戀愛，是人生的必經階段，只是戀愛有快樂時，但亦有痛苦時，沒有快樂的愛情，倒不如保持單身，反而令自己更加快樂。
這一刻的康華，屬於後者。
康華說以前的她是戀愛大過天的小女人，快樂的愛情令她變得積極快活，但有問題出現時，就會為她帶來了一片又一片的負面情緒，令她難以百分百地投入工作。
「以前拍拖，開心當然做咩事都特別提得起勁，但相反有時嗌交，我就會變得好唔開心，完全投入唔到工作，好影響我工作。所以我依家情願單身，呢幾年我都係自己一個人……原來我都一樣咁快樂。」
看到這裡，大家應該會以為，沒有人追才是康華單身的主要原因，但查實自從07年她決定不與TVB續約，繼而轉戰內地後，身邊一直不乏追求者，只是真命天子始終還未出現而已。
「唔知點解，追親我都係細過我，唔係細一、兩年嗰種，而係超過20年，姊弟戀我真係接受唔到，我希望我鍾意嘅男人，可以lead到我，既然呢個男人未出現，我亦唔急在一時啦。」
單身？使乜驚呀！
近期康華曝光率奇高，一連三套電視劇《單戀雙城》、《舌劍上的公堂》及正在熱播中的《守業者》都見到她的演出，尤其是《守》，她飾演的二小姐雖然第二集就遇害離世，但整套戲都見到有關她的回憶場口，尤其是在劇中她與黃嘉樂有非常大膽的演出，是她在香港熒幕最大膽的一次。
香港拍劇最開心
沒有追看國內劇集的讀者，或者不知道康華於07年轉戰國內之後，已成功進佔不少劇集的女主角位置，拍檔都是國內的一線男星例如王學圻、孫紅雷。在國內拍劇出名舒服又人工高，所以當我知道康華突然回流香港拍電視劇，都覺得非常愕然。
「其實我冇諗過返香港拍劇集，只係我一直都喺香港住，有劇拍先返咗大陸，之前北京拍完劇返香港，就搵班TVB舊朋友食飯聚舊，有監製知道我返香港，就同我講有個角色好啱我做，叫我返去客串。我覺得反正大陸未有劇開，返去過吓戲癮都好呀，又可以同班舊同事聚舊，咁咪應承囉。點知拍吓一部，拍吓又一部，咁啱又接住連續咁播。
依家拍劇心態唔同咗，以前會諗好多嘢，有幾重戲份？有冇得發揮？配角會配到點？有幾多對白？但依家唔同喇，我可以揀自己鍾意嘅拍，我又唔係冇工開要返去拍劇，心態好自然唔同咗。而且香港始終係我嘅家，雖然拍大陸劇我做主角，人工又高好多，但喺香港拍電視劇我只係配角，但我真係開心好多。」
拍床戲請教阿佘
離開TVB五年，康華以部頭形式回歸TVB，可以拍一些她喜歡的劇集，就像熱播中的《守業者》，康華就獻出了香港熒幕的「第一次」，在劇中除了與三名男藝人有感情線之外，還有一幕挑戰香港電視尺度的激情床戲，完全挑戰康華的底線。
「初時我都覺得奇怪，點解導演要我一早返去開會傾點樣拍，原來呢場戲係好激，有動作又要大真空大露背，不過導演真係好有心，呢場戲佢當拍電影咁拍，淨係打燈都搞大半日。初時我覺得好奇怪，乜依家電視尺度可以去到咁激？但我見導演咁有心拍，所以最後要我真空露晒成個背脊都冇問題。只係拍完之後我開始擔心，拍得咁激會唔會俾人鬧？於是我就打俾佘詩曼問佢意見，因為佢之前都試過拍《天與地》都係大露背，佢都話冇問題，之後連服裝間姐姐都話之前高海寧都係咁拍，我先至放心。不過可惜監製最後都同我講，因為8點半檔播，應該唔可以足本出街。之後我同黃嘉樂見到導演，都講笑問導演有冇足本版可以睇吓，最好俾我keep一個copy，我相信應該唔會再有下一次。
