無綫劇《仁心解碼II》今晚大結局，套劇掀起過唔少話題，梗唔少得係第一集嘅強姦戲份——變態李家聲大戰學生妹石天欣。兩者分別係87年同大前年嘅藝訓班畢業生，因為呢幕戲拉埋一齊。佢哋日前分別接受訪問，廿歲出頭嘅天欣願意接受新挑戰；四十有七嘅家聲就默默耕耘。
撰文：何慧斯

石破天欣，一姦驚人。廿歲女嘅石天欣（Tina）三年前藝訓班畢業，唔覺唔覺拍咗近五十套電視劇，由壞學生、護士、銀行職員到妓女都扮演過，今次喺《仁心解碼II》仲俾李家聲姦埋㖭！問佢拍之前有冇掙扎過？佢笑笑口話：「當然先問使唔使好暴露，直到埋位拍先知道可能有啲拉扯，同家聲拍嗰日已經講好大家會點樣做，跟住到埋位都豁出去。」究竟點先算豁出去？唔通……原來Tina投入到拉傷條腰，之後拍《巨輪》再被「強姦」，焗住戴腰封上陣，佢又笑笑口話：「我啲角色都唔會係好正常，不過我鍾意，最緊要同我唔同。」

■石天欣青春逼人，應該大把機會。攝影：仇志德

TVB劇來來去去都係強姦戲，以往徐子珊、高海寧俾人姦，例牌惹嚟好大迴響，問佢想唔想好似佢哋咁大迴響？佢又笑笑口話：「我冇諗咁多，冇乜期望，我又唔似佢哋咁好身材，只係諗第一集應該都有人睇啩，只要公司肯畀機會我都會繼續試，只要唔係太暴露，因為我身材冇人哋咁好，如果叫我着得好暴露咁見人，我擔心太瘦嚇親觀眾！」

再畀三年試

家陣Tina上緊位，梗會爭取機會不斷試，但原來當初都諗過轉行唔撈，今次終於唔笑：「之前覺得做咗呢行好似睇唔清楚自己做到啲乜嘢出嚟，本來公司話想同我續約，我覺得反正仲有年幾先約滿，咪畀自己再睇真啲，諗清楚有冇得繼續行落去，睇吓觀眾反應，起碼唔係話有一半憎你，所以唔想白費之前三年嘅心機，上星期同公司續約，畀多三年自己試。」講完又笑番。

■李家聲同石天欣嘅一場強姦戲，都引起過唔少話題。資料圖片

李家聲默默耕耘冇人理，偏偏喺《仁心解碼II》扮變態佬就有人留意，係咪好諷刺呢？之不過呢個小小漣漪已經回復平淡，家聲亦都睇到化晒，佢話：「做到係應該、好平常嘅事，公司唔會刻意做任何嘢令你會繼續上，每次你好開心諗住升呢，或者期望另一個挑戰時，跟住又會落番嚟，當你不斷有咁嘅衝擊，就唔會期望公司覺得你好戲將佢升級，呢啲夢無謂繼續發，發幾日就算！」

撈咗咁多年，家聲梗知自己企喺乜嘢位置，睇通睇透就唔會執着：「呢行唔係一分耕耘一分收穫，做番基本演員咁，為騷而生存。」網民讚佢回復電影《屯門色魔》當年勇，不過佢就話：「真係冇諗過，自己都唔記得，我只係集中諗吓場戲點做，後尾睇番先記得，所以做好係應該，唔好就要告老歸田啦。」

翻查資料，家聲係87年藝訓班畢業，多年嚟經歷過高低，佢話咁都睇唔通就唔長進：「我喺level5，唔會同其他level去比，喺呢個level活得精采，比較嚟做乜？恨嚟做乜？不如做好本份，做精采啲畀人睇，望番轉頭，同期嘅有啲人差過我，唔好運嘅亦有，人有我有咪得囉，又唔係好慘。」

■李家聲輕易做出一字馬動作，仲得戚舉V㖭！
攝影：陳慧安

得閒幫細路

家聲多年前喺《阿旺新傳》扮巴基斯坦人俾周潤發點名讚賞，威過一陣，今次喺《仁》劇再獲關注，問佢期望下次轉變幾時出現？家聲話：「我今年47歲，人生仲有好幾個十年，變與唔變都係咁做，冇得去咪簡簡單單去做，呢個可能係我嘅際遇，有時間咪去幫吓啲細路仔，喺另一渠道搵樂趣。」佢口中嘅細路仔，原來係藝訓班學員，幫到人又令自己有價值，咁就唔會有怨氣啦！