汁出嚟混杯好嘢飲，咁多年我哋友情唔需要嘥時間維繫，好似入咗教會，大家唔會爭風吃醋，唔會要贏你或者同你鬥勁。」

搞騷方向一致

娛樂圈就是一個戰場，男人的友情並不容易建立，嘉樂坦言：「呢行好多人，有啲好奇怪，識咗20年都係點頭打招呼，我哋呢班人第一次拍戲，幾好傾喎，傾咗20年都咁好傾，拍戲停咗十幾年，但感情冇停過。」林曉峰認為他們之間的友情，全賴一個「信」字，小春聞言即點頭和議說：「輕微地討論一定有，唔同意見一定有，但唔會爆青筋，大家好信任，唔會覺得佢點我，唔會行開去屙尿時諗：『有冇講我壞話？』」

友情行先義字當頭的五子，面對實際的金錢問題，歌酬是否平均分配呢？小春直言：「呢個騷只係諗點好玩，有呢個機會令我哋走埋一齊，同錢冇掛鈎。」林曉峰更說：「我直頭想投資番落去。」伊健深有同感說：「好似我咁樣，以前我做演唱會都將歌酬擺番落去，想個騷好睇就要咁，我哋方向接近一致。」

五子裏面除了伊健和小春身兼歌手身份外，無綫舞蹈員出身、當年跟郭富城是同學的謝天華，92年與小春、朱永棠組成跳舞組合風火海，曾經迷倒不少歌迷，出道逾20年的謝天華，等到今日才有機會踏上屬於自己的紅館舞台，他感觸說：「嚴格嚟講，今次係第一個真正自己有份嘅演唱會，緊張之餘都有興奮，不過放低咗跳舞好多年，只係早排返大陸參加比賽先練吓。」

化妝：Shuen Kong of Will make up、Andy Leung of D-mop Beauty by ND&Co.
髮型：Jacky Ma of HQ
服裝：ACNE of I.T、Marc Jacobs of I.T、Markus Lupfer of I.T
場地：彌敦酒店

奀皮仔抗拒滑稽

■（左起）跳舞出身的謝天華，與錢嘉樂及林曉峰首次擁有屬於自己的演唱會。

動作指導和演員出身的錢嘉樂，今次又可以在紅館表演甚麼？他說：「我以前都有客串伊健、左麟右李演唱會，今次第一次自己有名孭騷，以前唱漏歌詞跳錯舞步都係玩吓箒，今次想認真試吓唱歌跳舞，希望真係成為一個音樂家，五個當中我最少經驗，阿Lo（林曉峰）唱歌都好聽，錄主題曲時先知自己好多嘢唔識，所以跟陳光榮學唱歌技巧。」

林曉峰做過DJ、演員、司儀，就是沒推出過唱片，他說：「我都係出一分力，用到我唱歌，需要我配合跳舞，我就會去做。」對於嘉樂爆他唱歌好聽，阿Lo笑說：「呢啲觀點與角度，每朝早照鏡我都覺得自己靚仔，古惑仔好多歌都係合唱，大家都識唱，我哋好認真唔係搞笑，呢個組合好奀皮，我哋奀皮咗咁多年都仲喺度，唔係玩滑稽。」