近日無綫黃金檔兩劇仆直，為挽救劣勢，由收視福將黃子華、徐子珊孭飛嘅《My盛Lady》加緊趕拍，提早喺今年底出街。上周被雜誌影到佢哋喺灣仔星街拍外景，cool爆嘅子華除同徐子珊零交流外，離開時子華換上背心，露出左臂部分潑墨紋身，一見記者上前立即拔足狂奔。

報道出街後，唔少fans都話想睇全個紋身。未知係咪有人想回應fans訴求，近日網上忽然流傳一張子華赤膊上身相，相片有齊前左後多角度拍攝，清楚見到整個紋身，幾經打聽，原來佢一年前同化妝師女友Annie（溫安妮）分手後，搵法國籍有名紋身師Leon Lam紋，不過黃子華即係黃子華，佢唔似其他人咁多數紋字紋龍紋圖案，而係紋一個十足十倒瀉墨嘅紋身，「藝術感」十足！

一周前，子華拒絕回應紋身由來跑上車離開，但一周後，完整紋身照流傳於網絡上，認真離奇！

驟眼睇，子華嘅紋身似俾人潑咗一身墨，不過自己識欣賞就得啦！