去年夏天，49歲韓國大媽鄭多燕的健身舞風靡香港。唔講唔知，60歲的韓馬利，自小練得一身好舞功，芭蕾舞、中國舞，甚至Hip Hop、Funky同Zumba都跳得好，現時更跳埋瘦身舞。

活力十足的韓馬利，廿多年來keep住兩份工，當演員外，更擔任i Dance跳舞學校的行政總監。難怪體重一直keep住1百磅，23吋黃蜂腰，羨慕死唔少後生女。

韓馬利已經步入花甲之年，不過活力比很多年輕人還要充沛，狂舞一個鐘也不喘氣。

韓馬利年輕時非常任性，愛情至上等嫁，雖然 21歲已當上《陸小鳳》女主角上官飛燕，但對事業毫無野心。 30歲已經歷了兩次婚姻失敗，她說：「如果冇之前嗰兩段婚姻，可能我依家仲係一個好唔掂嘅人。」

男導師林泳的舞步很快，但韓馬利仍然能夠緊貼，唔輸蝕俾後生仔。

去年底韓馬利曾經跟兩名男導師出騷表演，迅即走紅，她的勁舞令在場觀眾看得目定口呆。

49歲的鄭多燕，因為跳健康舞馳名，不過相比 60歲的 Mary姐，後者 keep得更纖瘦。

當年韓馬利是電視劇《陸小鳳》女主角，又主持《 K-100》，多線發展。

生活冇安全感

韓馬利低潮時，幸得好友鄭明明陪伴，令她慢慢開竅。鄭曾向她說：「你唔可以靠 TVB一份人工，有一日公司唔同你簽約，咁點算？」自此韓馬利不斷自我增值，考獲國際美容師牌，她與現任 i Dance老闆 Grace搞完美容生意後，再合作搞跳舞學校。

「我由細到大都冇安全感，所以我一直 keep住做兩份工。依家呢份工可以做番我喜歡做嘅嘢，因為以跳舞為主。我鍾意講嘢、識朋友，每一日返工跳舞外，就係同客傾偈，搵到好多滿足感。」
韓馬利一直以為打兩份工身心亦能取得平衡，奈何三年多前竟患上焦慮症。

「有一日突然間食食吓嘢，手震、心跳、冒汗、唞唔到氣，好似俾石頭壓住，我唔知咩事。去睇家庭醫生，佢聽完我講病徵叫我走，話只係心理作用。我嗰時幾乎企喺度都冇力，仲有幻聽，聽到有把聲講『你冇鬼用?！你死咗去啦！你知唔知你傻咗喇！你要入青山！』有幾次過馬路，我都想衝出去，不如死咗算數！」

最後韓馬利得到教會的姊妹幫忙，逃出鬼門關，「佢係心理醫生，話俾我聽係焦慮症！但我從來冇擔心過任何嘢……佢話香港人大部分都有焦慮症，係因為對自己要求好高，同自己競賽。當你做唔到，會埋怨自己，覺得自己冇用……」

60歲的韓馬利皮膚甚有彈性，談笑風生的她，沒想到曾患過焦慮症。

雖然韓馬利沒有教跳舞，但是她仍會不時返 i Dance與客人交流心得。

蘇志威是 i Dance舞蹈總監，學校內很多舞步都是由他創作的。

跳舞醫焦慮症

除了舞蹈學校，韓馬利仍然繼續拍劇，剛播完的《水髮胭脂》她也有份演出。

經歷過焦慮症後，韓馬利才重新認識自己，學會接納自己唔係萬能。「冇咗健康，銀行有幾多錢又點！我嗰時有病（焦慮症），一粒藥丸都冇食過，因為跳舞可以抒發好多唔好情緒，仲會練到注意力，對個病好有幫助。」運動不但有益身心，又 keep到身材。難怪她一周最少跳三日，每次個半鐘，年過 60跳足一粒鐘都唔喘氣，勁過唔少後生女。