我都好耐冇試過咁性感，以前我好明白自己嘅定位，又唔係女主角，好自然會性感少少，如果唔係人哋（指傳媒）點解要報道妳？我以前會好介意點報道寫咩，但依家我都唔理喇，有訪問有時間就做，唔會問咩版位、做幾大篇幅等等……因為我依家真係鍾意做戲，宣傳留俾其他人啦！」
相識康華超過十年，眼前的康華靚了又快樂了，男人的直覺告訴我，她應該在蜜運之中，但得出的答案，證明男人的直覺果然不及女人的直覺快而準。康華說這一刻的她，戀愛可能是一種負累，單身反而令她更投入工作，更享受快樂。
相約首日即求婚
「靚咗係因為返大陸拍劇時間好充足，有適當休息時間，加上好多場口都見到自己，我就開始留意點樣可以扮靚啲，以前我都想留意，但好多場戲出一出場就唔見咗，想睇清楚啲都唔得啦。
我好多年冇拍拖，唔係唔想拍，而係我係好容易俾感情影響工作嘅人，戀愛有開心亦有唔開心，以前拍拖，遇上唔開心事就會好影響我工作，好似同男朋友嗌交，我會好唔開心，要我拍開心場口，我都可以，但拍完之後我又會回復唔開心嘅心情，係好影響我演出。
其實我返大陸拍劇之後，都有人追過我，但可惜全部都係細過我，仲要係爭二十年以上，我真係接受唔到。後來我先知道原來同我以前拍港劇有關，我以前角色唔係壞女人就係黑社會大家姐，呢個形象好深入民心。當我返到內地拍劇，好多人都以為我係一個好cool、好硬淨嘅女仔，點知相處落發現原來我係小女人一個，年紀大人接受唔到我原來咁陰聲細氣，年紀細過我嘅就覺得我好得意，原來咁玩得。之前試過有個細我超過二十年嘅男仔，第一日食飯就話要同我結婚，嚇到我唔識回應。其實我要求好簡單，我只係想要一個可以教到我嘢嘅男人，最重要係精神上波幅唔好咁大，因為我真係好易受另一半影響。」
單身一樣很快樂
有人享受戀愛，亦有人享受單身。曾幾何時，康華亦是一個戀愛大過天的人，回復單身的時候亦很不習慣，但久而久之，單身反而令她更加懂得享受人生，更加享受自由自在，自己話事的單身歲月。
「我係一個好鍾意遷就別人嘅人，唔好話朋友，就算係男朋友我都一樣可以好遷就，可以話係佢話東就東、西就西，完全冇晒自我。經過咁多年單身，我終於發現可以做返真正嘅我，我會諗點解以前我會咁就得人，以前我以為自己好開心，但原來唔係，原來我係辛苦自己，依家我想做咩事都係以自己為先，感覺真係好開心，原來單身都一樣咁快樂。好似我呢個月鍾意就留喺香港拍劇，下個月大陸有劇開我又可以話去就去，以前有拖拍我會諗好多嘢，要同男朋友交待啦、佢會唔會唔鍾意我返大陸啦、咁大家一個香港一個大陸，會唔會有問題出現啦，依家……我只係需要同自己交待，所以拍拖真係唔急，我信個天會幫我安排，如果個天要我冇男友，咁我咪繼續單身快樂囉，哈哈！」
披住狼皮的羊
上一期訪問黃智賢，他花了很多年向外闖，才洗甩《真情》阿海的「海味」，這一刻的康華亦一樣。她仍在TVB拚搏期間，角色不是壞女人就是黑幫大家姐，令她過了一段很痛苦的歲月。
「以前好多角色都同我性格相反，我要用演技去補救，每日入廠就要諗自己要點樣扮惡扮奸去害人，次次拍完都好攰。我初初返到大陸拍劇，個個都以為我好似大家姐咁硬淨，冇人敢埋身撩我傾偈，之後相處得耐咗，先知我係一隻披住狼皮嘅羊。」
沒錯，我熟悉的康華絕對是一隻綿羊，就像這次訪問，當我聽回手機錄音時，她的聲音幾乎等於零，我要將音量開到最大兼全神專注，才勉強聽到她的聲音。
現實中的康華，其實比女人更加女人。