棟篤笑之父自爆大搞作
黃子華潛水度戲匭

擁有外國大學哲學學士學位的黃子華，稱他為香港的棟篤笑之父其實絕不為過，由 90年其首個棟篤笑《娛樂圈血肉史》開始，每每在宣佈開騷後均掀起一陣撲飛熱潮，有這成績受到前呼後擁是少不了的，但子華對娛樂圈的種種，甚至是訪問仍未習慣，反而更享受完騷後的「潛水期」，讓他為下一次的創作準備。

黃子華與一眾舞台劇演員如龔小玲、韋羅莎、黃呈欣、朱栢康及白只等，早前為新舞台劇《咁愛咁做》宣傳，並接受本報專訪，只見子華在整個訪問中也甚不自然，對此子華解釋說：「其實我入行咁多年都仲未習慣接受訪問，我從來都唔覺得自己有乜咁值得人哋去訪問我。」

眾舞台劇演員都認為與子華合作是一件值得興奮的事。

黃子華說每次完成一項工作，他都會讓自己沉寂一段時間，以激發創作思維。

子華正忙於為《咁愛咁做》宣傳。

後悔接受訪問

每次舉行棟篤笑，子華（右）總有新搞作。資料圖片

子華續說：「我唔係好識講嘢，所以我從來未試過有一次做完訪問後係唔後悔嘅，因為我成日講錯嘢，而今次做訪問，係為部舞台劇宣傳，所以要負番責任。」
原來子華有一個習慣，就是在完成手頭上的一項工作後便會沉寂一段時間，以激發自己的創作思維及趁機進修一番，問子華會進修甚麼？他表示：「其實都係睇吓書，同埋整理一下自己嘅思緒。」

有意開拍電影

同時，子華透露有意在不久的將來執起導演筒，拍攝一部擁有濃厚香港味道的本地電影，他說：「我有諗過啲關於電影嘅 project，總之意念行頭啦，未有具體計劃。」
其他演員對於是次跟子華合作也大表興奮，其中韋羅莎坦言：「真係好緊張，事前唔會諗到有機會同子華合作，佢係一個好 amazing嘅演出者，都有啲壓力。」

黃子華賣弄情感唔驚嗌回水

黃子華闊別三年再演舞台劇，除親自挑選至愛演員合作，還會大賣豐富複雜的感情線，子華絕不怕觀眾嗌回水，並獲同劇演員亦盛讚：「子華會畀飽飯我哋食！」

黃子華闊別三年再演舞台劇，才華洋溢的他絕對是觀眾的信心保證。

香港棟篤笑鼻祖黃子華自三年前的《男磨坊》後，下月再演出舞台劇《咁愛咁做》，屬愛情喜劇類。子華表示劇本改編自外國劇目，年多前看過後即覺得非常適合他演出。他說：「個角色係編劇家，又係知識分子，仲唔係講我？」

探討偷食問題

今次子華嚴選多名具分量的舞台劇界演員合作，發展糾纏不清的男女關係，大膽討論背叛及偷食話題，劇中他有一名24歲女兒。問到是否加入親身經歷？他說：「相信每個人都有類似嘅經歷，但呢個劇嘅好就係每個角色都有立場，唔係為愛而愛，唔似《等住愛》、《返嚟愛》嗰啲！」再問有否親熱場面？他表示劇本沒有，但不擔保臨時加插，並推舉演員朱柏康負責，朱柏康搞笑地說：「冇錯！我係Kissing Machine（接吻機器）！」

舞台劇演員龔小玲（左起）、黃呈欣及韋羅莎對子華演技讚不絕口。

黃子華不排除表演時有爆肚演出。

朱柏康（左起）、陳淑儀、子華及白只合作演出，希望擦出火花。

個個有飽飯食

各演員對子華讚不絕口，指其Fans層面廣泛，由小朋友到婆婆都有。演員陳淑儀最欣賞子華不計酬勞為藝術出力，白只則說：「佢成日諗嘢，又不斷觀察，而且會畀飽飯我哋食，做訪問都服侍周到。」子華亦讚他們演技上乘，故安排足夠的發揮空間：「我唔鍾意搵人嚟攝場，換轉係我都嬲啦！」

對於近年有人表演棟篤笑時，觀眾嗌回水，他表示冇有怕：「可能佢哋冇去過演藝學院，嗰度好莊嚴，嗌大聲啲上面啲『鐵通』就會冧落嚟。」

化妝：Joyce Ma、Tricia Siu@Joyce Makeup

髮型：Tammy Wong@Snips