碧咸帶愛妻紋身訪港 強迫酒店消毒

近日唔少外國紅星先後訪港,繼畢彼特(Brad Pitt)及安琪蓮娜祖莉(Angelina Jolie)來港度假,以及美國名媛Paris Hilton訪港後,輪到「萬人迷」球星碧咸(David Beckham)及澳洲歌后Kylie Minogue接力登場。碧咸應里昂證券公司邀請,於明天出席投資講座。

今日碧咸由新加坡抵港,中午十二點半,機場抵港大堂B區已有保安圍鐵馬戒備,大家都嚴陣以待迎接萬人迷,點知碧咸聲東擊西,於兩點十五分左右,佢喺外籍保鑣及機場職員陪同下,喺A區低調現身,戴帽﹑孭背囊及身穿白色短袖T恤嘅碧咸,大晒手背「愛妻紋身」,難怪躋身最激勵人心父母榜前列位置。記者上前拍照時,被職員及保鑣阻止,惟碧咸仍保持笑容,其間有男球迷遞球衣畀碧咸簽名,佢都友善答應,表現親民,之後就乘車離開前往酒店。

據知,承認有強迫症的碧咸極之愛整潔,他以一貫作風,要求酒店須預先為他入住的套房進行全面的僻味和消毒,以確保房間各處以至床單被舖地氈等,都保持潔淨清新,絕對不能接受有半點異味。另外,李玟同萬人迷碧咸私交甚篤,今晚佢就着住碧咸嫂送贈嘅連身裙,同碧咸飯聚,CoCo說:「我好鍾意好鍾意碧咸,我老公上咗去招呼佢先,今晚仲有佢兩位經理人一齊,我依家著住呢條裙,係碧咸嫂Victoria送畀我o既!」
碧咸(David Beckham)
萬人迷碧咸以隨意打扮訪港。
碧咸(David Beckham)
仲幫粉絲喺球衣上簽名,非常親民。
碧咸(David Beckham)